REGİONLAR
Oğuzlu fermer: Günəş işığı düşən fındıq kolunun məhsulu bol olar VİDEO
Kənd Təsərrüfatı Nazirliyi ilə AZƏRTAC-ın birgə layihəsi: “Kəndbəkənd”
Oğuz, 13 oktyabr, AZƏRTAC
Uzun illərdir ki, kənd təsərrüfatı məhsullarının istehsalı ilə məşğul oluram. Xüsusilə fındıqçılıq sahəsində təcrübə toplamışam. Hazırda 2 hektar fındıq bağım var. Bu il məhsulumuz boldur, ancaq vaxtında yığmalıyıq ki, xarab olmasın. Yığdığımız məhsulları emal müəssislərinə təhvil veririk. Müəssisə əməkdaşları məhsulumuzu elə qapımızdan götürürlər. Nəqliyyat xərclərini də özləri çəkir, hətta məhsulun yığılmasına da kömək göstərirlər. Qiymətlər də bizi qane edir.
Bu sözləri AZƏRTAC-a müsahibəsində Oğuzun Kərimli kənd sakini, fermer Söhbət Abdullayev deyib.
Prezident İlham Əliyevin kənd təsərrüfatının ixrac potensialı yüksək sahələrindən olan fındıqçılığın inkişafı ilə bağlı verdiyi tapşırıq və göstərişlərin icrasını təmin etmək məqsədilə Oğuz rayonunda da yeni bağların salındığını və bu istiqamətdə işlərin davam etdirildiyini vurğulayan Söhbət Abdullayev yeni bağ salan fermerləri aqrotexniki qaydalara düzgün əməl etməyə səsləyib.
“Yeni fındıq bağı salan zaman hər bir çalaya 4-5 fındıq kolu basdırılır və yaş peyin tökülür. Bu, torpağın münbitliyini saxlayır və inkişafa güclü təsir göstərir. Hər fındıq topasında 8-12 budaq olur. Budaqlar arasında məsafəyə diqqət yetirilməlidir. Fındıq bağlarında ən əsas tədbir budanmadır. Bir-birinə dəyən budaqlar kəsilib götürülməlidir. Kolun ortasında budaqlar sıx olmamalıdır. Çünki hər kolun ortasına hökmən Günəş işığı düşməlidir. Günəş işığı düşən kolun məhsulu da bol olar. Fındıq ağacının ən müsbət cəhəti odur ki, hər il məhsul verir”, - deyə oğuzlu fermer bildirib.
Qeyd edək ki, bu il rayonun fındıq bağlarından 1000 tonadək məhsul tədarük olunub. Fındıq istehsalı ötən illə müqayisədə 100 tona yaxın artıb.
2017-ci ilin yaz və payız mövsümlərində rayon ərazisində 995 hektar, cari ilin yaz aylarında isə 386 hektar sahədə yeni fındıq bağları salınıb. Hazırda rayonda mövcud fındıq bağlarının ümumi sahəsi 3252 hektardır. Bu bağların 1805 hektarı barverəndir. Yeni bağların salınması istiqamətində işlər payız aylarında da davam etdiriləcək. İlin sonunadək daha 250 hektar sahədə yeni fındıq bağlarının salınması planlaşdırılır.