MƏDƏNİYYƏT
Nəvai Dövlət Pedaqoji İnstitutunda özbəkcə nəşr olunmuş “Qarabağdan doğan günəş: Xurşidbanu Natəvan” kitabının təqdimatı olub VİDEO
Bakı, 25 oktyabr, AZƏRTAC
Özbəkistandakı Heydər Əliyev adına Azərbaycan Mədəniyyət Mərkəzinin təşkilatçılığı, iki ölkənin Mədəniyyət nazirlikləri, Azərbaycan Milli Məclisinin Mədəniyyət komitəsi və Azərbaycanın Özbəkistandakı səfirliyinin dəstəyi ilə keçirilən “Azərbaycan mədəniyyəti və ədəbiyyatı günləri” çərçivəsində Özbək dilinə tərcümə və nəşr olunmuş "Qarabağdan doğan Günəş: Xurşidbanu Natəvan" adlı kitabının Özbəkistanda təqdimat və imza mərasimi keçirilib.
Özbəkistandakı Heydər Əliyev adına Azərbaycan Mədəniyyət Mərkəzindən AZƏRTAC-a verilən məlumata görə, Milli Məclisin deputatı Qənirə Paşayeva, Bakıdan gələn digər qonaqlar, Özbəkistanın ədəbiyyat, mədəniyyət və incəsənət xadimləri, ali məktəblərin professor-müəllim heyəti, tələbələr, jurnalistlər iştirak ediblər.
Əvvəlcə qonaqlar institutun nəzdində fəaliyyət göstərən “Repressiya qurbanları muzeyi” ilə tanış olublar.
Muzey kolleksiyasında 2000-ə yaxın eksponat, o cümlədən kitablar, orijinal arxiv sənədləri, repressiyaya məruz qalan həmvətənlərimizin məlumat və fotoşəkilləri və bir çox başqa eksponatlar əks olunub. Doqquz sərgi salonunda təqdim olunan materiallar tarixi, elmi, praktiki və mənəvi baxımdan unikaldır, eksponatlar isə ölkəmizin tarixinin təxminən 150 illik zaman kəsiyindən bəhs edir.
Sonra institutun konfrans zalında "Qarabağdan doğan Günəş: Xurşidbanu Natəvan" kitabının təqdimatı olub.
Qənirə Paşayevanın həmmüəllifi olduğu kitabda şairənin şeirləri əks olunub.
Giriş sözü ilə çıxış edən Nəvai Dövlət Pedaqoji İnstitutunun prorektoru İlham Nəsridinov qonaqları salamlayaraq, Özbək və Azərbaycan xalqlarının qardaşlıq münasibətlərinin tarixi haqqında danışıb, xalqlarımızın soykökləri, dili, dini, mədəniyyətinin yaxınlığı, dövlətlərimiz arasında yüksək səviyyəli əməkdaşlığın olduğunu qeyd edib.
O, ədəbi əlaqələrimizdən danışaraq, Azərbaycanın Qarabağ bölgəsinin tanınmış şairəsi olan Xurşidbanu Natəvana həsr olunmuş tədbirdə şairənin özbək dilində şeirlər kitabının nəşrini yüksək qiymətləndirib, nəşrin özbək oxuculara gözəl hədiyyə olduğunu bildirib.
Azərbaycan Mədəniyyət Mərkəzinin direktoru Samir Abbasov 2022-ci ilin Azərbaycan Respublikasının Prezidenti İlham Əliyev tərəfindən “Şuşa İli” elan olunduğunu və bu münasibətlə Azərbaycanda, habelə dünyada çoxsaylı tədbirlərin, layihələrin reallaşdırıldığını qeyd edib. O, mədəniyyət paytaxtımız Şuşanın Azərbaycan mədəniyyətinə çoxsaylı şairlər, musiqiçilər, tanınmış şəxsiyyətlər bəxş etdiyini, burada şairlər məclislərinin, musiqi festivallarının təşkil olunduğunu vurğulayıb. Samir Abbasov Vətən müharibəsi və 30 ilə yaxın Ermənistan işğalında qalan Şuşaya dəyən ziyan, şəhərin, habelə tarixi abidələrin dağıdılması barədə danışıb.
Pedaqoji İnstitutun Tarix fakültəsinin dekanı, “Repressiya qurbanları muzeyi”nin direktoru Xurşid Qurbanov Azərbaycanla Özbəkistan arasında tarixi əlaqələr, böyük İpək yolunun üzərində yerləşən xalqlarımızın dostluq və əməkdaşlığı haqqında danışaraq, türk yurdu, Azərbaycanın qədim bölgəsi Qarabağın işğaldan azad edilməsi, Şuşanın Azərbaycan mədəniyyət paytaxtı elan edilməsini tarixi hadisə kimi dəyərləndirib.
Azərbaycan Milli Məclisin Mədəniyyət komitəsinin sədri Qənirə Paşayeva Ermənistanın Azərbaycan torpaqlarını 30 ilə yaxın bir dövrdə işğalda saxlaması, işğal zamanı bölgədə bütün infrastrukturun məhv edilməsi ilə yanaşı, xalqımızın mədəniyyətinə, elminə də böyük zərbə vurulduğunu qeyd edib. O, Qarabağ xanının qızı Xurşidbanu Natəvan şəxsiyyəti, onun yaradıcılığı haqqında danışaraq, onun şairəlik, rəssamlıq və xeyriyyəçilik fəaliyyəti haqqında fikirlərini bölüşüb. Qənirə Paşayeva bu il Azərbaycanda Qarabağın tanınmış şairəsi, xüsusi istedada malik xan qızı Xurşidbanu Natəvanın anadan olmasının 190 illiyinin geniş qeyd olunduğunu vurğulayıb və diktor Faiq Ələkbərli ilə birgə yazmış olduğu kitabın əhəmiyyətindən danışıb.
Şuşa şəhəri başda olmaqla, Qarabağın təkcə Azərbaycana deyil, bütövlükdə türk dünyasına görkəmli şəxsiyyətlər bəxş etdiyini söyləyən deputat, bu kitabın özbəkcəyə uyğunlaşdırılmasını və ilk təqdimatının da Özbəkistanda keçirilməsini mühüm hadisə kimi qiymətləndirib, təşkilatçılara minnətdarlığını bildirib.
Sonda Qənirə Paşayeva həmmüəllifi olduğu "Qarabağdan doğan günəş: Xurşidbanu Natəvan" kitabının oxucular üçün imza mərasimi keçirilib.
Nəşrə maraq böyük olub, kitab özbək tələbələrə hədiyyə edilib.