REGİONLAR
Neftçala Sənaye Məhəlləsində yaradılan balıq yemi zavodunda quş yemi də istehsal olunur
Neftçala, 9 iyul, Mahir Babayev, AZƏRTAC
“Kəhf” MMC-nin Neftçala Sənaye Məhəlləsində yaradılan balıq yemi zavodunda quş yeminin də istehsalına başlanılıb.
Bu barədə AZƏRTAC-ın bölgə müxbirinə müsahibəsində zavodun icraçı direktoru Fərid Səlimov məlumat verib.
Sənaye məhəlləsində ən iri müəssisələrdən olan balıq yemi zavodunda ildə 35 min ton yem istehsal edilir ki, bunun da 25 min tonu balıq, 10 min tonu isə mal-qara yemidir. Cari ilin may ayından zavodda quş yeminin istehsalına da başlanılıb ki, bu da öz növbəsində regionda sənaye üsulu ilə quşçuluğun inkişafına dəstək olmaqla istehsal olunan məhsulların maya dəyərinin aşağı düşməsinə, rəqabət qabiliyyətinin artmasına səbəb olacaq.
Fərid Səlimov bildirib ki, müəssisənin yaradılmasına 12 milyon manat investisiya yönəldilib. İqtisadiyyat Nazirliyinin Sahibkarlığa Kömək Milli Fondunun vəsaiti hesabına müəssisəyə 5,9 milyon manat məbləğində güzəştli kredit ayrılıb. Bundan başqa, müəssisəyə İnvestisiya Təşviqi Sənədi də verilib. Bu da 1,2 milyon manat vəsaitə qənaət etmək imkanı yaradıb.
“Qafqazda ekstruziya emalı texnologiyası ilə işləyən ilk yem istehsalı zavodu olan müəssisəmiz həm də ölkəmizdə balıq yemi istehsalı üzrə ixtisaslaşan ilk yem zavodudur. Burada bütün növ balıqlar üçün yem istehsal etmək imkanımız var. Müəssisə ölkəmizdə balıqçılığın sənaye üsulu ilə inkişafına təkan verəcək. Eləcə də geniş istehlak olunan balıq növləri istehsalının stimullaşdırılması ilə yanaşı, Azərbaycanda daxili su hövzələrində balıqçılığın inkişafı üçün əlverişli şərait yaradacaq. Müasir və keyfiyyətli yemlərdən istifadənin real nəticələri keyfiyyət və kəmiyyət göstəriciləri ilə yanaşı, məhsuldarlığın da bir neçə dəfə artmasına səbəb olacaq. Eyni zamanda, sənaye üsulu ilə nərə balığı, qara kürü, qızıl balığın istehsalı sahələri də öz ixrac potensialından geniş istifadə imkanı əldə edəcək. Balıq məhsullarına tələbatın əsasən daxili istehsal hesabına təmin olunması idxaldan asılılığın azaldılmasına və ixrac imkanlarının genişləndirilməsinə zəmin yaradacaq. Bu baxımdan, ilk növbədə, MDB ölkələrinin bazarlarına çıxış imkanları araşdırılır”, - deyə Fərid Səlimov qeyd edib.
Avropa istehsalı olan müasir avadanlıqların quraşdırıldığı zavodda yüksək ixtisaslı mütəxəssislərlə bərabər 20-dən çox rayon sakini işləyir. Növbəti illərdə isə iş yerlərinin sayının daha da artırılması nəzərdə tutulur.
Qeyd edək ki, Neftçala Sənaye Məhəlləsi Azərbaycan Prezidentinin iştirakı ilə 2017-ci il sentyabrın 24-də açılıb.