SİYASƏT


Nazir müavini: Azərbaycan parlamenti ilə əməkdaşlıq etmək İspaniya parlamenti üçün vacib məsələlərdən biridir

Bakı, 13 iyun, AZƏRTAC

İyunun 13-də Milli Məclisdə Azərbaycan-İspaniya parlamentlərarası əlaqələr üzrə işçi qrupunun üzvləri İspaniya Xarici İşlər nazirinin müavini Fernando Martin Valensuela Marsonun başçılıq etdiyi nümayəndə heyəti ilə görüşüb.

AZƏRTAC xəbər verir ki, işçi qrupun üzvü Azər Kərimli Azərbaycanda gedən inkişaf prosesləri barədə məlumat verib. O deyib ki, siyasi, iqtisadi, sosial, hüquqi və s. sahələrdə ulu öndər Heydər Əliyev tərəfindən əsası qoyulmuş islahatlar bu gün Prezident İlham Əliyev tərəfindən uğurla davam etdirilir. Son 15 ildə iqtisadiyyatımız üç dəfədən çox artıb. Azərbaycanın bu ilin ilk üç ayında ümumi daxili məhsulu 3 faiz artıb. Ölkəmizdə çox əlverişli biznes mühitinin olması infrastrukturun inkişafına dəstək verir. Dünya bankının “Doing Business” hesabatına əsasən Azərbaycan biznes mühitinə görə dünyada 25-ci yerdə qərarlaşıb. Azərbaycan Avropa İttifaqına üzv ölkələrlə sıx əlaqələrə malikdir. Ölkəmiz bu gün Aİ-nin doqquz ölkəsi ilə ikitərəfli strateji tərəfdaşlıq haqqında müqavilələr imzalayıb. Azərbaycan ilə İspaniya arasında da ikitərəfli strateji əməkdaşlıq haqqında müqavilə imzalanıb. Ölkəmizin təşəbbüsü və iştirakı ilə bir çox enerji layihələri reallaşıb. Ötən il TANAP boru kəməri işə salınıb, TAP layihəsi üzrə işlər uğurla davam etdirilir. Təqdirəlayiq haldır ki, İspaniyanın “Enagas” şirkəti bu layihənin fəal iştirakçılarından biridir. Həyata keçirilən Şimal-Cənub, Şərq-Qərb nəqliyyat dəhlizləri də önəmli yer tutur. Bu layihələr ölkəmizin iqtisadi potensialının daha da artırılmasına xidmət edir. Ölkələrimiz arasında iqtisadi, mədəni, humanitar sahələrdə əməkdaşlıqdan bəhs edən deputat qeyd edib ki, hazırda onlarla İspaniya şirkəti Azərbaycanda fəaliyyət göstərir. Ticarət dövriyyəsinin daha da artırılması üçün geniş potensial imkanlar mövcuddur.

Ermənistan-Azərbaycan Dağlıq Qarabağ münaqişəsindən danışan deputat bildirib ki, Azərbaycan münaqişənin tezliklə beynəlxalq hüququn normaları çərçivəsində, ölkələrin ərazi bütövlüyü prinsipi əsasında həllinin tərəfdarıdır.

İspaniya Xarici İşlər nazirinin müavini Fernando Martin Valensuela Marso Azərbaycan ilə münasibətlərin inkişafını qeyd edib. O deyib ki, ölkələrimiz müxtəlif qlobal, beynəlxalq forumlarda bir-birini dəstəkləyir, ortaq fəaliyyət göstərir.

İqtisadi əməkdaşlıqdan danışan bildirib ki, İspaniya və Azərbaycanın iqtisadi potensialını artırmaq üçün böyük imkanlar var. Nazir müavini qlobal böhrana baxmayaraq, Azərbaycanda iqtisadi dirçəlişin olduğunu təqdir edib, bu istiqamətdə ümumi daxili məhsulun istehsalının artmasının önəmli olduğunu deyib. O, İspaniya ilə Azərbaycan arasında idxal-ixrac, sərmayə qoyuluşu və iqtisadiyyatın digər sahələrində qarşılıqlı faydalı əməkdaşlıq üçün geniş imkanlar olduğunu bildirib.

“Bir neçə həftədən sonra İspaniya parlamenti formalaşacaq. Azərbaycan parlamenti ilə əməkdaşlıq etmək İspaniya parlamenti üçün vacib məsələlərdən biridir”, - deyə nazir müavini diqqətə çatdırıb.

Dağlıq Qarabağ münaqişəsindən danışan Fernando Martin Valensuela Marso deyib ki, İspaniyanın mövqeyi dəqiq və qətiyyətlidir. O, münaqişənin beynəlxalq hüququn prinsiplərinə uyğun həll ediləcəyinə ümidvar olduğunu bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.