REGİONLAR


Neftçalanı içməli su ilə təmin edəcək magistral kəmərin 38 kilometrlik hissəsi inşa olunub

Bakı, 25 sentyabr, AZƏRTAC

Neftçala şəhərini içməli su ilə təmin edəcək magistral kəmərin və anbarın tikintisi işlərinin gedişi ilə tanış olmaq məqsədilə “Azərsu” Açıq Səhmdar Cəmiyyəti (ASC) sədrinin birinci müavini Teyyub Cabbarov, sədr müavini Etibar Məmmədov və Neftçala Rayon İcra Hakimiyyətinin başçısı Mirhəsən Seyidov tikintinin gedişi ilə yerində tanış olublar.

ASC-dən AZƏRTAC-a bildirilib ki, magistral su kəmərinin artıq 38 kilometrlik hissəsi inşa edilib. Hazırda kəmərin Neftçala şəhər şəbəkəsinədək olan 1,5 kilometrlik hissəsi, eyni zamanda, Kür çayı üzərindən keçən hissəsinin tikintisinə hazırlıq görülür.

Layihəyə əsasən, kəmərin Kür çayı ilə kəsişmə nöqtəsində xüsusi konstruksiya quraşıdırlacaq. Bu məqsədlə çayın hər iki sahilində 28 metr hündürlüyündə dəmir-beton dayaqlar quraşdırılacaq və onun üzərində estekada salınacaq. Magistral xətt estakadanın üzəri ilə çəkiləcək.

Qeyd edək ki, kəmərin 17 kilometrlik hazır hissəsində hidravlik sınaq işlərinə də başlanıb. Magistral su kəmərinin tikintisinin cari ilin noyabr ayında başa çatdırılması nəzərdə tutulur. Kəmər tam hidravlik sınaqdan keçirildikdən, yuyulub dezinfeksiya olunduqdan sonra Neftçala şəhər şəbəkəsinə içməli suyun verilməsi təmin olunacaq.

Neftçala şəhərinə özüaxımlı rejimdə suyun verilməsini təmin etmək üçün Salyan şəhərinin yaxınlığında 7500 kubmetr tutumu olan su anbarının inşası da qrafikə uyğun davam etdirilir. İndiyədək anbarın tikintisi üzrə işlərin 60 faizdən çoxu icra edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.