Bakı, 13 sentyabr, AZƏRTAC

Nəsimi Rayon İcra Hakimiyyəti başçısının yanında şuranın geniş tərkibli iclasında rayonda 2017/2018-ci tədris ilinin yekunları və yeni tədris ilinə hazırlığın vəziyyəti müzakirə olunub.

Rayon icra hakimiyyətindən AZƏRTAC-a bildirilib ki, bu rayonda təhsilin səviyyəsi, orta məktəblərdə şagirdlərin normal təhsili üçün hər cür şəraitin yaradılması, təhsil müəssisələrinin maddi-texniki bazalarının vəziyyəti hər zaman diqqət mərkəzində olub. Rayonda 8 ali, 26 tam orta, 2 xüsusi məktəb, 2 musiqi məktəbi və 33 məktəbəqədər təhsil müəssisəsi fəaliyyət göstərir. 2017/2018-ci tədris ilində rayonun orta məktəblərini bitirən 1561 şagirddən 1083-ü tələbə adını qazanıb. Qəbul imtahanlarında abituriyentlərdən 191-i 500-dən, 73-ü 600-dən, 23-ü 650-dən çox, 2-si isə 700 bal toplayıb. Məzunlardan 261-i xarici ölkələrin müxtəlif ali məktəblərinə qəbul olunub.

Tədbirdə rayon icra hakimiyyətinin başçısı Asif Əsgərov bildirib ki, ümummilli lider Heydər Əliyevin ötən əsrin 70-ci illərində əsasını qoyduğu təhsil strategiyası ölkəmizdə milli köklərə bağlı, yeni təfəkkürlü və təhsilli gənc kadrların yetişdirilməsinə hesablanıb. Təhsilin millətin taleyi üçün misilsiz əhəmiyyət daşıdığını həmişə vurğulayan Ulu Öndər fəaliyyəti illərində bu sahəyə böyük diqqət və qayğı göstərib. Onun respublikaya rəhbərlik etdiyi illərdə keçmiş SSRİ-nin nüfuzlu ali təhsil ocaqlarına göndərdiyi gənclər əldə etdikləri bilik və bacarıq, zəngin mənəvi kapital sayəsində respublikamızın təhsil, incəsənət, mədəniyyət və bir çox digər sahələr üzrə böyük inkişafın əsasını qoyublar.

Diqqətə çatdırılıb ki, bu gün elm və təhsil quruculuğunda müasir dövrün çağırışları nəzərə alınır, Prezident İlham Əliyevin müəyyənləşdirdiyi “Maddi dəyərlərin, iqtisadi potensialın insan kapitalına çevrilməsi” prinsipi ardıcıl həyata keçirilir. Son illər ölkədə yeni məktəb binalarının tikintisi və köhnələrinin əsaslı təmiri böyük vüsət alıb. Tədris prosesində gənclərimiz ən qabaqcıl texnologiyalardan, distant təhsil imkanlarından istifadə edirlər. Ümumtəhsil məktəblərini bitirən gənclər ali, ali hərbi və orta ixtisas məktəblərinə qəbul zamanı yüksək nəticələr göstərir, ixtisaslı kadr kimi yetişərək ölkəmizin inkişafında, həyata keçirilən quruculuq tədbirlərində yaxından iştirak edirlər. Azərbaycan Respublikasının Birinci vitse-prezidenti Mehriban Əliyevanın çoxşaxəli fəaliyyətində təhsil sisteminin qabaqcıl dünya standartları əsasında təkmilləşdirilməsi xüsusi yer tutur. 2005-ci ildən etibarən Heydər Əliyev Fondunun dəstəyi ilə ölkəmizin müxtəlif bölgələrində təhsil və səhiyyə ocaqlarının bərpası və yeniləri ilə əvəzlənməsi müasir Azərbaycanın inkişaf tarixində parlaq səhifədir.

Qəbul imtahanlarında 696 bal toplamış Mirtalıbova Röya qeyd edib ki, bu gün ölkəmizdə gənclərin yaxşı təhsil almaları, vətənpərvər böyümələri üçün hər cür şərait yaradılıb. Təhsil quruculuğu sahəsində görülən işlərin nəticəsidir ki, Azərbaycan gəncləri savadlı, geniş dünyagörüşlü, fiziki cəhətdən sağlam və əsl vətənpərvərlər kimi formalaşırlar. Təhsil müəssisələrinin maddi-texniki bazasının möhkəmləndirilməsi, məktəblərimizin müasir informasiya texnologiyaları, dərslik və bədii ədəbiyyatlarla zənginləşdirilməsi gənclərin daha yaxşı təhsil almalarına imkan verir. Bu il də tam orta təhsili xüsusi nailiyyətlərlə başa vuran bir qrup məzun qızıl və gümüş medallarla təltif olunub.

Texniki Humanitar Liseyin direktoru Səidə Zeynalova diqqətə çatdırıb ki, bu gün ölkəmizdə davamlı inkişaf və sabitliklə yanaşı, həm də sağlam mənəvi mühit formalaşıb. Məktəblilər milli ruhda tərbiyə olunur, hərtərəfli təhsil alır, yüksək diqqət və qayğı əhatəsində əsl vətəndaş kimi yetişirlər. Hər bir valideyn fəxr edir ki, övladı ən müasir şəraiti olan məktəblərdə təhsil alır. Övladlarımız milli dəyərlərimizə, adət-ənənələrimizə, tariximizə hörmətlə yanaşan, yüksək intellektual səviyyəyə malik vətənpərvər gənclər kimi yetişirlər. Prezident İlham Əliyevin yüksək bal toplayan tələbələrə xüsusi təqaüd ayırması onları daha yaxşı oxumağa ruhlandırır, biz təhsil işçilərinin isə ölkəmizin gələcəyinə cavabdehlik hissini daha da artırır.

Müəllimlər, məzunlar və onların valideynləri təhsil müəssisələrində yaradılan şəraitə və təhsil sahəsinə göstərdikləri diqqət və qayğıya görə Prezidenti İlham Əliyevə və Azərbaycanın Birinci vitse-prezidenti Mehriban xanım Əliyevaya minnətdarlıqlarını bildiriblər.

Qəbul imtahanlarında yüksək nəticələr göstərmiş məzunlar mükafatlandırılıb, rayon ərazisində yaşayan və sosial qayğıya ehtiyacı olan 500 şagirdə məktəbli forması təqdim edilib.