REGİONLAR


Naxçıvanlı musiqiçi dünya miqyaslı müsabiqədə Qran-Pri qazanıb

Naxçıvan, 17 iyun, AZƏRTAC

Naxçıvan Şəhər Ərtoğrol Cavid adına Uşaq Musiqi və Bədii Sənətkarlıq Məktəbinin qanun ixtisası üzrə müəllimi Sevinc Babayeva ötən ay ABŞ-ın Nyu-York şəhərində keçirilən “Fiestalonia Amerikan Edition” adlı Beynəlxalq Distant Yaradıcı İnsanlar Müsabiqəsində “Qran-Pri” mükafatçısı olub.

Naxçıvan Muxtar Respublikası Mədəniyyət Nazirliyinin mətbuat xidmətindən AZƏRTAC-ın Naxçıvan bürosuna bildiriblər ki, müsabiqənin münsiflər heyətinin yekun qərarına əsasən müsabiqənin “instrumental ifa” kateqoriyası üzrə iştirakçısı olmuş Sevinc Babayevanın ifası yüksək qiymətləndirilib, o, 100 ballıq sistem üzrə dəyərləndirmədə maksimum bal (100 bal) toplayaraq müsabiqənin qalibi elan edilib. Bütün dünya ölkələrindən qatılan minlərlə ifaçı arasından hər yaş qrupundan bir nəfər olmaqla, üç ölkənin – Azərbaycan, Rusiya və Çexiyanın təmsilçiləri “Qran-Pri”yə layiq görülüblər.

Ölkəmizi müsabiqədə təmsil edən Sevinc Babayevanın qanunda ifa etdiyi Həsən Rzayevin “Çahargah rapsodiyası” müsabiqənin münsiflər heyəti ilə yanaşı, Qnesin adına Rusiya Musiqi Akademiyasının professoru Nataliya Brajnikova tərəfindən də yüksək qiymətləndirilib. Həmin ifa haqqında professor N.Brajnikova öz fikirlərini videomaterial formatında müsabiqənin rəsmi səhifəsində paylaşıb.

Müsabiqəyə “World Talent Rankinq”(ABŞ), Böyük Britaniya və “Open İtaly” (İtaliya) assosiasiyaları rəhbərlik edib. Adıçəkilən müsabiqə dünyanın 20-dən çox ölkəsinin Mədəniyyət Nazirliyi tərəfindən dəstəklənib. İştirakçıların ifalarının qiymətləndirilməsi 5 ölkədən, 40-a yaxın dünya şöhrətli musiqiçilərdən, rəssamlardan, balet və rəqs ustalarından və dünyada tanınmış digər sənət adamlarından ibarət nüfuzlu münsiflər heyəti tərəfindən aparılıb. “Fiestalonia Amerikan Edition” Beynəlxalq Distant Yaradıcı İnsanlar Müsabiqəsində vokalçılıq sənəti, instrumental ifa, rəqs, rəssamlıq və dizayn olmaqla, incəsənətin 5 sahəsi üzrə dünyanın hər yerindən iştirakçılar qatılıblar. Müsabiqənin şərtlərinə əsasən “Qran-Pri” mükafatçıları 2022-ci ilin may ayında İspaniyada keçiriləcək “Sea Sun” müsabiqəsinə qatılacaqlar.

Qeyd edək ki, “Fiestalonia Amerikan Edition” adlı Beynəlxalq Distant Yaradıcı İnsanlar Müsabiqəsi “Minilliyin Festivalı” (Fiestalonia Milenio) adlı Beynəlxalq İncəsənət Festivalının davamıdır. Tədbir qeyri-kommersiyalı yaradıcı kollektivlərin (xor kollektivləri, orkestrlər, instrumental ifaçılar, xoreoqrafiya, klassik musiqi, solo oxuma yarışları, folklor festivalları və sair) iştirak etdiyi dünya miqyaslı festivallardan biridir. Müsabiqədə iştirak edərək qalib olan Sevda Babayeva isə dəfələrlə muxtar respublika səviyyəli müsabiqələrin qalibi, 2008-ci ildə Bakı şəhərində keçirilmiş “Gənc ifaçıların ümumrespublika müsabiqəsi”ndə “Qran-Pri”, 2019-cu ildə keçirilmiş “Testene Art Baku” III Beynəlxalq İncəsənət Festivalında I yerə layiq görülüb. Tanınmış musiqiçi Prezident mükafatçısıdır.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.