Bakı, 22 aprel, AZƏRTAC 

Səudiyyə Ərəbistanı neft tədarükünü təmin etmək üçün digər ölkələrlə birgə çalışacaq.

AZƏRTAC xarici KİV-lərə istinadla xəbər verir ki, bu barədə Səudiyyə Ərəbistanının energetika, sənaye və təbii sərvətlər naziri Xalid Əbdüləziz Al Falih deyib.

O, Səudiyyə Ərəbistanının istehlakçılara kifayət qədər tədarükün təmin edilməsi üçün digər neft istehsalçıları ilə əməkdaşlıq edəcəyini, ancaq bunu edərkən qlobal neft bazarında tarazlığın pozulmasına icazə verilməyəcəyini bildirib.

Nazir ölkəsinin neft bazarındakı son prosesləri yaxından izlədiyini qeyd edib: “Səudiyyə Ərəbistanı qarşıdakı bir neçə həftədə yaxşı balanslaşdırılmış və sabit bazar formalaşdırmaq üçün digər istehsalçılar və istehlakçılarla danışıqlar aparacaq”.

Qeyd edək ki, Ağ evin yaydığı məlumata görə, ABŞ Prezidenti Donald Tramp İrandan neft alan ölkələrə tətbiq edilən və mayın 2-də başa çatacaq güzəştin müddətini artırmayıb. Belə ki, D.Tramp İrandan neft alan ölkələrə tətbiq olunan güzəştin müddətini uzatmamaq barədə qərar qəbul edib.

Xatırladaq ki, ABŞ İrana qarşı sanksiyalarının ötən il noyabrın 5-də qüvvəyə minən ikinci mərhələsi çərçivəsində bu ölkədən neft idxalını əhəmiyyətli dərəcədə azaldan Türkiyə, Çin, Hindistan, Koreya Respublikası, İtaliya, Yunanıstan, Yaponiya və Tayvana 180 günlük müvəqqəti güzəşt tətbiq edirdi.