MƏDƏNİYYƏT


Nurəngiz Gün - nurlu və günəşli poeziya

Bakı, 23 aprel (AZƏRTAC, Elçin Hüseynov). Aprelin 23-də Azərbaycan Yazıçılar Birliyinin (AYB) “Natəvan” klubunda tanınmış şairə Nurəngiz Günün 75 illik yubileyinə həsr edilmiş tədbir keçirilmişdir.

AZƏRTAC xəbər verir ki, yubiley tədbirində Milli Məclisin deputatları, elm və mədəniyyət xadimləri, sənətkarın ailə üzvləri və ədəbi ictimaiyyətin nümayəndələri iştirak etmişlər.

Tədbirdə çıxış edən AYB-in sədri, Xalq Yazıçısı Anar ədəbiyyata “Tanrı” povesti ilə gələn Nurəngiz Günü istedadlı şairə, publisist və gözəl insan kimi xarakterizə etmişdir. Bildirmişdir ki, Nurəngiz Gün həm də xoşbəxt anadır. Onun qızı Jalə Əliyeva çox istedadlı bir alim, filoloq, ən əsası isə anası kimi geniş qəlbli bir insandır. Bu gün o, Milli Məclisin deputatı kimi çox səmərəli işlər görür.

AYB-in sədri öz əsrarəngiz şeirləri ilə ilğımlı sevgiləri xatırladan, poeziyası azadlıq, ümid, kədər və məhəbbət ətrinə bələnən Nurəngiz Günü anadan olmasının 75 illiyi münasibətilə təbrik etmişdir.

Məlumat verilmişdir ki, Bakıda ziyalı ailəsində dünyaya göz açan Nurəngiz Gün Azərbaycan Televiziyasında diktor vəzifəsində çalışmış, Azərbaycan Dövlət Mədəniyyət və İncəsənət Universitetində səhnə danışığı və nitq mədəniyyəti kafedrasında müəllim işləmişdir.

Ədəbiyyata nəsr əsəri ilə gələn şairə “Tanrı bəşər övladıdır”, “Ağ qanadlar”, “Günəşə dua”, “Yol gedirəm”, “Xocalı simfoniyası” və digər şeir kitablarının müəllifidir. Nurəngiz Günün şeirləri bir çox xarici ölkələrdə - Türkiyə, Estoniya, Özbəkistan, İran, İraq və keçmiş Yuqoslaviyada çap olunmuşdur. Şairə müxtəlif vaxtlarda xarici ölkələrin ədəbi mükafatlarına layiq görülmüşdür.

Milli Məclisin deputatı, Xalq Şairi Sabir Rüstəmxanlı bildirmişdir ki, Nurəngiz Gün bizim nəslin yaddaşında parlaq bir obraz kimi qalmışdır. O, televiziyada işlədiyi vaxtlarda Azərbaycan tamaşaçısının dərin rəğbətini qazana bilmişdi. Gənc qələm sahibləri həmişə bu işıqlı insanla ünsiyyətə can atırdılar. Nurəngiz Günün şeirləri öz üslub zənginliyinə görə bir təzə nəfəs kimi diqqət cəlb edirdi. Ən başlıcası, onun şeirlərində azadlıq duyğusu var idi.

Tədbirdə çıxış edən Milli Məclisin mədəniyyət komitəsinin sədri, Azərbaycan Milli Elmlər Akademiyasının müxbir üzvü Nizami Cəfərov Nurəngiz Günün yaradıcılığını nurlu və günəşli poeziya adlandırmışdır. Qeyd etmişdir ki, Nurəngiz Gün minillik Azərbaycan qadın poeziyasında yeri olan şairədir. O, təkcə şeirlərində deyil, həm də bir insan kimi də çox sadə və səmimidir.

Yubiley tədbirində Nurəngiz Günün Azərbaycan dilinin qorunmasında xidmətləri də xatırlanmışdır. Qeyd edilmişdir ki, o, istər şeirlərində və söhbətlərində, istərsə də aparıcılıq fəaliyyətində daim dilimizə hörmətlə yanaşmışdır.

Bildirilmişdir ki, şairənin yaradıcılığında ən çox diqqəti cəlb edən məqam onun yalandan, riyadan uzaq olması, həqiqəti yazmasıdır. Daxilən azad bir şairə olan Nurəngiz Gün bütün əsərlərində, hətta ən kiçik şeirlərində belə sərbəstdir, səmimidir. O, cəmiyyətdə baş verən naqislikləri, əyintiləri daxili intellektual bir narahatlıqla, bir vətəndaş həssaslığı ilə ürəyindən qələminə köçürərək onları oxucuya təqdim edir.

Milli Məclisin deputatı Hüseynbala Mirələmov isə bu gözəl insanı Azərbaycan Televiziyasında gördüyünü, aydın nitqinə, misilsiz gözəlliyinə heyran qaldığını demişdir. Qeyd etmişdir ki, qaraqaşlı, cazibədar, iri qara gözlü, əsl Azərbaycan gözəli olan nur üzlü bu xanıma o zaman hamı valeh olmuşdu. Sonradan mətbuatda onun yazılarını, şeirlərini oxuduqca, bu şeirlərdəki mənaları anlayıb dərk etdikcə, bu sənət adamının yaradıcılığına daha da ürəkdən bağlandım.

Xalq Şairi Fikrət Qoca, Milli Məclisin deputatı Qənirə Paşayeva və başqaları Nurəngiz Günün əsərlərinin məziyyətlərindən, eləcə də onun yüksək insani keyfiyyətlərindən söhbət açmış, şairəyə yeni yaradıcılıq uğurları arzulamışlar.

Bildirilmişdir ki, Nurəngiz Günün həm yaradıcılığı, həm də bir insan kimi alicənablığı və yüksək mədəniyyəti insanları həmişə özünə cəlb etmişdir. Onun işğalda olan torpaqlarımızın dərdləri ilə baş-başa qalıb yazdığı və bizləri də bu həsrətin oduna yandırdığı bir sıra şeirləri, poemaları öz fəlsəfi-lirik, psixoloji mahiyyəti baxımından düşündürücüdür. Tanınmış poeziya ustasının ürəyindəki yanğı, ağrı-acı, Vətən təəssübkeşliyi bütün şeirlərinə hopmuşdur. Nurəngiz Günün şeirlərindəki bu ağrı Qarabağ dərdi, itirilmiş torpaqlarımızın həsrətidir. Bu həsrət onu yatmağa da qoymur, yuxusunu ərşə çəkir, qəlbini göyüm-göyüm göynədir. Şairə torpağını, xalqını, millətini sevən bir ziyalıdır. Nurəngiz Gün həm də şeirlərində xəlqiliyi bu günə qədər qoruyub saxlamağı bacaran dəyərli söz sahiblərindəndir.

Tədbirdə Nurəngiz Gün musiqinin müşayiəti ilə öz şeirlərini səsləndirmişdir.

Nurəngiz Günün şeirlərindən biri “Yol gedirəm” adlanır. Şeirdə əsas qayə budur ki, bu dünyada hər kəs bir yol gedir. O insan xoşbəxtdir ki, özündən sonra iz qoyub gedir. Nurəngiz Gün kimi...

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.