CƏMİYYƏT


Nazirlikdə dövlət qulluğuna yeni qəbul edilmiş əməkdaşlar and içiblər

Bakı, 23 iyun, AZƏRTAC

23 İyun - Dövlət Qulluqçularının Peşə Bayramı Günü münasibətilə Əmək və Əhalinin Sosial Müdafiəsi Nazirliyində dövlət qulluğuna yeni qəbul edilmiş əməkdaşların andiçmə mərasimi olub.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, tədbirdə əmək və əhalinin sosial müdafiəsi naziri Sahil Babayev nazirlik əməkdaşlarını Dövlət Qulluqçularının Peşə Bayramı Günü münasibətilə təbrik edib.

Nazir Prezident İlham Əliyevin yeni Sərəncamı ilə təltif edilən dövlət qulluqçuları sırasında Əmək və Əhalinin Sosial Müdafiəsi Nazirliyinin 10 əməkdaşının olduğunu, ümumilikdə 2018-ci ildən Nazirliyin 66 əməkdaşının dövlət təltiflərinə layiq görüldüyünü qeyd edib. O, Nazirlik əməkdaşlarının fəaliyyətinə verilən yüksək qiymətə, göstərdiyi böyük etimada görə dövlətimizin başçısına minnətdarlığını bildirib, təltif olunan əməkdaşları bu münasibətlə təbrik edib.

S.Babayev bildirib ki, əhaliyə xidmətlərin yüksək səviyyədə təşkili, bu xidmətlərdə vətəndaş məmnunluğuna nail olunması dövlət qulluğu sisteminin əsas prinsiplərindən biridir.

Nazir dövlət qulluğuna yeni qəbul olunan əməkdaşların ölkəmizdə sosial sahədə aparılan islahatlara, əhaliyə xidmətlərin vətəndaş məmnunluğuna uyğun göstərilməsi işlərinə öz töhfələrini verəcəyinə əminliyini ifadə edib.

Nazirliyin Dövlət qulluğu və kadr məsələləri şöbəsinin müdiri Nərmin Bayramova Nazirlik sistemində işə qəbul prosesinə dair təqdimatla çıxış edib. Qeyd olunub ki, Nazirlik üzrə son illər ərzində ümumilikdə 1500 vakant vəzifə elan edilib, müsabiqə və müsahibələrdə uğur qazanan 828 şəxs müvafiq dövlət qulluğu vəzifələrinə təyin olunublar. Əmək və Əhalinin Sosial Müdafiəsi Nazirliyi Dövlət İmtahan Mərkəzinin açıqladığı məlumatlara əsasən sertifikat əldə edərək və ümumi müsahibə nəticələri əsasında dövlət qulluğuna qəbul edilmiş şəxslərin sayına görə dövlət orqanları arasında birinci yeri tutub.

Tədbirdə Nazirliyin Aparatında və Nazirlik yanında Dövlət Əmək Müfəttişliyi Xidmətində inzibati vəzifələr üzrə daimi dövlət qulluğuna qəbul edilən ümumilikdə 34 əməkdaş and içib.

Dövlətimizin başçısının yeni Sərəncamı ilə təltif edilən əməkdaşlar da onların fəaliyyətinə verilən yüksək qiymətə görə Prezident İlham Əliyevə minnətdarlıqlarını ifadə edib, bundan sonra da öz vəzifələrinin icrasında əzmlə çalışacaqlarını vurğulayıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.