REGİONLAR
Neftçalanın taxıl sahələrində biçin işlərinə 150 kombayn cəlb olunub
Neftçala, 30 may, Mahir Babayev, AZƏRTAC
Neftçalada arpa biçininə üç gündür başlanılıb. Rayonda biçin kampaniyasının vaxtında başa çatdırılmasını təmin etmək, habelə məhsul istehsalçılarına əməli kömək göstərmək məqsədilə bütün zəruri işlər görülüb.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildiriblər ki, ötən ilin payızında cari ilin məhsulu üçün rayonda 43 min 66 hektar sahədə taxıl əkilib. Bunun da 36 min 703 hektarı arpa, 6363 hektarı isə buğda sahəsidir. Ötən il taxıl sahələrindən 112 min 213 ton məhsul götürən fermerlər cari ildə bu nəticəni daha da artırmaq üçün sahələrə aqrotexniki qaydada qulluq göstərib, bitkiyə vaxtında mineral və üzvi gübrələr verib, ziyanvericilərə qarşı qabaqlayıcı tədbirlər görüblər. Nəticədə sahələrdə bol məhsul yetişib.
Artıq üç gündür rayonda taxıl yığımına başlanılıb. Biçinə ilk olaraq rayonun Xəzərkənd, Sarıqamış və Xolqaraqaşlı kəndlərində fəaliyyət göstərən fermerlər başlayıblar. Hazırda sahələrdə 150-yə yaxın taxılbiçən kombayn işləyir. Məhsulun daşınması üçün 200-ə qədər texnika və 75 küləş kipləyən press sahibkarların ixtiyarına verilib. İşin düzgün təşkili nəticəsində qısa müddətdə 1730 hektar sahədə biçin aparılıb və 4 min tondan çox məhsul yığılıb. Biçilmiş sahələrin məhsuldarlığı orta hesabla 24 sentnerə çatır.
Biçin zamanı bütün işlər paralel aparılır. Yığılmış məhsul xırmanlara daşınaraq orada təmizlənir, sonra anbarlara aparılır. Həmçinin biçilmiş sahələrin küləşi preslənərək götürülür, sonra isə şum aparılır.
Təcrübəli taxılçı Mürsəl Qafarov uzun illərdir taxıl əkib-becərir və hər il də yüksək məhsuldarlığa nail olur. “Ötən il əkdiyim 15 hektar taxıl sahəsinin hər hektarından 35 sentner məhsul götürdüm. Bu il isə 16 hektar sahədə taxıl əkmişəm. Bitkiyə yaxşı qulluq etdiyimdən sahəmdə bol məhsul yetişib. Hər il olduğu kimi, bu il də biçinə birinci başlayanlar arasındayam. Qısa vaxta üç hektar sahədə biçin aparmışıq. Hər hektardan orta hesabla 36 sentner məhsul əldə olunub ki, bu da ötən ildəkindən bir sentner çoxdur. İki-üç günə biçini yekunlaşdıracağam”, - deyə fermer bildirib.
Mütəxəssislərin dediyinə görə, bu il rayonda təxminən 115 min tondan çox taxıl istehsalı gözlənilir.
Məhsulun yığılması, daşınması və saxlanması dövründə yanğın hadisələrinin baş verməməsi üçün də təsərrüfatlarda lazımi təhlükəsizlik tədbirləri görülüb, maarifləndirmə işləri aparılıb, təsərrüfat rəhbərlərinə müvafiq tapşırıqlar verilib.
Sahələrdən məhsulun optimal müddətdə və itkisiz yığılması üçün rayon icra hakimiyyətində operativ qərargah yaradılıb. Xidmət təşkilatları, əlaqədar müəssisə rəhbərlərinin də daxil olduğu qərargahda qarşıya çıxan bütün suallara aydınlıq gətirilir, qaldırılan məsələlər operativ həll edilir.