Bakı, 17 oktyabr, AZƏRTAC

Oktyabrın 19-dan sərnişindaşımalar Bakı Nəqliyyat Agentliyinin (BNA) yeni nəqliyyat planına uyğun icra olunacaq.

BNA-dan AZƏRTAC-a bildirilib ki, Nazirlər Kabineti yanında Operativ Qərargahın müvafiq qərarına əsasən, oktyabrın 19-u saat 00:00-dan Bakı Metropolitenində sərnişindaşıma fəaliyyətinin dayandırılması ilə əlaqədar sərnişindaşımalar əvvəlcədən hazırlanan nəqliyyat planına uyğun olaraq təşkil ediləcək.

Oktyabrın 19-dan:

- M6 (“28 May” metrostansiyası - “H.Aslanov” metrostansiyası) ekspres xətti üzrə avtobusların hərəkəti Babək prospektindən keçməklə təşkil olunacaq.

- M7 ekspress xətlər üzrə avtobuslar tam yeni hərəkət sxemi ilə fəaliyyət göstərəcək. Bu xətt üzrə avtobuslar Heydər Əliyev prospektindən keçməklə “Sahil” metrostansiyası və “Koroğlu” metrostansiyasını əlaqələndirəcək.

Bu dəyişiklik sayəsində sərnişin tələbatı daha çox olan dayanacaq məntəqələrini, metro stansiyalarını əlaqələndirmək mümkün olacaq.

Qeyd edək ki, sərnişin tələbatına dair son statistik təhlillər əsas götürülərək oktyabrın 19-dan M9 və M10 ekspres xətlərin fəaliyyəti dayandırılacaq. Bu xətlərdən çıxarılan avtobuslar isə sərnişin axını daha çox olan istiqamətlərdə istifadə ediləcək.

Avtobusların sayı və intervalı sərnişin tələbatına uyğun olaraq tənzimlənəcək. Lakin daşımaların rahat və vaxtlı-vaxtında təmin olunması üçün avtobusların maneəsiz hərəkətinə ciddi zərurət var. Əvvəlki müşahidələr onu göstərir ki, gün ərzində xüsusilə pik saatlarında nəqliyyatın hərəkətində yaranan sıxlıqlar avtobuslararası hərəkət intervalının pozulmasına, avtobusların uzun müddət tıxacda qalmasına səbəb olur. Bu isə öz növbəsində dayanacaq məntəqələrində gözləyən sərnişin sayının artmasına və avtobuslarda sərnişin sıxlığının yaranmasını qaçılmaz edir.

Bunu nəzərə alaraq, fərdi avtomobil sürücülərindən xahiş edilir ki, avtobusların hərəkət üstünlüyünə anlayışla yanaşsınlar. Xüsusən də avtobusların dayanacaq məntəqələrinə sərbəst giriş-çıxışına şərait yaradılmalıdır. Dayanma-durma və parklanma qaydalarına ciddi şəkildə əməl olunmalıdır. Nəqliyyat vasitələrinin dayanacaq məntəqələrinin ərazisində, avtobusların hərəkət trayektoriyasında park edilməsinə yol verilməməlidir.

Bununla yanaşı, bildirilir ki, avtobusa daxil olarkən və səyahət müddətində tibbi maskadan istifadə mütləqdir. Qaydalara riayət olunmadıqda sürücü avtobusu saxlamağa məcbur olacaq ki, bu da hərəkət intervalının pozulmasına, digər sərnişinlərin narahatlığına səbəb olacaq. Sərnişinlərin bu qaydalara əməl etməsi üçün sərnişin axını nəzərə alınmaqla, əsas cəlb etmə məntəqələrində nəzarətçilər xidmət göstərir.

Vətəndaşlarımızı növbəti dəfə məsuliyyətli davranaraq hər iki cəbhədə, hər iki səngərdə düşmənə fürsət verməməyə çağırırıq. Hamılıqla xüsusi karantin rejiminin qaydalarına riayət etməli, maska taxmalı, şəxsi gigiyenamızı gözləməliyik.

Ölkəmizdə hərbi vəziyyətlə əlaqədar komendant saatının tətbiqini və xüsusi karantin rejiminin davam etməsini nəzərə alaraq, daşımalar da məhz mövcud vəziyyətə uyğun təşkil olunur. Hazırkı daşımalar adi rejimdə təşkil olunan daşımalar deyil, vətəndaşlarımızdan da buna anlayışla yanaşmalarını xahiş edirik.