DÜNYA


“Nissan” şirkətinin sabiq rəhbəri həbs edilməsinin səbəbini eşitmək üçün məhkəməyə gələcək

Tokio, 4 yanvar, AZƏRTAC

“Nissan” şirkətinin sabiq rəhbəri Karlos Qon həbs edilməsinin səbəbini eşitmək üçün yanvarın 8-də şəxsən Tokio dairə məhkəməsinə gələcək.

AZƏRTAC xəbər verir ki, bu barədə Kyodo agentliyi məlumat yayıb. Məlumatda qeyd edilir ki, bu barədə sorğu K.Qonun vəkilləri tərəfindən Tokio dairə məhkəməsinə göndərilib. Qanuna əsasən, məhkəmə belə sorğu daxil olduqdan sonra beş gün ərzində açıq dinləmə keçirməlidir.

Dinləmə yerli vaxtla saat 10:30-da başlamalıdır. Müdafiənin nümayəndələrinin bildirdiyinə görə, K.Qon şəxsən məhkəmədə iştirak etmək niyyətindədir.

Xatırladaq ki, dekabrın 31-də Tokio dairə məhkəməsi K.Qonun həbsdə saxlanmasının müddətini daha 10 gün – yanvarın 11-dək uzadıb.

K.Qon və onun yaxın köməkçisi Qreq Kelli noyabrın 19-da həbs olunublar. Həbsin səbəbi kimi, K.Qonun Q.Kellinin köməyi ilə öz gəlirlərini bəyan etməməsi göstərilir. 2010-2017-ci illərdə bəyan edilməmiş məbləğin 8 milyard yen (təqribən 71 milyon dollar) təşkil etdiyi bildirilir. K.Qon təkidlə bildirir ki, onun gəlirlərini gizlətmək niyyəti olmayıb.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.