CƏMİYYƏT
“Notariat haqqında” Qanuna edilmiş dəyişikliklərlə bağlı onlayn brifinq keçirilib
Bakı, 5 mart, AZƏRTAC
Vətəndaşların ədliyyə orqanlarına əlçatanlığının təmin olunması, əhalinin ədliyyə fəaliyyəti barədə məlumatlandırılması məqsədilə vətəndaş cəmiyyəti nümayəndələrinin, KİV-lərin, eləcə də Ədliyyə Nazirliyinin rəsmi saytlarının və sosial şəbəkələrdəki səhifələrinin imkanlarından geniş istifadə olunur. Bu baxımdan xüsusi karantin rejimi dövründə nazirliyin rəsmi “Facebook” səhifəsində ədliyyənin ayrı-ayrı fəaliyyət istiqamətləri üzrə canlı yayımların keçirilməsi də əhalinin hüquqi maarifləndirilməsi işində mühüm rol oynayır.
AZƏRTAC xəbər verir ki, bu istiqamətdə həyata keçirilən tədbirlər çərçivəsində martın 5-də Ədliyyə Nazirliyi tərəfindən “Notariat haqqında” Qanuna edilmiş dəyişikliklər” mövzusunda onlayn qaydada brifinq təşkil olunub.
Brifinqdə iştirak edən Azərbaycan Notariat Palatası İdarə Heyətinin sədri, 2 saylı Bakı “ASAN xidmət” mərkəzində xüsusi notarius Hüseyn Məmmədov, nazirliyin Qeydiyyat və notariat baş idarəsi Dövlət reyestrləri idarəsinin rəisi Seymur İsmayılov notariat fəaliyyətinin cəmiyyətdəki rolundan, hazırkı vəziyyətindən, notariat hərəkətləri üzrə müvafiq dövlət rüsumlarından, eləcə də qanunvericilikdə edilən son dəyişikliklər haqqında məlumat veriblər.
Bildirilib ki, pandemiya dövründə nazirlik tərəfindən müasir innovasiyalardan və informasiya-kommunikasiya vasitələrindən istifadə edilməklə bütün fəaliyyət istiqamətləri üzrə vətəndaşlara hüquqi yardım göstərilir. Bütün bunlar vətəndaşlıq məmnunluğunu təmin etmək və əhaliyə layiqincə ədliyyə xidməti göstərmək məqsədi daşıyır.
Diqqətə çatdırılıb ki, notariat fəaliyyətinin təkmilləşdirilməsində qanunvericiliyin, elektron xidmətlərin və notariat xidmətlərinin təkmilləşdirilməsi, notariat korpusunun peşəkarlığının artırılması mühüm əhəmiyyət kəsb edir. Bu istiqamətlərdə yeniliklər notariat xidmətinin səmərəliliyinin və vətəndaş məmnunluğunun artmasına şərait yaradır. Notariat fəaliyyəti ilə bağlı qanunvericilikdə edilən son dəyişikliklər məhz bu məqsədə xidmət edir. “Notariat haqqında” və “Dövlət rüsumu haqqında” qanunlara edilən müvafiq dəyişikliklər fevralın 27-də Prezident İlham Əliyev tərəfindən təsdiqlənib və martın 1-dən qüvvəyə minib.
Vurğulanıb ki, bu gün ədliyyə sahəsində elektron xidmətlərin tətbiqinə xüsusi diqqət göstərilir. Elektron notariatın inkişafı bu xidmət sahəsində yeni imkanlar açıb. Notariat sahəsində də informasiya texnologiyaları tətbiq olunur. Bu sahədə “Elektron notariat” informasiya sistemi ən vacib informasiya sistemlərindən birinə çevrilib. “Mobil notariat”, mobil səyyar xidmət çantaları vasitələri ilə notariat xidmətlərinin göstərilməsi elektron qaydada sənədlərin rəsmiləşdirilməsi imkanı yaradır və bu da elektron xidmətlərin inkişafını bir daha göstərir. Tətbiq olunan yeniliklər vətəndaşlara daha çevik və keyfiyyəti notariat xidmətlərin göstərilməsini təmin edir.
Bundan başqa, notarius korpusu yenilənir, notarius ofislərində fəaliyyət göstərən əməkdaşlar üçün müvafiq layihələr həyata keçirilir. İndiyədək notarius korpusu 60 faiz yenilənib.
Məlumat verilib ki, sənədlərin notarial təsdiqi vətəndaşların ən çox istifadə etdiyi xidmətlərdən biridir və qanunvericilikdə edilən müvafiq dəyişikliklər əsasən bu sahədə sənədlərin sürətlərinin düzgünlüyü ilə bağlıdır. Həmin dəyişikliklərə əsasən notariat hərəkətlərinin aparılması üçün müraciət etmiş şəxsə verilməsi nəzərdə tutulmayan, o cümlədən notariat işinə əlavə edilməsi məqsədi ilə sənədlərin surətlərinin təsdiqinə, habelə digər notariat hərəkətinin aparılması çərçivəsində elektron informasiya sistemləri və ya ehtiyatları vasitəsilə əldə edilmiş məlumat və ya sənədlərin surətinin kağız daşıyıcısına keçirilərək təsdiqinə görə dövlət rüsumu və ya haqq, habelə notariat hərəkətləri ilə əlaqədar göstərilən xidmətə görə haqq tutulmur.
Dəyişikliklə sənədlərin sürətinin təsdiqi üçün xərclər də azalıb. “Dövlət rüsumu haqqında” qanuna son dəyişikliklərə əsasən sənədlərin və onların tərcüməsinin təsdiqində yeni rüsumlar müəyyənləşdirilib. Belə ki, “Notariat haqqında” qanunda edilən dəyişikliklərdən əvvəl notariatda sənədlərin surətinin təsdiqi üçün beş manat məbləğində pul ödənilməli idi. Son dəyişiklikliyə əsasən isə bir sənədin notariat təsdiqi üçün nəzərdə tutulan xidmət haqqının ümumi məbləği hazırda üç manatdır.
Qeyd edilib ki, hazırda notariat sahəsində innovativ həllər tətbiq olunur. Vətəndaşların məmnunluqlarını təmin etmək üçün notariat ofislərində elektron köşklər yerləşdirilib. Bütün bunlar hüquq və fiziki şəxslərə keyfiyyətli xidmətin göstərilməsi üçün nəzərdə tutulub.
Onlayn tədbirdə, həmçinin notariat sahəsində yeni texnologiyaların tətbiqi, daşınmaz əmlak və sair məsələlərlə bağlı sosial şəbəkə istifadəçilərinin sualları cavablandırılıb.