Naxçıvan, 24 sentyabr, AZƏRTAC

Naxçıvan Muxtar Respublikası Dövlət Miqrasiya Xidmətinin təşkilatçılığı ilə “Əcnəbilərin və vətəndaşlığı olmayan şəxslərin hüquq və vəzifələri”nə dair növbəti maarifləndirici tədbir keçirilib.

Xidmətin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən Xidmətin əməkdaşı Elnur Zellabdinov ötən dövrdə muxtar respublikada sosial-iqtisadi inkişafın təmin edildiyini, yeni iş yerlərinin açıldığını, əhalinin sosial-rifah halının yaxşılaşdırıldığını, sosial infrastrukturun gücləndirildiyini vurğulayıb. Bildirib ki, həyata keçirilən çoxşaxəli və uğurlu siyasət miqrantların Naxçıvan Muxtar Respublikasına marağını daha çox cəlb etməklə bərabər, onların diyarımıza müxtəlif məqsədlərlə səfər etmələrinə də geniş imkanlar yaradıb.

Əcnəbilərin və vətəndaşlığı olmayan şəxslərin Azərbaycan Respublikasında müvəqqəti olması və yaşaması barədə ətraflı məlumat verilərək qeyd edilib ki, Azərbaycan Respublikasının Miqrasiya Məcəlləsində əcnəbilərə və vətəndaşlığı olmayan şəxslərə müvəqqəti olma və yaşama icazəsinin verilməsi ilə bağlı kifayət qədər müxtəlif hallar nəzərdə tutulub. Təbii ki, bu da onların ölkəmizdə müvəqqəti yaşama hüququnu daha rahat və asan formada əldə etmələri baxımından müstəsna əhəmiyyətə malikdir. Eyni zamanda, əcnəbilərin və vətəndaşlığı olmayan şəxslərin Azərbaycan Respublikasında müvəqqəti olma və yaşama müddətinin uzadılması qaydası və tələb olunan sənədlər barədə də geniş məlumat verilib.

Elnur Zellabdinov miqrasiya sahəsində qanunvericiliyin tələblərinin pozulmasına görə mövcud qanunvericilikdə nəzərdə tutulmuş məsuliyyət mövzusuna da toxunaraq slayd vasitəsilə tədbir iştirakçılarına ətraflı məlumat verib. Vurğulanıb ki, öz hüquq, azadlıq və vəzifələrini, eyni zamanda, miqrasiya qanunvericiliyini bilməyən əcnəbilər, təbii ki, məsuliyyətə cəlb oluna, habelə qanunsuz miqranta çevrilə bilərlər. Bu baxımdan qanunsuz miqrasiyaya qarşı Dövlət Miqrasiya Xidməti tərəfindən mütəmadi olaraq səmərəli və effektiv mübarizə tədbirləri həyata keçirilir, yarana biləcək problemlərin vaxtında aşkarlanması və qarşının alınması istiqamətində operativ addımlar atılır.

Sonra tədbir iştirakçılarına Xidmət tərəfindən hazırlanan və miqrasiya qanunvericiliyini əhatə edən maarifləndirici bukletlər paylanıb. Qarşılıqlı diskussiya şəraitində keçən tədbirdə əcnəbiləri maraqlandıran suallar ətraflı cavablandırılıb.

x x x

Dövlət Miqrasiya Xidmətinin qarşısında duran prioritet vəzifələrdən biri də əcnəbilərin qanunlarımıza əməl etmələri ilə bərabər, həm də Azərbaycanın tarixini və mədəniyyətini öyrənməsidir. Bu baxımdan onların muzeylərə ziyarətləri də təşkil olunur. Bu dəfə əcnəbilərin Xatirə Muzeyinə ekskursiyası təşkil edilib.

Bələdçi məlumat verib ki, Xatirə Muzeyi ermənilər tərəfindən törədilən soyqırımı qurbanlarının, Azərbaycanın suverenliyi və ərazi bütövlüyü uğrunda döyüşlərdə həlak olanların xatirəsini əbədiləşdirmək məqsədilə 2000-ci ildə yaradılıb. Döyüşlərdə həlak olanların xatirəsinin əbədiləşdirildiyi muzeydə şəhidlərin fotoşəkilləri, şəxsi sənədləri, döyüş fəaliyyətlərini əhatə edən materiallar, eyni zamanda, qəhrəmanlıq tariximizin müxtəlif dövrlərinə aid kitablar mühafizə və nümayiş etdirilir.

Ekskursiya zamanı çoxsaylı eksponatlar, şəhidlik zirvəsinə ucalan Vətən oğullarının fotoşəkilləri və şəxsi əşyaları ilə tanışlıq tədbir iştirakçılarında maraqlı təəssürat yaradıb.