ELM VƏ TƏHSİL
Ölkəmizdə təhsil infrastrukturunun qurulmasına yönəlmiş strategiya dayanıqlı inkişafın bünövrəsidir
Bakı, 16 sentyabr, AZƏRTAC
Azərbaycan Prezidentinin rəhbərliyi ilə həyata keçirilən təhsil siyasəti, dövlətimizin başçısının müvafiq fərman və sərəncamları, ölkədə açılan çoxsaylı məktəblər təhsil işçilərində böyük ümidlər yaradır. Əmin oluruq ki, bu sahədə əmək sərf edən insanların sosial təminatı hər zaman dövlətin prioritet məsələlərindən biri olacaq.
Bu fikri AZƏRTAC-a müsahibəsində Bakı Xoreoqrafiya Akademiyası nəzdində fəaliyyət göstərən İncəsənət Kollecinin direktoru, pedaqogika üzrə fəlsəfə doktoru, dosent Aynur Hüseynova söyləyib. O vurğulayıb ki, Azərbaycanda humanitar sahənin inkişafı üçün hüquqi, sosial və maddi-texniki baza gücləndirilib, fundamental layihələr həyata keçirilib. Bütün bunların nəticəsidir ki, COVID-19 pandemiyası şəraitində Azərbaycanda heç bir sosial, eləcə də təhsilin inkişafına hesablanmış çoxsaylı layihələr təxirə salınmayıb. Halbuki dünya ölkələrində acınacaqlı vəziyyət yarandı. İqtisadi dayanıqlılığın Azərbaycan modelində isə ölkənin təbii ehtiyatları hesabına insan kapitalının formalaşdırılması dövlət və hökumət qarşısında duran ümdə məsələ kimi yer alıb. Bununla yanaşı, son illər Azərbaycanda ayrı-ayrı sahələri əhatə edən dövlət proqramları arasında öz müasirliyi, səmərəliliyi və rəqabətliliyi ilə seçilən təhsil proqramları qarşıya qoyulmuş hədəf və məqsədlərin fonunda geniş inkişaf dinamikasına malikdir.
Direktor qeyd edib ki, ölkə rəhbərinin yüksək səviyyəli təhsil infrastrukturunun qurulmasına yönəlmiş təhsil strategiyası dayanıqlı inkişafın bünövrəsidir. Əlbəttə, təhsil müəssisələrinin üzərinə də böyük məsuliyyət düşür, çünki yaradılmış münbit şərait və davamlı dövlət dəstəyindən layiqincə istifadə edərək yeni və daha səmərəli təhsil xidmətləri göstərilməlidir. Bu isə gələcək Azərbaycanın daha da inkişafına xidmət edəcək. Ölkəmizdə təhsilin məzmununun yeniləşdirilməsi, təkmilləşdirilməsi, təhsilalanların nailiyyətlərinin obyektiv qiymətləndirilməsi üzrə yeni üsul, model və mexanizmlərin tətbiqi, ölkədə əmək bazarının tələbatına uyğun yüksəkixtisaslı kadr hazırlığı, təhsil sisteminin informasiyalaşdırılması və elektronlaşdırılması sayəsində məktəbəqədər, ibtidai, ümumi orta, orta ixtisas və ali təhsilin bütün səviyyələri üzrə uğurlar əldə olunub.
“Bu baxımdan, xoreoqrafiya təhsili də istisna deyil. Bədii təhsil ocaqlarından biri olan Bakı Xoreoqrafiya Akademiyası Prezident İlham Əliyev tərəfindən yaradılan unikal çoxpilləli təhsil müəssisəsidir. Akademiyanın orta ixtisas təhsil pilləsində tətbiq olunan yeniliklər və innovativ yanaşmalar təkcə bu sahənin inkişafına xidmət etmir, həmçinin təbii fəlakət, epidemiya, pandemiya və digər arzuolunmaz şəraitdə tədris metodlarının çevik transformasiyasına imkan verən mükəmməl alətlərdən biridir. Akademik xoreoqrafiya təhsili nəinki Azərbaycan, hətta regionda yeni təhsil fenomenidir. Buna görə də bu sahədə görüləcək işlər kifayət qədər çox olaraq, yeni və fundamental yaradıcılıq və infrastruktur layihələrinin həyata keçirilməsinə böyük zərurət yaradır”, - deyə Aynur Hüseynova vurğulayıb.