İQTİSADİYYAT


“OPEC+” rekord həcmdə hasilat məhdudiyyətinin uzadılması barədə razılığa yaxındır

Bakı, 3 iyun, AZƏRTAC

OPEC və tərəfdaşları (“OPEC+”) mövcud hasilat məhdudiyyətlərinin uzadılması, yəni may-iyun göstəricilərinin sentyabrın 1-dək saxlanılması barədə razılığa yaxındır.

AZƏRTAC xəbər verir ki, Rusiya və bəzi digər neft istehsalçısı ölkələr “OPEC+” üzrə iyulun 1-dən həcmi azaldılacaq mövcud hasilat məhdudiyyətlərinin daha 1 ay əvvəlki səviyyədə saxlanılmasının tərəfdarıdır. OPEC və digər qeyri-OPEC neft istehsalçıları isə mövcud məhdudiyyətlərin 1 və ya 3 aya qədər uzadılmasını düşünür. Səudiyyə Ərəbistanı da bu məsələdə həmfikirdir.

Bu proseslər fonunda “Brent” markalı xam neftin bir barrelinin qiyməti təxminən 3 ay ərzində (martın 6-dan) ilk dəfə 40 dolları keçib.

Qeyd edək ki, OPEC planlaşdırılan tarixdən bir neçə gün əvvəl - iyunun 4-də iclas keçirə bilər. İyunun 9-da OPEC Nazirlər Şurasının 179-cu iclasının videokonfrans formatında təşkili, iyunun 10-da isə OPEC və qeyri-OPEC ölkələrinin nazirlərinin videokonfransla 11-ci görüşünün keçirilməsi nəzərdə tutulurdu.

Xatırladaq ki, “OPEC+” ölkələri nazirlərinin bu il aprelin 9-u və 12-də keçirilən görüşlərinin nəticəsi olaraq qəbul edilmiş və gündəlik xam neft hasilatının may-iyunda 9,7 milyon barrel, iyul-dekabrda 7,7 milyon barrel, 2021-ci ilin yanvarından 2022-ci ilin aprelinədək isə 5,8 milyon barrel azaldılmasını nəzərdə tutan “Əməkdaşlıq Bəyannaməsi”nə Azərbaycan da qoşulub.

2018-ci ilin oktyabr ayında gündəlik xam neft hasilatı 718 min barrel olan Azərbaycan yeni razılaşma çərçivəsində hasilatı bu ilin may-iyun aylarında həmin səviyyədən 164 min barrel azaltmalıdır. Bu müddət ərzində Azərbaycan gündəlik xam neft hasilatını 554 min barrel həcmində saxlamalıdır.

Azərbaycanın öhdəlikləri iyul-dekabr aylarında 131 min barrel, 2021-ci il və 2022-ci ilin aprel ayı ərzində isə 98 min barrel müəyyənləşib. Kvotalara müvafiq olaraq ölkəmizdə gündəlik xam neft hasilatının həcmi iyulun 1-dən ilin sonunadək 587 min barreli, 2021-ci ilin yanvarından 2022-ci ilin aprelinədək isə 620 min barreli keçməməlidir.

Mayın 1-dən etibarən “Azəri-Çıraq-Dərinsulu Günəşli” yataqlarında, “Azneft” İB, Birgə Müəssisələr və Əməliyyat Şirkətləri üzrə gündəlik hasilatın azaldılması prosesi həyata keçirilir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.