REGİONLAR
Oğlu və qardaşı ilə döyüşə yollanan şəhid mayor Şahlar Cəfərovun doğum günü qeyd edilib VİDEO
Sabirabad, 5 iyun, Aydın Yavərzadə, AZƏRTAC
Bu gün şəhid mayor Şahlar Cəfərovun doğum günüdür. Cənnətdəki ilk doğum günündə şəhidin məzarı doğmaları, həmkəndliləri, rayon ziyalıları və ətraf rayonlardan olan sakinlər tərəfindən ziyarət edilib.
AZƏRTAC-ın bölgə müxbiri xəbər verir ki, Vətən müharibəsinin qəhrəmanlarından olan şəhid mayor Şahlar Cəfərov 1975-ci il iyunun 5-də Sabirabadın Xəlfəli kəndində dünyaya göz açıb. Vətən müharibəsində canını fəda edən mayorun bu gün 46 yaşı qeyd olunub.
Mərasimdə şəhid ailələrinin üzvləri, rayon sakinləri və ətraf rayon və şəhərdən gələn qonaqlar iştirak ediblər. Çıxış edənlər tariximizin şanlı səhifəsi olan 44 günlük Zəfər yürüşündən söhbət açıb, Şahlar Cəfərovun qəhrəmanlıqlarından danışıblar. Bildirilib ki, torpaqlarımızın yağı düşməndən azad edilməsi şəhidlərimizin qanı bahasına gerçəkləşdi. Onlar gələcək nəsillərə örnək olmaqla yanaşı, öz qəhrəmanlıqları ilə əbədiyyətə qovuşdular.
Qeyd edilib ki, Vətən müharibəsində qismən səfərbərlik elan olunan zaman Cəfərovlar ailəsindən ehtiyatda olan zabit, mayor Şahlar və Bahadur Cəfərov qardaşları, həmçinin mayor Şahların oğlu Seyfi Cəfərli olmaqla, üç nəfər döyüşə yollanıb. Onlar ayrı-ayrı cəbhələrdə düşmən təxribatına qarşı həyata keçirilən döyüşlərdə iştirak ediblər. Belə döyüşlərin birində Şahlar Cəfərov qəhrəmanlıqla şəhidlik zirvəsinə ucalıb.
Mərasimdə məktəblilər ədəbi-bədii kompozisiya nümayiş etdiriblər. Vətənə, qəhrəmanlara həsr edilən şeirlər söylənilib.
Şəhid atası Fəzail Cəfərovla söhbət zamanı bildirib ki, özünün ən böyük arzusu hərbçi olmaq idi. Lakin bu, ona qismət olmayıb: “Ona görə də övladlarımı hərbçi olmağa sövq etdim. Bu istəklə hər iki oğlum hərbçi oldu. Əvvəlcə böyük oğlum Şahlar, sonra Bahadur ali hərbi məktəbə daxil oldular. Onlar müxtəlif hərbi hissələrdə Vətənə xidmətlərini yerinə yetirdilər. Müəyyən müddətdən sonra isə ehtiyatda olan zabit kimi hər an Vətən üçün xidmətə hazır oldular. Böyük övladım Şahlar 2014-cü ildə ordudan tərxis olundu. Onun hər zaman bir arzusu var idi, torpaqlarımızı işğaldan azad etmək. O, öz arzusuna çatdı. Qismən səfərbərlik zamanı öncə övladını yola saldı, sonra isə özü döyüşlərə yollandı”.
Onun döyüş yolu Füzuli istiqamətindən başladı, Hadrut istiqamətində öz taboru ilə birlikdə düşmənə ağır zərbələr vurdu. Hər zaman əlaqə saxladıqda evdəkilərə “qələbə bizimlədir” deyirdi. Oktyabrın 20-də isə gərgin döyüşlərdən birində mayor Şahlar Cəfərov düşmənə ağır zərbələr vuraraq şəhadətə ucaldı.
Seyfi atası haqqında qürurla danışaraq bildirir ki, hər zaman onun davamçısı olmaqla fəxr edib. “O, özü necə vətənpərvər idisə, məni də, qardaşımı da Vətən sevgisi ilə böyütdü. Bu döyüşlər zamanı biz kimliyimizdən asılı olmayaraq, bir amal uğrunda döyüşə yollandıq. Döyüşlər zamanı atam şəhidlik məqamına ucaldı. Hər birimiz yaxşı bilirdik ki, döyüş yolunun sonu ən uca məqam olan şəhidlik zirvəsidir. Mən bu gün tək atamla deyil, bütün şəhidlərimizlə fəxr edirəm. Çünki torpaqlarımızın azad edilməsi uğrunda onların qanı axıb, biz hər zaman şəhidlərə borcluyuq”, - deyə Seyfi Cəfərli qeyd edib.
Şəhidin kiçik övladı Səməndər Cəfərli bildirib ki, vətənpərvərlik hissini atasından öyrənib: “O, elə bir ata idi ki, döyüşə öncə öz böyük övladını yola saldı. Hər zaman bizə söyləyərdi ki, vətənpərvər olun, təhsilli olun, dövlətə, millətə xeyirli övlad olaraq yetişin”. Tarix fakültəsinin tələbəsi olan Səməndər deyir ki, bizim tariximiz qəhrəmanlarla zəngindir. Vətən müharibəsi bunu bir daha göstərdi. Bu qəhrəmanlar bir daha sübut etdi ki, torpaqlarımız uğrunda hər zaman canından keçməyə hazır olan igidlər var.
Qeyd edək ki, mayor Şahlar Cəfərov doğulub boya-başa çatdığı Sabirabad rayonunun Xəlfəli kəndində torpağa tapşırılıb. O, Vətən müharibəsində göstərdiyi şücaətə görə ölümündən sonra “Vətən uğrunda”, “Xocavəndin azad olunmasına görə” medalları ilə təltif edilib.