İDMAN
Nərimanov rayonunda şəhid Əlövsət Tahirovun xatirəsinə həsr edilmiş stolüstü tennis turniri keçirilib
Bakı, 29 yanvar, AZƏRTAC
Nərimanov rayonunda 258 nömrəli tam orta məktəbdə şəhid Əlövsət Tahirovun xatirəsinə həsr edilmiş stolüstü tennis üzrə Nərimanov rayon turniri keçirilib.
AZƏRTAC xəbər verir ki, turnirdə 10 komandanın tərkibində 20 nəfər (10 oğlan, 10 qız) mübarizə aparıb.
Yekun nəticələrə görə, 212 nömrəli tam orta məktəbin komandası birinci yeri tutub. İkinci yerə Vətən Müharibəsi Qəhrəmanı Azad Hümbətov adına 291 nömrəli liseyin, üçüncü yerə isə və 258 nömrəli tam orta məktəbin komandaları sahib olublar.
Turnirin mükafatlandırma mərasimində çıxış edən Nərimanov Rayon Gənclər və İdman İdarəsinin rəisi Nəcəf Novruzov və 258 nömrəli tam orta məktəbin direktoru Sədaqət Hüseynova bildiriblər ki, 2020-ci il sentyabrın 27-də Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq Azərbaycan Ordusu sonradan “Dəmir yumruq” adlandırılan əks-hücum əməliyyatına başlayıb. Qırx dörd gün davam edən Vətən müharibəsi otuzillik işğala son qoyulması və ərazi bütövlüyümüzün bərpası ilə nəticələnib. Qeyd edilib ki, Prezident, Müzəffər Ali Baş Komandan İlham Əliyevin rəhbərliyi ilə qazanılmış möhtəşəm Zəfər tariximizə qızıl hərflərlə yazılıb.
Sonra çıxış edən Əlövsət Tahirovun anası Qüdrət Tahirova və qardaşı Vüqar Tahirov şəhidlə bağlı xatirələrini bölüşüblər.
Sonda qaliblər Nərimanov Rayon Gənclər və İdman İdarəsi tərəfindən müvafiq dərəcəli diplom və medallarla təltif olunublar. Şəhidin anasına isə xatirə diplomu və Azərbaycan Respublikasının Dövlət Bayrağı təqdim edilib.