CƏMİYYƏT


Nərimanov rayonunda azərbaycanlı və əcnəbi gənclərlə görüş

Bakı, 7 avqust, AZƏRTAC

Nərimanov Rayon İcra Hakimiyyətinin iclas zalında Bakı Şəhər Gənclər və İdman Baş İdarəsinin və Nərimanov Rayon Gənclər və İdman İdarəsinin birgə təşkilatçılığı ilə 12 avqust - Beynəlxalq Gənclər Günü ərəfəsində azərbaycanlı və əcnəbi gənclərlə görüş keçirilib.

AZƏRTAC xəbər verir ki, görüşdə Bakı Şəhər Gənclər və İdman Baş İdarəsinin rəisi Raqif Abbasov, Nərimanov Rayon Ağsaqqallar Şurasının sədri, Vətən Müharibəsi Qəhrəmanı Azad Hümbətovun atası Arif Hümbətov, Nərimanov Rayon Gənclər və İdman İdarəsinin rəisi Nəcəf Novruzov, Vətən Müharibəsi Qəhrəmanı Zaur Nudirəliyevin qızı Pəri Nudirəliyeva, ali və orta ixtisas təhsil müəssisələrinin sədr və müavinləri, Türkiyə, Nigeriya, Pakistan, Kamerun, Gürcüstan, Çin, Banqladeşin Azərbaycanda təhsil alan əcnəbi tələbələri və fəal gənclər iştirak ediblər.

Tədbirdə çıxış edənlər bildiriblər ki, gənclərin daim inkişafda olmaları, təhsil almaları və vətənpərvərlik ruhunda tərbiyə olunmaları ölkənin tərəqqisinin bariz göstəricisidir. Natiqlər Azərbaycanda həyata keçirilən uğurlu və səmərəli gənclər siyasətindən bəhs ediblər. Diqqətə çatdırılıb ki, ümummilli lider Heydər Əliyevin əsasını qoyduğu dövlət gənclər siyasəti Prezident İlham Əliyev tərəfindən uğurla davam etdirilir. Sosial həyatın bütün sahələrində gənclər əksəriyyət təşkil edir. Təbii ki, bu, Prezident İlham Əliyevin gənc kadrların irəli çəkilməsi ilə bağlı qarşıya qoyduğu vəzifənin reallaşmasının nəticəsidir. Gənclər də öz növbəsində onlara göstərilən etimadı layiqincə doğrultmağa çalışırlar. Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər bütöv və müstəqil Azərbaycan naminə bütün güclərini səfərbər edir, Vətənin inkişafı üçün səylə çalışır, öz siyasətində onlara arxalanan Prezident İlham Əliyevin uğurlu daxili və xarici siyasətini dəstəkləyirlər.

Əcnəbi gənclər tədbir təşkilatçılarına öz minnətdarlığını bildirib, gələcəkdə ölkəmizin tarixi, mədəniyyəti, Azərbaycan həqiqətləri ilə bağlı keçiriləcək tədbirlərdə iştirak etmək arzusunu vurğulayıblar.

Sonda tədbirdə iştirak edən şəhid ailələrinin üzvləri, azərbaycanlı və əcnəbi tələbələr Beynəlxalq Gənclər Günü münasibətilə fəxri fərmanlarla təltif olunublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.