Naxçıvan, 19 may, AZƏRTAC

Naxçıvan Muxtar Respublikasında ilk dəfə təşkil olunan şahmat üzrə kişilər arasındakı Azərbaycan çempionatına yekun vurulub.

AZƏRTAC-ın Naxçıvan bürosu xəbər verir ki, Naxçıvan şəhərindəki “Gənclik” Mərkəzində keçirilən yarışda 12 şahmatçı dairəvi sistem üzrə mübarizə aparıb. Reqlamentə əsasən, 2 mərhələdən ibarət olan çempionatda ilkin mərhələni 1-4-cü yerlərdə başa vuran zəka sahibləri 2-ci mərhələdə pley-off sistemi üzrə yarımfinalda mübarizə aparıblar.

Azərbaycan çempionatının final görüşündə qrossmeyster Nicat Abasovla (2665) qrossmeyster Vasif Durarbəyli (2606) üz-üzə gəlib. Rəqiblərin ilk gündə keçirilən görüşündə heç-heçə qeydə alınıb. İkinci gündə keçirilən görüşlər daha gərgin xarakter alıb. Burada üstünlüyü ələ alan Vasif Durarbəyli sonda qalib gələrək Azərbaycan çempionu adına layiq görülüb.

Üçüncü yer uğrunda keçirilən qarşılaşmada qrossmeyster Eltac Səfərli (2598) və qrossmeyster Nicat Məmmədov (2609) məsələyə aydınlıq gətiriblər. “Sülh”ün qeydə alındığı ilk görüşün ardınca daha istəkli oyun sərgiləyən Nicat, növbəti gündə qalib gəlib və çempionatı üçüncü pillədə başa vurub.

Qalib olan şahmatçı Vasif Durarbəyli Azərbaycanı Dünya Kubokunda təmsil edəcək.

Çempionatın bağlanış mərasimində çıxış edən yarışın baş hakimi Lütfiyar Rüstəmov çempionatın təşkilatçılıq və yüksək peşəkarlıq səviyyəsində keçirilən yarış baxımından ölkənin şahmat tarixində yaddaqalan hadisə olduğunu bildirib.

Azərbaycan Şahmat Federasiyasının vitse-prezidenti Faiq Həsənov çıxışında vurğulayıb ki, ilk dəfə Bakıdan kənarda keçirilən ölkə birinciliyi yüksək səviyyədə təşkilatçılığı ilə seçilib. Məhz bu yarış dünyanın sayılıb-seçilən beynəlxalq turnirləri ilə müqayisə oluna bilər. Çempionat ərəfəsində istər şahmatçılar, istərsə də qonaqlar üçün hər bir şərait yaradılıb. F.Həsənov Naxçıvanda şahmata yüksək səviyyədə göstərilən dövlət qayğısına görə Muxtar Respublikanın Şahmat Federasiyasına, Gənclər və İdman Nazirliyinə bütün iştirakçılar adından minnətdarlığını bildirib, belə turnirlərin bundan sonra Naxçıvanda daha çox keçirilməsini arzulayıb.

Çempionatın gedişatından bəhs edən F.Həsənov vurğulayıb: “İlk 4 pillədə qərarlaşan şahmatçılar turnirin favoritləri idi. Bu çempionat fərqli sistemlə keçirildi. Çempionatdan öncə şahmatçılarla danışıqlar zamanı bəziləri bu sistemə uyğunlaşa bilməyəcəklərini deyirdilər. Lakin əsl qalib bu sistemlə müəyyən olundu”.

Azərbaycan Şahmat Federasiyasının vitse-prezidenti çıxışının sonunda yaradılan şəraitə, göstərilən qonaqpərvərliyə görə minnətdarlığını bildirib.

Naxçıvan Muxtar Respublikası gənclər və idman naziri Azad Cabbarov şahmatçıları təbrik edərək vurğulayıb ki, şahmat tarixində ilk dəfə Naxçıvanda keçirilən ölkə birinciliyi yüksək təşkilatçılığı ilə seçilir. Diyarımız hər il müxtəlif mötəbər beynəlxalq turnirlərə, yarışlara ev sahibliyi edir. Lakin Azərbaycan çempionatının burada keçirilməsi tarixi hadisədir. Çünki bu yarışda Azərbaycanın ən güclü şahmatçıları mübarizə aparıblar. Bu yarış həm də yerli şahmatçılar üçün əlavə stimul olub. Onlar təcrübəli, beynəlxalq qrossmeysterlərin oyunlara baxmaqla, həm də təcrübə toplamış olublar. A.Cabbarov hər bir şahmatçını təbrik edib, onlara gələcək karyeralarında uğurlar arzulayıb.

Sonda qalib şahmatçılar diplom və pul mükafatı ilə, Vasif Durarbəyli isə kubokla təltif edilib.