MƏDƏNİYYƏT


Norveçli diplomat Azərbaycan xalçalarına heyran olub

Bakı, 2 noyabr, AZƏRTAC

Norveç Krallığının Azərbaycandakı səfirliyinin müvəqqəti işlər vəkili Olav Nils Thue “Azərxalça” Açıq Səhmdar Cəmiyyətinin (ASC) Xaçmaz filialı ilə tanış olub.

“Azərxalça” ASC-dən AZƏRTAC-a bildirilib ki, qonağın diqqətinə qurumun ölkəmizdə fəaliyyət göstərən 11 xalça istehsalı emalatxanasından biri olan filialının bu ilin mayında Prezident İlham Əliyevin iştirakı ilə istifadəyə verildiyi və burada indiyədək 100-dən çox xalçanın toxunduğu çatdırılıb.

Qeyd edilib ki, filialda 150 nəfər toxucunun, 14 nəfər inzibati-təsərrüfat işçisinin fəaliyyət göstərməsi üçün müasir iş şəraiti yaradılıb. Bina toxuculuq emalatxanası, rəssam otağı, yeməkxana, tibb otağı, xalça-satış salonu və sair bölmələrdən ibarətdir. Emalatxanada müxtəlif ölçülü 43 dəzgahda xalça toxunur. Burada əsasən Quba qrupu Azərbaycan xalçalarının toxunmasına üstünlük verilir.

Bildirilib ki, etnoqrafik cəhətdən çox zəngin olan bu bölgə qədim xalçaçılıq ənənələrinin yarandığı və inkişaf etdiyi bölgələrdəndir. Burada ayrı-ayrı kəndlərdə xalçaçılıq sənəti uğurla davam etdirilib, nəsildən-nəslə ötürülüb. Tarixən dünya alimlərinin, səyyahların diqqətini cəlb etmiş Quba xalçaları dünyanın məşhur muzeylərində, şəxsi kolleksiyalarda saxlanılır. Quba qrupu xalçaları üzərində öz əksini tapan müxtəlif naxışlar yerli əhalinin dünyagörüşünün, inanclarının təzahürü, bu yurdun tarixi keçmişinin yadigarıdır. Azərbaycan xalçalarının bütün qrupları üçün səciyyəvi olan ağ, qara, qırmızı, sürməyi, mor, sarı, mavi, yaşıl və s. kimi rənglərin Quba qrupu xalçalarında yaratdığı rəng ahəngi onlara təkrarsız gözəllik bəxş edir.

“Azərxalça”nın rəssamları belə qədim çeşniləri bərpa edirlər. Toxucular isə həmin çeşnilər əsasında orijinal və gözəl xalçalar toxuyurlar.

Olav Nils Thue Xaçmaz filialında toxunan xalçalara heyranlığını bildirib. Müvəqqəti işlər vəkili dövlət səviyyəsində xalçaçılığa göstərilən diqqətin təqdirəlayiq olduğunu qeyd edib.

Norveçli diplomat Azərbaycan xalçalarının dünyaya ixracı ilə də maraqlanıb.

Məlumat verilib ki, “Azərxalça” ASC müxtəlif ölkələrin bu sahə üzrə ixtisaslaşmış şirkətləri ilə danışıqlar aparır. Yaxın zamanlarda Azərbaycan xalçaları ABŞ, Yaponiya, Rusiya və Avropa ölkələrinə ixrac olunacaq.

Olav Nils Thue keyfiyyətli Azərbaycan xalçalarına ölkəsində də ciddi tələbatın olacağına əminliyini ifadə edib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.