REGİONLAR


Ölkəmizdə əhalinin sayının 10 milyona çatması bölgələrdə müxtəlif tədbirlərlə qeyd olunub

Kürdəmir, 8 aprel, AZƏRTAC

Kürdəmirdəki Qələbə parkında Azərbaycanda əhalinin sayının 10 milyon nəfərə çatması münasibətilə bayram tədbiri keçirilib.

AZƏRTAC-ın bölgə müxbiri xəbər verir ki, bu əlamətdar hadisə münasibətilə əvvəlcə rayon icra hakimiyyətinin təşkilatçılığı ilə ağacəkmə kampaniyası təşkil olunub, fləşmob keçirilib.

İctimaiyyətin çoxsaylı nümayəndələrinin də qatıldığı bayram tədbirində rayon icra hakimiyyətinin başçısı Ceyhun Cəfərov çıxış edərək, Azərbaycanda 10 milyonuncu vətəndaşın dünyaya gəlməsini əlamətdar hadisə adlandırıb. Qeyd edib ki, dövlət müstəqilliyimizin bərpasından sonra ötən qısa tarixi dövr ərzində Azərbaycan xalqının ümummilli lideri Heydər Əliyevin, bu gün isə onun layiqli davamçısı Prezident İlham Əliyevin uzaqgörən siyasəti və gərgin fəaliyyəti nəticəsində ölkəmizin sosial-iqtisadi inkişafı və dünyaya inteqrasiyası sahəsində böyük nailiyyətlər əldə olunub. Gündən-günə inkişaf edən ölkəmizdə insanların sosial rifah halı yaxşılaşır, əhalinin sayı artır.

Konsert proqramı ilə davam edən bayram tədbiri atəşfəşanlıqla başa çatıb.

X X X

Zərdabda on milyonuncu vətəndaşımızın doğulması rəngarəng tədbirlərlə qeyd olunub.

Bu münasibətilə Zərdab şəhərində ağacəkmə aksiyası keçirilib. Aksiya zamanı şəhərin küçə və parklarına 500-dək müxtəlif növ ağac əkilib.

Sakinlərə rayonun incəsənət ustalarının ifasında konsert proqramı təqdim olunub. Azərbaycanı tərənnüm edən mahnılar, rəqslər şənliyə xüsusi bayram əhval-ruhiyyəsi gətirib. Açıq havada rayon idmançılarının çıxışları da maraqla qarşılanıb.

Tədbirlər möhtəşəm atəşfəşanlıqla başa çatıb.

X X X

Azərbaycanda 10 milyonuncu sakinin dünyaya gəlməsi münasibətilə Ağsu şəhərindəki Heydər parkında “Biz artıq 10 milyonluq ölkəyik, xalqımızı təbrik edirik” şüari altında bayram konserti olub.

Rayon icra hakimiyyəti rəhbərliyinin, idarə, müəssisə və təşkilatların kollektivlərinin, gənclərin və ictimaiyyət nümayəndələrinin izlədiyi konsertin aparıcısı bildirib ki, aprelin 6-da saat 03:30-da Bakı şəhərində Ağdərədən olan məcburi köçkün ailəsində ölkənin 10 milyonuncu sakini dünyaya gəlib. Dünyaya gələn körpə ailənin ilk övladıdır.

Bayram konsertində Azərbaycanımızı, onun gözəlliyini vəsf edən mahnılar səsləndirilib.

X X X

Göyçay ictimaiyyəti 10 milyonuncu Azərbaycan vətəndaşının dünyaya gəlməsini kütləvi tədbirlərlə qeyd ediblər.

Əvvəlcə şəhərin M.Ə.Rəsulzadə küçəsində ağacəkmə aksiyası keçirilib.

Sonra şəhərin mərkəzində sakinlər qarşısında çıxış edən Qafqaz Müsəlmanları İdarəsinin regional bölməsinin sədri Rəsul Kazımov Azərbaycan Respublikasının həyatında çox əlamətdar hadisənin baş verdiyini - əhalinin sayının 10 milyon nəfərə çatdığını bildirərək, bu münasibətlə göyçaylıları təbrik edib.

Çıxışlarda vurğulanıb ki, sürətli inkişaf, sosial rifahın daha da yaxşılaşması istiqamətində həyata keçirilən ardıcıl tədbirlər Azərbaycanda əhalinin sayının artması ilə nəticələnir.

Tədbir konsertlə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.