Naxçıvan, 27 aprel, AZƏRTAC

1918-ci il mayın 28-də yaradılan Azərbaycan Xalq Cümhuriyyəti xalqımızın dövlətçilik tarixində şanlı səhifədir. Həmin dövrdə Naxçıvanda ölkəmizin ərazi bütövlüyü uğrunda mübarizə daha da genişlənib.

AZƏRTAC-ın Naxçıvan bürosu xəbər verir ki, bu fikirlər Naxçıvan Dövlət Tarix Muzeyində Azərbaycan Xalq Cümhuriyyətinin 100 illiyi münasibətilə “Naxçıvan Azərbaycan Xalq Cümhuriyyəti dövründə” mövzusunda keçirilən elmi konfransda səsləndirilib.

Tədbirdə muzeyin direktoru, Naxçıvan Muxtar Respublikasının Əməkdar Mədəniyyət İşçisi Nizami Rəhimov çıxış edərək ümummilli lider Heydər Əliyevin Xalq Cümhuriyyətinin ənənələrinin yaşadılması istiqamətindəki əvəzsiz xidmətlərindən danışıb, Azərbaycan Xalq Cümhuriyyətinin 100 illik yubileyinin qeyd olunmasının, 2018-ci ilin Azərbaycan Respublikasında “Cümhuriyyət İli” elan edilməsinin dövlətçilik tariximizin öyrənilməsi baxımından mühüm əhəmiyyət kəsb etdiyini vurğulayıb.

“Naxçıvan Milli Komitəsinin fəaliyyəti cümhuriyyət dövründə” mövzusundakı çıxışında AMEA-nın müxbir üzvü Vəli Baxşəliyev qeyd edib ki, bu komitələr milli hərəkatın qarşısında duran vəzifələri müəyyən edən tələblər hazırlamaqla yanaşı, şəhər dumaları və digər təşkilatlarla birgə Naxçıvan diyarında yerli hakimiyyət orqanlarının möhkəmləndirilməsinə də kömək ediblər. Onların başçılığı ilə silahlı qüvvələrin yaradılması dinc əhalinin daşnakların fitnəkar hərəkətlərindən qorunmasında böyük rol oynayıb.

Vurğulanıb ki, cümhuriyyətin yarandığı vaxtdan Naxçıvan Milli Komitəsi onunla əlaqə yaratmağa, qədim diyarın Azərbaycanın tərkibinə daxil olmasına çalışıb. Lakin yaranmış siyasi və beynəlxalq vəziyyət həmin vaxtda xalqın bu arzusunu həyata keçirməyə imkan verməyib. Sonralar naxçıvanlıların apardığı gərgin mübarizə nəticəsində qədim diyar Azərbaycanın tərkibində saxlanılıb.

Tədbirdə Naxçıvan Dövlət Tarix Muzeyinin bələdçiləri Xavər Nuri “Naxçıvan Azərbaycan Xalq Cümhuriyyəti dövründə”, Xaqan Ağəlisoy isə “Naxçıvan Araz-Türk Cümhuriyyəti” mövzularında çıxış ediblər.

Sonda konfrans iştirakçıları Azərbaycan Xalq Cümhuriyyətinin 100 illiyinə həsr edilmiş sərgi ilə tanış olublar.