REGİONLAR
Naxçıvanda xüsusi qayğıya ehtiyacı olan 49 uşaq “Yay məktəbi”nə cəlb edilib
Naxçıvan, 22 iyul, AZƏRTAC
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Həmkarlar İttifaqları Şurasının təşkilatçılığı ilə Ağbulaq İstirahət Mərkəzində xüsusi kateqoriyadan olan uşaqlar üçün “Yay məktəbi” təşkil edilib.
Muxtar respublikanın Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, xüsusi qayğıya ehtiyacı olan uşaqların, şəhid və çoxuşaqlı ailələrin övladları, hər iki valideynini itirmiş və valideyn himayəsindən məhrum olmuş, tək valideyn himayəsində yaşayan uşaqlar olmaqla, ümumilikdə, 49 uşağın iştirak etdiyi “Yay məktəbi”nə iyulun 21-də start verilib.
Bu münasibətlə Ağbulaq İstirahət Mərkəzində tədbir keçirilib. Tədbirdə iştirak edən Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova və Həmkarlar İttifaqları Şurasının sədri Anar İbrahimov çıxışlarında artıq ənənəyə çevrilmiş “Yay məktəb”lərinin uşaqlar üçün əhəmiyyətinə toxunublar. Bildiriblər ki, muxtar respublikada uşaqlar yüksək diqqət və qayğı ilə əhatə olunub. Dövlətimiz tərəfindən onların layiqli vətəndaş kimi yetişmələri, milli ruhda tərbiyə olunmaları, bilikli, bacarıqlı, yüksək intellektli insanlar kimi formalaşmaları üçün bütün tədbirlər həyata keçirilir.
Diqqətə çatdırılıb ki, uşaqların mənəvi–psixoloji inkişafına xidmət edən bu cür tədbirlər onlara yeni dostluqlar qazanmağa, muxtar respublikanın təbiəti ilə yaxından tanış olmağa, dünyagörüşlərini artırmağa, asudə vaxtlarını səmərəli keçirməyə imkan yaradır.
Şəhid Ruzi İbrahimovun qızı Gülay İbrahimova tədbirdə çıxış edərək deyib: “Gözəl təbiəti və istirahət üçün ideal məkan olan Ağbulaq İstirahət Mərkəzində olduğum üçün sevincliyəm. İnanıram ki, burada keçirəcəyimiz günlər xoş və maraqlı olacaq, yeni dostlar, tanışlıqlar qazanacağıq. Çalışacağam ki, bu fürsəti yaxşı dəyərləndirib “Yay məktəbi”ndə fəal iştirak edim”. Gülay İbrahimova göstərdiyi böyük diqqət və qayğıya görə Naxçıvan Muxtar Respublikası Ali Məclisinin Sədrinə uşaqlar adından minnətdarlıq edib.
“Yay məktəbi”nin ilk günündə uşaq hüquqları ilə bağlı maarifləndirici seminar keçirilib, onlara mövzuya uyğun məlumat xarakterli broşürlər verilib. Həmçinin iştirakçıların asudə vaxtlarının səmərəli keçirilməsi üçün təşkil edilən tədbirlərin uşaqların inkişafına təsiri mövzusunda çıxışlar olub. Nahardan sonra uşaqlar üçün əyləncəli oyunlar təşkil edilib.
Proqrama uyğun olaraq hər gün səhər gimnastikasından sonra uşaqlar Ağbulaq kəndinə ekskursiya edəcək, onlar üçün müxtəlif idman və əyləncəli oyunlar, intellektual yarışlar, diskussiyalar, oxunması zəruri olan kitabların mütaliə və müzakirəsi keçiriləcək. “Yay məktəbi”ndə Azərbaycan filmlərinin nümayiş olunması və Şahbuz Rayon Mədəniyyət Şöbəsinin “Batabat” instrumental ansamblının iştirakı ilə konsert proqramının təşkili də nəzərdə tutulub. İstirahət müddətində keçirilən müsabiqə və yarışlarda fəal iştirak edən uşaqlar Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən diplomla mükafatlandırılacaq.
“Yay məktəbi”nə cəlb olunmuş uşaqlara nəzarət üçün komitənin 4 əməkdaşı ilə yanaşı, onların sağlamlıqlarının qorunması məqsədilə tibbi heyət də təhkim edilib.