MƏDƏNİYYƏT


Naxçıvanlı bəstəkarın 70 illiyi Bakıda qeyd edilib

Bakı, 7 fevral, Flora Şükürova, AZƏRTAC

Fevralın 7-də Naxçıvan Bəstəkarlar Təşkilatının məsul katibi, Əməkdar incəsənət xadimi, bəstəkar Kamal Əhmədovun 70 illiyinə həsr olunmuş yubiley gecəsi keçirilib.

AZƏRTAC xəbər verir ki, M. Maqomayev adına Azərbaycan Dövlət Akademik Filarmoniyasında təşkil ediləcək tədbirdə Azərbaycan Bəstəkarlar İttifaqının katibi, Əməkdar incəsənət xadimi Sərdar Fərəcov bəstəkarın milli mədəniyyətimizin inkişafındakı xidmətlərindən danışıb, sənət fəaliyyəti haqqında məlumat verib.

Bildirib ki, görkəmli bəstəkar, Xalq artisti Xəyyam Mirzəzadənin sinifində bəstəkarlıq sənətinin sirlərini mənimsəyən K. Əhmədovun təhsil illərində fortepiano üçün yazdığı “Prelüd və fuqalar”, “Variyasiyalar”, tar üçün “Sonata”, simli alətlər ansamblı üçün “Kvartet” əsərləri onun peşəkar yaradıcılığının ilk dövrünü təşkil edir. Konservatoriyada keçirilən konsertlərdə onun bir sıra əsərlərinin ifası musiqisevərlərin rəğbətini qazanıb. Diplom işi kimi böyük simfonik orkestr üçün yazdığı “Cavid” simfonik poeması təhsil illərinin ən mükəmməl və uğuru əsəri hesab edilir. Mahnı yaradıcılığında naxçıvanlı şairlərin əsərlərinə müraciət edən K.Əhmədov “Qızlar bulağı”, “Qoşa çinar”, “Saçlarıma qar da yağdı”, “Gözlərinə baxan zaman”, “Zəfər marşı”, “Anacan”, “Milli Ordumuz”, “Bənövşə”, “Unutdun məni” “Kaman səsi", “Bu yolu seçdim”, “Keçmə” və digər mahnıların bəstəkarı kimi tanınır.

Qeyd edilib ki, Xalq Çalğı Alətləri Orkestrinə dərindən bələd olan bəstəkar bir sıra orkestr əsərləri də yazıb. “Cəngi”, “Süita”, “Naxçıvan eskizləri”, “Rekviyem” kimi əsərləri öz orijinallığı ilə fərqlənir. Azərbaycanın azadlığı uğrunda həlak olmuş şəhidlərə həsr olunmuş “Rekviyem” əsəri Xalq Çalğı Alətləri Orkestrinin janr xüsusiyyətlərini aşaraq simfonikliyi ilə diqqəti cəlb edir. Təsadüfi deyil ki, bu əsər dəfələrlə “Şəhidlər” simfoniyası adı altında səsləndirilərək Naxçıvan televiziyası ilə göstərilib. 1985-ci ildən 1997-ci ilədək Naxçıvan Dövlət Filarmoniyasının Xalq Çalğı Alətləri Orkestrinin yaranmasında və formalaşmasında böyük zəhməti olan Kamal Əhmədovun idarəsi ilə bu orkestr Bakı, Sumqayıt və digər şəhərlərdə dəfələrlə müvəffəqiyyətli konsertlər verib. O, bir sıra vokal, instrumental və simfonik əsərlərə müraciət edərək qarışıq xor üçün “Fuqa”, aşıq mahnıları mövzusu əsasında “A-kapellalar”, böyük simfonik orkestr və fortepiano üçün “Konsert”, kamera orkestri üçün “Simfoniya” və digər əsərlər ərsəyə gətirib. Bəstəkarın kamera orkestri üçün yazdığı üç hissəli “Simfoniya” Türkiyənin istedadlı dirijoru Saim Akcılın rəhbərlik etdiyi İstanbul-Borusan Oda Orkestri tərəfindən səslənmiş və orkestrin daimi repertuarına salınmışdır. O, həmçinin “Dəli yığıncağı”, “Dirilən adam”, “Fərhad və Şirin” tamaşalarına da musiqi bəstələyib.

Tədbir çərçivəsində Xalq artisti Ağaverdi Paşayevin bədii rəhbərliyi ilə Azərbaycan Dövlət Xalq Çalğı Alətləri Orkestri konsert proqramı ilə çıxış edib.

Konsertdə respublikanın tanınmış incəsənət ustaları bəstəkarın yaradıcılığına müraciət ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.