Bakı, 6 fevral, AZƏRTAC

Səudiyyə Ərəbistanı və onun Fars körfəzi üzrə müttəfiqləri Rusiya başda olmaqla təşkilata üzv olmayan on ölkədən ibarət qrupun ittifaqının yaradılması ilə OPEC-i yenidən transformasiya etmək niyyətindədirlər. Bu planın məqsədi dünya neft bazarına nəzarəti ələ keçirməkdir.

AZƏRTAC xəbər verir ki, bu xəbəri “The Wall Street Journal” nəşrinə istinadla RBK saytı yayıb.

Xəbərdə qeyd olunur ki, Səudiyyə Ərəbistanı əvvəllər də Rusiyanın üzv olduğu tamamilə yeni təşkilat yaradılmasını təklif edib. Qəzetə məlumat verən mənbələr iddia edirlər ki, hələ 2018-ci ilin iyununda bu ölkənin vəliəhd şahzadəsi Məhəmməd bin Salman energetika naziri Xalid Əl-Fəlihin vasitəsilə yeni kartelin yaradılmasını təklif edib.

OPEC ölkələri və Rusiyanın başçılıq etdiyi ölkələr qrupu neft kartelinin strukturunun dəyişdirilməsi məsələsini fevralın 18-də OPEC-in Vyanada keçiriləcək görüşündə müzakirə etməyi nəzərdə tuturlar. Yekun qərar isə aprel ayında qəbul ediləcək. OPEC mənbələri qəzetə bildiriblər ki, yaradılacaq ittifaq üç il müddətində fəaliyyət göstərəcək və icbari hüquqi qüvvəsi olmayacaq.

Neftin qiymətinin son iki ildə kəskin şəkildə aşağı düşməsi nəticəsində yaranan vəziyyətdən çıxış yolları axtarmaq üçün OPEC və on ölkədən ibarət qrup ilk dəfə 2016-cı ildə əməkdaşlığa başlayıblar. OPEC+ sazişinin iştirakçıları ötən ilin dekabrında 2019-cu il iyunun sonunadək gündəlik neft hasilatını 1,2 milyon barrel azaltmaq barədə qərar qəbul ediblər. Bu razılaşma aprel ayında dəyişdirilə bilər. Sazişə görə, ölkələr hasilatı 2018-ci ilin oktyabr səviyyəsindən 3 faiz həcmində azaldırlar. Rusiyanın energetika naziri Aleksandr Novak bildirib ki, Rusiya neft hasilatını gündəlik 228 min barrel azaldacaq. Eyni zamanda, yanvarda Əl-Fəlih Moskvanın hasilatı gözlənildiyi qədər azaltmadığını bəyan edib. Rusiya tərəfi yanvarda bu rəqəmin gündəlik 47 min barrel olduğunu açıqlayıb.

Azərbaycan son OPEC+ sazişi çərçivəsində hasilatı gündəlik 2,5 faiz (20 min barrel) azaltmağı öhdəsinə götürüb.