Naxçıvan, 19 mart, Rauf Kəngərli, AZƏRTAC

Novruz bayramı bu il də Naxçıvan Muxtar Respublikasında əmin-amanlıq və iqtisadi yüksəliş şəraitində qeyd olunur.

Muxtar respublikanın hər yerində olduğu kimi, Şərur rayonunda da bayrama hərtərəfli hazırlıq işləri görülüb. Rayon ictimaiyyəti Şərur şəhərinin Heydər Əliyev prospektindəki meydanda baharın gəlişini təmtəraqla qeyd edib.

Bayramsayağı bəzədilmiş meydanda rayon mədəniyyət və turizm şöbəsinin musiqi kollektivlərinin hazırladığı əyləncəli və rəngarəng proqramlar bayram şənliyinə toplaşanların alqışları ilə qarşılanıb. Novruz tonqalının ətrafında rəqs edənlərin, “Yallı” ifa edənlərin, halay tutanların çıxışları, əllərində baharın rəmzi olan səməni tutmuş qızların meydan boyu hərəkətləri, Keçəl və Kosanın Novruz əhval-ruhiyyəli məzəli hərəkətləri və zarafatları tədbirə xoş ovqat bəxş edib.

“Arpaçay” instrumental ansamblının müşayiəti ilə müğənnilər Novruzu, baharı vəsf edən nəğmələr və xalq mahnıları, aşıqlar saz havaları oxuyublar. Şərur Rayon Mədəniyyət Sarayının qarşısındakı meydanda isə uşaq musiqi məktəblərinin şagirdləri istedadlarını nümayiş etdiriblər.

Azərbaycanı beynəlxalq xalq yaradıcılığı festivallarında məharətlə təmsil edən və Şərura həmişə yüksək mükafatlarla qayıdan “Şərur” və “Şərur qönçələri” yallı kollektivləri ifa etdikləri xalq rəqsləri ilə şənliyi daha da rövnəqləndiriblər. Faytonda meydana daxil olan Bahar qız tədbir iştirakçılarını baharı vəsf edən nəğmə ilə salamlayıb.

Şənlikdə arzular, diləklər də bildirilib, Dədə Qorqudun müdrik kəlamları səsləndirilib: “Torpağımız bərəkətli olsun, tonqallarımız heç vaxt sönməsin!”

Rayon ziyalısı Vidadi Süleymanov bizimlə söhbətdə bildirdi ki, Şərur bu gün özünün yeni inkişaf mərhələsinə qədəm qoyub. İnsanların bayramı yüksək əhval-ruhiyyə ilə qeyd etmələri də bununla əlaqədardır. Bu qədim yurd yeri bu gün hərtərəfli qayğı ilə əhatə olunub. İqtisadiyyat inkişaf etdirilir, yeni emal və sənaye müəssisələri yaradılır, quruculuq tədbirlərinin həcmi gündən-günə artır. Odur ki, Şərur hər il daha da gözəlləşir, insanların rifah halı yaxşılaşır. Bütün bunlar şərurluların qurub-yaratmaq əzminə öz təsirini göstərir. Rayon sakinləri Şərurun daha da çiçəklənməsi naminə müxtəlif sahələrdə qazandıqları uğurları artırırlar.

Muğanlı kənd sakini Vasif Məmmədov qeyd etdi ki, Şərur müasir Azərbaycan rayonunun canlı nümunəsidir. Bu, muxtar respublikada həyata keçirilən uğurlu quruculuq siyasətinin nəticəsidir. Şərur rayonunda da hər il müxtəlif təyinatlı obyektlərin açılışları olur. Yeni iş yerləri yaradılır. Ona görə də şərurluların bütün bayramları belə şən ovqatda qeyd etmələri təbiidir.

Ümumiyyətlə, Novruz şənlikləri Şərur rayonunda da xalqımızın birliyinin, yenilməzliyinin, məğrurluğunun, keçmişimizə sadiqliyinin, gələcəyə böyük inamının rəmzi kimi əsl bayram əhval-ruhiyyəsi, sevinc və şadlıqla qeyd edilib. Bayram münasibətilə keçirilən ümumrayon şənliyi yüksək səviyyədə təşkili ilə yadda qalıb, hər kəs bu tədbirdən xoş təəssüratlarla, sevinc hissləri ilə ayrılıb.

X X X

Bayram münasibətilə Babək rayonunda da şənlik keçirilib. Rayon mərkəzində təşkil edilən tədbirin aparıcıları babəkliləri Novruz bayramı münasibətilə təbrik edərək bildiriblər ki, qədim tarixə malik Novruz bayramı hər il xalqımız tərəfindən böyük təntənə ilə qeyd olunur. Novruz bayramı təzə ili, baharın ilk gününü qarşılamaq deməkdir. Böyük mənəvi gücə malik Novruz bayramı ulu əcdadlarımızın bizə əmanət etdiyi ən gözəl yadigardır. Bu bayram Azərbaycan xalqının milli ruhunu, onun daxili aləmini bütün zənginliyi ilə yaşadır. Qoy, bu Novruz elimizə-obamıza əmin-amanlıq gətirsin, süfrələrimizin bərəkətini artırsın, həmrəyliyimizi əbədi etsin.

Bayram tonqalı alovlandırıldıqdan sonra Novruzu vəsf edən mahnılar oxunub, xalq mahnıları, aşıq havaları səsləndirilib. Babək Rayon Mədəniyyət və Turizm Şöbəsinin musiqi kollektivlərinin hazırladıqları konsert proqramı tədbir iştirakçılarında xoş ovqat yaradıb. Xalq çalğı alətləri, nağara və saz ansambllarının ifaları, rayon Mədəniyyət Evinin “Yallı” qrupunun təqdim etdikləri rəqslər şənlik iştirakçıları tərəfindən alqışlarla qarşılanıb. Tədbirdə müxtəlif milli oyunlar, qədim məişət əşyaları, milli mətbəximizin nümunələri və şirniyyatlar, adət-ənənələrimiz, folklorumuz nümayiş etdirilib. Həmçinin tədbirdə yun darama, cəhrədə yun əyirmə, xalçatoxuma, kirkirədə qovut çəkmə, daşda ət döymə və sair kimi qədim el nümunələrimiz də ictimaiyyətin nümayəndələri tərəfindən maraqla izlənilib.

Bayram tədbirində bir neçə babəkli ilə görüşüb həmsöhbət olduq. Nehrəm kəndindən gəlmiş Akif Hacıyev dedi ki, Novruz milli dəyərləri, qədim keçmişimizi özündə yaşadan və hər bir azərbaycanlı üçün əziz bayramdır. Ulu əcdadlarımızdan bizə yadigar qalan bu bayramda xonçalar bəzənir, səmənilər qoyulur, küsülülər barışır, süfrələrimizi müxtəlif milli yeməklər bəzəyir. Bu bayramı bütün başqa bayramlardan fərqləndirən cəhət bundan ibarətdir.

Qahab kənd sakini Əmrah Rzayev bildirdi ki, bu bayram bizim milli bayramımız olmaqla bərabər, həm də bütün dünyada ən qədim bayramlardandır. Babəklilər hər zaman bu bayramı böyük sevinclə qeyd ediblər. Novruzun dövlət səviyyəsində qeyd olunması bizi daha da qürurlandırır. Bu qürurun digər səbəbi isə budur ki, ildən-ilə dövlətimizin gücü daha da artır. Hər yerdə genişmiqyaslı quruculuq, abadlıq işləri aparılır, kəndlərimiz öz simasını dəyişir. Elə bunun özü də bir bayram sevincidir. Novruz bayramı isə bu sevincimizi ikiqat artırır.

X X X

Ordubad rayonunda da qədim el bayramı münasibətilə şənlik keçirilib. Rayon mərkəzində təşkil edilən bayram şənliyində çıxış edən aparıcılar bildiriblər ki, əsrlərin sınağından çıxaraq milli dəyərlərimizi özündə yaşadan Novruz qədimdən bəri insanlar arasında həmrəylik, mərhəmət və mehribanlıq duyğularının təməli olub. Azərbaycanda milli bayram kimi hər il yüksək səviyyədə qeyd olunan Novruz xalqın müqəddəs ənənələrinə söykənməklə, özündə böyük bədii-estetik, mənəvi-əxlaqi, ülvi və dünyəvi duyğuları təcəssüm etdirir.

Tədbirdə iştirak edənlərə xeyir-dua vermək üçün el ağsaqqalı Dədə Qorqud meydana gəlib, öz xeyir-duasını verib. Xalqımıza əmin-amanlıq, xoş günlər arzulayıb.

Sonra bayram tonqalı yandırılıb. Tonqal ətrafında milli rəqslərimiz ifa edilib, Novruza aid şeirlər söylənilib. Rayonun mədəniyyət evlərinin folklor qruplarının çıxışları alqışlarla qarşılanıb.

“Xanbəzəmə” oyun-tamaşası Ordubadda hər il keçirilən Novruz şənliklərində təqdim olunan əsas ənənələrdəndir. Bu il də bu ənənəyə sadiq qalınıb. Kosa ilə Keçəl də şənliyə dəvət ediliblər. Onların təqdim etdikləri kompozisiya tədbir iştirakçılarında yüksək ovqat yaradıb. Qoçların döyüşü də maraqla qarşılanıb.

Tədbirdə rayon Mədəniyyət Evinin “Dübəndi” instrumental ansamblı üzvlərinin ifasında Novruza, yazın gəlişinə həsr olunan mahnılar səsləndirilib.

Bayram tədbirində iştirak edən rayon sakinləri ilə həmsöhbət olduq. Hüsniyyə Mərdanova dedi ki, Novruzun gəlişi hər il el-obamızda əsl şənliyə çevrilir. Ulu babalarımızın əsrlərlə yaşatdığı bu bayram ölkəmizin hər yerində olduğu kimi, Ordubadda da böyük sevinc hissi ilə qeyd olunur. Hələ keçmiş SSRİ dövründə Novruz bayramının keçirilməsinə icazə verilmədiyi vaxtda bu bölgədə bayram hər kəs tərəfindən böyük sevinclə qeyd edilib.

Telli Bağırova bildirdi ki, Novruz bizim ən əziz bayramımızdır. Bu bayramda küsülülər barışır, böyüklərimiz ziyarət olunur, qohum-əqrəba bir-birinə bayramlaşmağa gedir. Bu bayramla bağlı çox sayda adət-ənənələr mövcuddur ki, bu ənənələr bu gün də böyük ehtiramla qorunur və yaşadılır.

Rayon ziyalılarından Abbas Tağıyev və Behbud Hüseynov qeyd etdilər ki, muxtar respublikamızın hərtərəfli inkişaf və tərəqqisi bağlar diyarı olan Ordubada da yeni həyat bəxş edib. Həm rayon mərkəzində, həm də kənd yaşayış məntəqələrində aparılan kompleks quruculuq tədbirləri Ordubadın simasını tamamilə dəyişib, onu müasir rayona çevirib. Bu da Novruz şənliklərinin daha yüksək əhval-ruhiyyədə keçirilməsinə imkan verib.

X X X

Əsrlərin sınağından çıxmış milli dəyərlərimizi, adət-ənənələrimizi özündə yaşadan Novruz bayramı Culfa rayonunda da qeyd edilib. Tədbirin aparıcıları vurğulayıblar ki, Novruz hər bir azərbaycanlı üçün əziz olan, milli adət və ənənələrimizi yaşadıb dövrümüzə gətirib çıxaran, eləcə də bu gün bizi birləşdirən, daha da həmrəy edən bayramdır.

Ulu Dədə Qorqudun müdrik kəlamları, alqış və xeyir-duası ilə başlanan şənlikdə qılınc-qalxanlı cəngavərin keşiyini çəkdiyi tonqal alovlandırılıb, xalq yaradıcılığı nümunələri sərgilənib.

Bahar qız, Kosa və Keçəlin iştirakı və duzlu-məzəli zarafatları ilə keçən bayram tədbirini mahnı və rəqs kollektivlərinin töhfələri rövnəqləndirib. “Yallı”, “Tello” və digər milli rəqslərimizin usta rəqqaslar tərəfindən ifası tamaşaçılarda xoş ovqat yaradıb. Müğənnilərdən Nazil Qulusoy, Gülnar Qasımova, Rəşad Nəcəfov, Elməddin İbrahimov tərəfindən səsləndirilən, baharı vəsf edən mahnılar şənlik iştirakçılarında bayram əhval-ruhiyyəsi yaradıb. Aslan Həmidlinin, İkram Nəcəflinin sazla, Kamil Abbasovun balaban və tütəklə ifa etdikləri mahnılar tədbir iştirakçıları tərəfindən alqışlarla qarşılanıb. Şənliyə toplaşan tamaşaçıların sürəkli alqışları ilə qurşaq tutub güclərini nümayiş etdirən gənc pəhləvanlar bayrama əsl festival ab-havası qatıblar.

Tədbir əsnasında həmsöhbət olduğumuz rayon sakini Ələkbər Quliyev dedi ki, Novruz arzu dolu sabahlara açılan qapı, hər bir azərbaycanlının, hər bir insanın, hər bir ailənin bayramıdır, bizim müstəqil Azərbaycanın bayramıdır. Müstəqillik illərində Culfa rayonu müasir bir bölgəyə çevrilib. Rayon mərkəzində, kənd yaşayış məntəqələrində tikinti-quruculuq tədbirləri geniş vüsət alıb. Bu da culfalılara böyük sevinc və fərəh bəxş edib. Onlar Novruzu sevinc hissləri ilə qarşılayırlar.

Novruz bayramı ilə bağlı arzularını, ürək sözlərini dilə gətirənlərdən biri də rayon sakini Məhəmməd Əliyev oldu. O dedi ki, zəngin mənəvi dəyərlərimizə söykənərək insanlar arasında qarşılıqlı hörmət, səmimiyyət və mehribanlıq münasibətlərinin yaranmasına səbəb olan Novruz bayramı xalqa gələcəyə nikbinliklə, ümidlə baxmaq hissləri aşılayır. Hər il olduğu kimi, Culfa rayonunun sakinləri bu il də Novruz bayramını qeyd etmək üçün bir araya gəliblər. Burada ictimaiyyətin nümayəndələri iştirak edirlər. Bu, yaxşı ənənədir. Yenə Novruzu bol ruzi, bərəkətlə qarşılayırıq. Ruzi-bərəkətimizin bolluğu muxtar respublikamızın bütün bölgələri kimi, Culfa rayonuna da göstərilən davamlı dövlət qayğısının bəhrəsidir.

X X X

Novruz bayramı tədbiri Kəngərli rayonunda da yüksək əhval-ruhiyyə ilə qeyd olunub. Qıvraq qəsəbəsindəki Heydər Əliyev mədəniyyət və istirahət parkında keçirilən bayram şənliyində rayon sakinləri fəallıqla iştirak edib.

Novruz atributları ilə bəzədilmiş park bura toplaşmış hər kəsin zövqünü oxşаyıb. “Elimizə bahar gəlir” adlı bayram tədbiri at yarışı və xoruz döyüşdürmələri ilə başlayıb. Qaliblər hədiyyələrlə mükafatlandırılıblar. Rаyon mədəniyyət və turizm şöbəsinin “Kəngər” instrumental ansamblının, uşаq musiqi məktəblərinin musiqi kollеktivlərinin, folklor qruplаrının, rayon idmançılarının çıxışlаrı, Kosa və Keçəlin nümаyiş еtdirdikləri oyunlаr tədbir iştirakçıları tərəfindən alqışlarla qarşılanıb. Tədbirin keçirildiyi ərazidə yerli ərzaq məhsullarından və müxtəlif əl işlərindən ibarət təşkil olunmuş sərgiyə də tamaşaçı marağı böyük idi.

Novruz bayramının təntənəli şəkildə keçirildiyi bu günlər Kəngərli rаyonunun sakinləri üçün əlamətdar tarixlərdən biridir. Çünki bu rаyon Novruz bаyrаmı ərəfəsində – 2004-cü il mаrtın 19-dа yаrаdılıb. Bu barədə də bayram şənliyində ətraflı məlumat verilib. Qeyd olunub ki, yaradıldığı dövrdən ötən müddətdə Kəngərli rayonu böyük inkişaf yolu keçib. Rayon mərkəzi də daxil olmaqla bütün kəndlərdə infrastruktur layihələri reallaşdırılıb, yollar abadlaşdırılıb, yaşıllaşdırma tədbirləri həyata keçirilib, əhalinin rifah halı yaxşılaşıb.

Tədbir iştirakçıları ilə söhbətimizdə də bu fikirlər ifadə edildi. Rayon sakini İsmayıl Hüseynquliyev bildirdi ki, Kəngərli rayonunun yaradılması muxtar respublikamızın həyatında mühüm tarixi hadisədir. Ötən müddətdə rayonda görülmüş işlər öz həcminə görə fərqlənir. Bütün kəndlərimiz abadlaşdırılıb, əhalinin rahatlığı üçün kənd və xidmət mərkəzləri tikilib, yeni yollar salınıb. Bir zamanlar boş və baxımsız ərazi kimi qalan indiki rayon mərkəzi bu gün yaraşıqlı bir qəsəbəyə çevrilib. İndi bu rayona yolu düşən hər kəs Qıvraq qəsəbəsinin gözəlliyindən, yollarımızın abadlığından ağızdolusu danışır.

Qıvraq qəsəbə sakini Fəxri Mehbalıyev qeyd edib ki, Kəngərli rayonunun ərazisi özünün qədim tarixi ilə seçilir. Buradakı yaşayış məntəqələrinin hər birində tariximizin və mədəniyyətimizin zəngin izləri var. Bu mədəniyyəti yaşatmaqla bərabər, həm də rayonun müasir inkişafı istiqamətində ötən 13 il ərzində böyük işlər görülüb. Kəngərli rayonu bu müddətdə özünəməxsus inkişаf yolu kеçərək tərəqqiyə qovuşub. Rayon mərkəzi və kəndlər yeni yanaşma prinsipi ilə qurulub. Müasir memarlıq, yüksək dizayn Kəngərlinin simasını başdan-başa dəyişib. Bu günədək rayonda yüzdən artıq obyektin açılışı olub.

Digər rayon sakini Ülkər Gülməmmədova isə deyib ki, sakinlər indiyədək görülmüş işləri yüksək qiymətləndirir, bölgədə həyata keçirilən quruculuq işlərində fəallıq göstərir, rayon iqtisadiyyatının güclənməsinə öz töhfələrini verirlər. Bütün sаhələrdə qаzаnılаn uğurlаr, əldə olunаn nаiliyyətlər əhalinin əhvаl-ruhiyyəsini dаhа dа yüksəldir, qurub-yaratmaq əzmini аrtırır.

X X X

Bayram şənliyi Şahbuzda bu il də böyük sevinclə keçirilib və yaddaqalan olub. Şahbuz muxtar respublikamızın özünəməxsus füsunkar təbiət gözəllikləri olan bölgələrindəndir. Novruzda isə bu gözəllik daha da artır. Builki bayramda havanın da gözəl keçməsi ilə bütün şahbuzlular şəhər mərkəzinə, istirahət parkına toplanıb bir-birini təbrik edir, bayramlaşıb. El ağsaqqalı Dədə Qorqudun, Bahar qızın gəlişi ilə başlanan tədbirdə bayram tonqalı yandırıldıqdan sonra rayonda fəaliyyət göstərən xalq çalğı alətləri ansamblının çıxışları olub. Ansamblın solistlərindən Həsən Qurbanovun, Nəsimi Təhməzovun və başqalarının ifasında səslənən mahnılar alqışlarla qarşılanıb.

Şahbuz milli folklor adətlərimizin yaşadıldığı rayonlardan biridir. Zirvəsi hələ də qarlı olan dağlardan əks-səda verən qara zurnanın səsi altında çıxış edən rəqs kollektivlərinin ifalarına baxmağa dəyərdi. Novruzda hamının maraqla izlədiyi Kosa və Keçəlin duzlu-məzəli söhbətlərindən sonra rayonun kəndlərində fəaliyyət göstərən folklor qruplarının çıxışları da maraqla qarşılanıb. Rayonun Badamlı, Keçili, Yuxarı Qışlaq kənd mədəniyyət evləri kollektivlərinin çıxışları rayon sakinlərində yüksək bayram əhval-ruhiyyəsi yaradıb.

Şahbuza məxsus “Üçayaq”, “Hodu-hodu”, “Çöpüdü” xalq oyunlarına Novruz bayramında tamaşa etməyin öz yeri vardır. Bu oyunlarda xalqımızın min illərdən bəri gələn adət-ənənələrinin saflığı, onların cazibəsi yaşadılır.

Şahbuz rayon uşaq-gənclər idman məktəbi şagirdlərinin güc və çeviklik nümayiş etdirən müxtəlif idman növləri üzrə nümunəvi çıxışları, qədim xalq sənətkarlığı, milli mətbəx və əl işləri sərgiləri buradakı Novruz bayramı şənliyinə yaraşıq verib. Şahbuz şəhər parkında təşkil olunmuş rəngarəng xidmətlər, milli şirniyyatlı çay süfrəsi şahbuzluların rahat istirahət edə bilmələri üçün gözəl ab-hava yaradıb.

Burada həmsöhbət olduğumuz Şahbuz şəhər sakini Təmrixa Cəbiyev Novruzu böyük sevinclə qarşıladığını deyib. Bildirib ki, ötən ildən bəri Şahbuz daha da gözəlləşib, muxtar respublikamızdakı genişmiqyaslı quruculuqdan bu rayona da böyük pay düşüb. Şəhərimizdə, ətraf kəndlərdə yeni içməli su şəbəkəsi çəkilib, rayonda yeni məktəblər, kənd mərkəzləri istifadəyə verilib, yollar salınıb. Bu ilin əvvəlində Azərbaycan Prezidentinin rayonumuza səfəri bizdə böyük sevinc yaradan hadisə olub. Bütün bunları yada salanda bu Novruzdakı sevincimiz daha da artır.

X X X

Novruz bayramı münasibətilə Sədərəkdə də bayram şənlikləri olub. Tədbirdə Sədərək rayonunun musiqi kollektivləri folklorumuzdan yadigar olan sözlü, nəğməli nümunələr ifa ediblər. Kosa, Keçəl və Bahar qızın çıxışları, rəngarəng konsert proqramı hər kəsdə bayram ovqatı yaradıb. Milli rəqslərimiz, yallılarımız, barlı-bərəkətli Novruzu, qədim diyarımızı tərənnüm edən mahnılar bayram şənliyi iştirakçılarına xoş ovqat bəxş edib.

Sonra bayram şənliyinin iştirakçıları el sənətkarlarının araya-ərsəyə gətirdikləri bir-birindən zövqlə işlənmiş xalq yaradıcılığı nümunələrindən ibarət sərgi ilə tanış olublar. Sərgidə xalq sənətinin ağacişləmə, dülgərlik, toxuculuq, xalçaçılıq, dəmirçilik, daşyonma sahələrini özündə əks etdirən əl işlərinə maraq daha çox olub. Burada yerli istehsal olan müxtəlif çeşiddə şirniyyatlar, eləcə də digər qida məhsulları da sərgilənib. Bu, qısa zamanda rayonda ərzaq bolluğunun yaradılması istiqamətində görülən işlərdə böyük məsafə qət edildiyinin göstəricisi kimi diqqəti cəlb edib.

Şənlikdə rayon sakinləri ilə də görüşüb həmsöhbət olduq. Ömrünün 80 ilini geridə qoymuş kənd ağsaqqalı Teymur Quliyev dedi ki, Sədərək sakinləri bütün bayramları, eləcə də Novruz bayramını əmin-amanlıqda qarşılayır, insanlar bayram tonqalları qalayır, şənlik edirlər. Şən mahnıların səsi hətta dövlət sərhədimizdən kənara, mənfur düşmənin yaşayış məntəqələrinə qədər də gedib çıxır. İllər öncə Heydərabad qəsəbəsinin ərazisində nəinki tonqal qalamaq, hətta sərbəst şəkildə gəzməkdən belə, söhbət gedə bilməzdi. İndi isə vəziyyət başqadır. Düşmən artıq ordumuzun qüvvəsini yaxşı bilir. Bilir ki, onlar tərəfindən atılan hər hansı bir səhv addım ağır nəticələrə gətirib çıxara bilər. Bugünkü Novruz şənliyində insanların bu qədər arxayınlıqla iştirak etməsi bir daha onu göstərir ki, sədərəklilər dövlətimizin gücünə, qüdrətinə tam əmindirlər. Elə bu əminlik də rayon sakinlərini torpağa, yurda daha sıx tellərlə bağlayır, onları daha yaxşı işləməyə, Sədərəyi daha da çiçəkləndirməyə sövq edir.

Rayon sakinlərindən Vaqif Seyidov və Arif Vəliyev də bayram təəssüratlarını bizimlə bölüşdülər. Həmsöhbətlərimiz dedilər ki, sədərəklilər Novruz bayramını böyük ruh yüksəkliyi ilə qarşılayırlar. Çünki qarşıdan gələn hər ildə Sədərəkdə yeni-yeni quruculuq ünvanları yaradılır, yollar, məktəblər, bağçalar tikilir, yeni iş yerləri açılır, əhalinin gün-güzəranı yaxşılaşır. Hər bir sədərəkli göstərilən qayğıya görə dövlətimizə minnətdardır.