Naxçıvan, 12 noyabr, AZƏRTAC

Noyabrın 10-11-də “Naxçıvanqala” Tarix-Memarlıq Muzey Kompleksində keçirilən “Ailə təsərrüfatı məhsulları” festivalına böyük maraq var idi. Festivala muxtar respublikanın bütün rayonlarını təmsil edən 319 ailə təsərrüfatı tərəfindən 418 növdə 23 mindən çox qablaşdırılmış məhsul çıxarılmışdı. Adı dillər əzbəri olan Naxçıvan məhsulları - Nehrəm pendiri və qatığı, Ordubad alanası, sucuğu, cəvizi, Şərurun müxtəlif çeşidli ət və balıq məhsulları, meyvə araqları, Sədərək çörəyi, Şahbuz qaymağı və xaması, Qıvraq badamı, Naxçıvan qovurması, mürəbbə və şirniyyatları, eləcə də lavaşlar, turşular, meyvə şirələri iştirakçıların diqqətini çəkirdi. Naxçıvan təbiətinin nemətlərindən olan dərman bitkiləri - kəklikotu, qantəpər, yarpız, solmazçiçəyi, dağ nanəsi, şirinbiyan, eləcə də yabanı giləmeyvələr - yemişan, həmərsin və onlardan hazırlanmış müxtəlif məhsullar da qablaşdırılaraq festivala çıxarılmışdı.

AZƏRTAC-ın Naxçıvan bürosunun əməkdaşı “Ailə təsərrüfatı məhsulları” festivalına baş çəkib, iştirakçılarla həmsöhbət olub. Şərur rayonunun Çərçiboğan kənd sakini, təsərrüfatçı Muqbil Zamanov altı ilə yaxındır ki, meyvədən hazırlanan araq və çaxırların istehsalı ilə məşğuldur. Dövlətimizin dəstəyi ilə ailə təsərrüfatı yaradıb.

“Festivala öz ailə təsərrüfatımda istehsal etdiyim 25 növ müxtəlif meyvə araqları və çaxırlarını gətirmişəm. Həmin məhsullardan yaxşı gəlir əldə edirəm”, – deyən Muqbil Zamanov festivalda bu məhsullara alıcıların böyük maraq göstərdiyini vurğuladı. Belə festivalların təsərrüfat sahiblərinin istehsal etdiyi məhsulları tanıtmaq baxımından əhəmiyyətli olduğunu bildirən müsahibimiz yaradılan şəraitə görə minnətdarlığını bildirdi.

Muxtar respublikamızın nümunəvi ailə təsərrüfatı sahiblərindən biri olan Babək rayonunun Nehrəm kəndində yaşayan Cəmşid Həsənovla da söhbət etdik. Cəmşid Həsənov vurğuladı ki, onun ailəsi uzun illərdir əkinçiliklə məşğuldur. Onun sözlərinə görə, tədarük etdiyi məhsulları Naxçıvan-Culfa magistral yolunun kənarında torpaq mülkiyyətçiləri üçün ayrılmış ərazidə və Naxçıvan şəhərində təşkil olunan kənd təsərrüfatı məhsullarının satış yarmarkalarında satır. Həmsöhbətimiz bildirdi ki, bu il 80 tona yaxın qovun-qarpızdan yaxşı gəlir əldə edib. Pomidor və xiyar da satışa çıxarılan məhsullar içərisində üstünlük təşkil edir. Son 3 ildə isə əkdiyi pomidorlardan tomat da düzəldir. Ailə üzvləri tərəfindən qablaşdırılan tomat və müxtəlif çeşiddə turşular rayon ərazisində, eləcə də Naxçıvan şəhərində fəaliyyət göstərən satış obyektlərində alıcılara təqdim olunur. Bu il havaların çox isti keçməsinə baxmayaraq, sahələrdən bol tərəvəz məhsulları əldə edib. Hətta taxıl biçini yekunlaşdıqdan sonra həmin sahələrdə yenidən şum apararaq pomidor əkib. Həmin pomidorlar qızarmadan, turşu tutmaq məqsədilə sahələrdən yığılaraq satışa göndərilib.

Müsahibimiz onu da vurğuladı ki, Naxçıvan şəhərində keçirilən “Ailə təsərrüfatı məhsulları” festivalında ilk dəfədir iştirak edir. Festivala qablaşdırılmış tomat və turşular çıxarıb. Cəmşid Həsənov belə festivalların keçirilməsinin torpaq mülkiyyətçiləri üçün böyük bir stimul olduğunu qeyd etdi və tədbirin təşkilatçılarına minnətdarlığını bildirdi.

Ailə təsərrüfatı sahiblərindən biri də Ordubad rayonunun Vənənd kəndində yaşayan Yaqut Babayevadır. Onun adı bizə bu ilin may ayında Naxçıvanda keçirilən “Göycə” festivalından tanışdır. Belə ki, həmin festivalda o, “Ən yaxşı göycə” müsabiqəsində ikinci yerə layiq görülərək diplomla təltif olunub. Yaqut xanımla söhbətimiz zamanı bildirdi ki, Vənənd kəndində meyvəçilik tarixən inkişaf etdirilib. Bu ənənə indi də yaşadılır. “Bağımızda müxtəlif meyvə ağacları var. Bu il isə meyvə daha çox olub. Hazırda bu mövsümdə yetişən meyvələri tədarük edirik. Ailə üzvlərimizin köməyi ilə birgə alma, armud, heyva, üzüm, şaftalı və digər meyvələrdən kompot və mürəbbələr hazırlamışıq. Satış üçün onları müxtəlif şüşə qablarda gigiyenik qaydalara uyğun olaraq qablaşdırmışıq. Bu məhsullarla yanaşı, Ordubad meyvələrindən hazırlanmış sucuq, miyanpur, alana kimi ənənəvi məhsulları da yaddan çıxarmamışıq”, - deyə o qeyd etdi.

Yaqut Babayeva qədim zamanlardan sucuq, alana, miyanpur kimi Ordubad süfrələrinin bəzəyi sayılan nemətlərin hazırlanması ənənəsini təsərrüfatında davam etdirdiyini bildirir.

Müsahibimiz vurğuladı ki, budəfəki “Ailə təsərrüfatı məhsulları” festivalına 40 çeşiddən çox məhsul çıxarıb. Bu məhsullar içərisində meyvələrdən hazırlanmış müxtəlif təamlarla yanaşı, qurudulmuş müxtəlif pencər növləri və kəklikotu da var. Muxtar respublikada növbəti dəfə ailə təsərrüfatı sahiblərini bir yerə toplayacaq festival haqqında isə həmsöhbətimiz bunları dedi: “Ailə təsərrüfatı məhsulları” festivalı Naxçıvan şəhərində keçirilən ən maraqlı festivallardan biridir. Çünki payız fəslində təşkil edilən bu festivalda yerli məhsulların növ və çeşidi daha çox olur. Belə tədbirlərə yerli sakinlər və qonaqlar tərəfindən böyük maraq var. Hər kəs istədiyi məhsulu münasib qiymətə ala bilir. Eyni zamanda, bu kimi tədbirlərdə biz yeni alıcılarla tanış olmaq imkanı qazanırıq. Onlar sonradan da sifariş üçün bizimlə əlaqə saxlayırlar”.

Qeyd edək ki, festivalın sonunda “Ən yaxşı məhsul” nominasiyası üzrə müsabiqənin qalibləri müəyyənləşib. Müsabiqənin nəticələrinə əsasən Şərur, Culfa və Şahbuz rayonlarından müvafiq olaraq Muqbil Zamanov, Çiçək Bayramova və Abbas Hacıyev festivalın qalibləri olublar. Ordubad, Babək, Kəngərli rayonlarından Mustafa Qədimov, Tofiq Abutalıbov və Pakizə İsmayılova ikinci, Sədərək rayonu, Naxçıvan şəhəri və Şərur rayonundan Mehbarə Hüseynova, Mübariz Mirzəyev və Sənan Qasımzadə isə üçüncü yerə layiq görülüblər. Qaliblərə diplomlar təqdim edilib.