REGİONLAR
“Ölkəmizi tanıyaq”: Cənub bölgəsi ilə tanışlıq
Astara-Masallı-Lənkəran, 24 mart, Bağır Əliyev, AZƏRTAC
“Ölkəmizi tanıyaq” tur-aksiyasının iştirakçısı olan Sumqayıt, Naftalan və Mingəçevir şəhərlərinin, Xızı, Siyəzən, Şabran, Qubadlı və Laçın rayonlarının məktəbliləri martın 24-də respublikamızın cənub bölgəsi ilə tanışlığı davam etdiriblər.
AZƏRTAC xəbər verir ki, Lənkəran rayonu ilə tanışlıqdan sonra Siyəzən, Şabran, Qubadlı və Laçın rayonlarının şagirdləri və onların müəllimləri Astara və Masallı rayonlarına gəliblər.
Humanitar aksiyanın iştirakçılarını Astarada rayon icra hakimiyyətinin məsul işçiləri, müəllimlər, gənclər və ictimaiyyət nümayəndələri qarşılayıblar.
Məktəblilər Heydər Əliyev Muzeyində Ümummilli Liderin həyat və fəaliyyətini, böyük rəhbərin Astara rayonuna səfərlərini əks etdirən eksponatlar və fotoşəkillərlə tanış olublar.
Sonra tur-aksiyanın iştirakçıları Astara şəhərində, Xəzər dənizi sahilində salınmış park-bulvar kompleksinə gəliblər.
Məktəblilərə Astaranın qədim tarixi, mədəniyyəti, adət-ənənələri, turizm potensialı, əhalinin məşğulluğu və sosial-iqtisadi inkişafı barədə məlumat verilib. Qeyd olunub ki, Astara zəngin təbiətə və qədim tarixə malik, nadir el sənətkarlığının, qədim adət-ənənələrin və folklorun qorunduğu qədim yaşayış məntəqəsidir.
Park-bulvar kompleksi ilə tanışlıqdan sonra tur-aksiyanın iştirakçıları “Astaraçay” MMC-nin çay fabrikində çay emalı prosesini izləyib, burada yaradılmış “Çay muzeyi”ndə nümayiş etdirilən eksponatlara baxıblar.
Günün ikinci yarısında məktəblilər Masallı rayonuna səyahət ediblər.
Tur-aksiya iştirakçılarını rayon icra hakimiyyətinin məsul işçiləri, müəllimlər və ictimaiyyət nümayəndələri qarşılayıblar.
Masallı şəhərindəki Heydər Əliyev Parkında məktəblilər qarşısında çıxış edən rayon icra hakimiyyəti başçısının müavini Aybəniz Qafarova “Ölkəmizi tanıyaq” layihəsi çərçivəsində təşkil olunmuş tur-aksiyaların əhəmiyyətindən danışıb, səyahət edən məktəblilərə xoş arzularını çatdırıb.
Məktəblilər Heydər Əliyev Parkında Ümummilli Liderin abidəsi önünə gül dəstələri düzərək xatirəsini ehtiramla yad edib, Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlar və fotoşəkillərlə tanış olublar.
Humanitar aksiyanın iştirakçıları Mərkəzin rəqs qrupunun çıxışlarını maraqla izləyiblər.
Sonra ekskursiya Uşaq İncəsənət Məktəbində davam edib. Məlumat verilib ki, Uşaq İncəsənət Məktəbi ötən il sentyabrın 3-də Prezident İlham Əliyevin xeyir-duası ilə istifadəyə verilib. Ümumi sahəsi 2743 kvadratmetr olan ikimərtəbəli binada 33 sinif otağı var. Sinif otaqlarının hamısı müasir avadanlıqla, təlim-tədris ləvazimatları ilə təchiz olunub. 150 yerlik akt zalında müxtəlif tədbirlərin keçirilməsi üçün hər cür şərait yaradılıb. Kitabxana, rəsm otağı və heykəltəraşlıq emalatxanasında dərslərin keçirilməsi üçün bütün imkanlar nəzərə alınıb. Məktəbdə hazırda 305 şagird təhsil alır və 70 müəllim çalışır.
Tur-aksiya iştirakçıları ötən il sentyabrın 3-də istifadəyə verilmiş Tarix-Diyarşünaslıq Muzeyi ilə də tanış olublar.
Muzeyin direktoru Əntiqə Tağıyeva bildirib ki, Masallı Rayon Tarix-Diyarşünaslıq Muzeyi 1950-ci ildə yaradılıb və əvvəllər şəhər mərkəzindən 16 kilometr məsafədə yerləşən keçmiş məktəb binasında fəaliyyət göstərib.
Qeyd olunub ki, Prezident İlham Əliyev Masallıya səfəri çərçivəsində Tarix-Diyarşünaslıq Muzeyinin yeni binasının açılışında iştirak edib. Ümumi sahəsi 1861 kvadratmetr olan muzeydə 5 ekspozisiya zalı yaradılıb. Ekspozisiyalarda Masallının tarixi, bu ərazidə tapılan qədim əşyalar, ümumiyyətlə, rayonun həyatı ilə bağlı məlumatlar toplanıb. Muzeydə 7 mindən çox eksponat var. Onlardan 2 mini ekspozisiya zallarında nümayiş etdirilir.
Muzeydə müstəqillik tariximizə xüsusi yer verilib, ümummilli lider Heydər Əliyevin və Prezident İlham Əliyevin həyat və fəaliyyətlərini əks etdirən fotolardan ibarət guşələr yaradılıb.
Sonra şagirdlər “ASAN həyat” kompleksinə gələrək buradakı “İntellektual Mərkəz”də keçirilən Masallı məktəblilərinin “Breyn-Rinq” yarışmasını izləyiblər.
Məktəblilər, həmçinin Masallı Olimpiya İdman Kompleksi, Bayraq Meydanı və Azərbaycanın Dövlət Rəmzləri Muzeyi ilə də yaxından tanış olublar.
Məlumat verilib ki, “ASAN həyat” kompleksi, Bayraq Meydanı, Azərbaycanın Dövlət Rəmzləri Muzeyi də Prezident İlham Əliyevin iştirakı ilə istifadəyə verilib.
Bildirilib ki, Bayraq Meydanının ümumi sahəsi 1,3 hektardır. Meydanda hündürlüyü 62 metr olan bayraq dirəyi ucaldılıb, sahəsi 78 kvadratmetr olan fəvvarə inşa edilib. Ərazidə geniş abadlıq işləri görülüb, 4310 kvadratmetr yaşıllıq zolağı salınıb, müasir suvarma və işıqlandırma sistemləri yaradılıb.
Ekspozisiya zalından və köməkçi otaqlardan ibarət Dövlət Rəmzləri Muzeyində tariximizin müxtəlif dövrlərinə aid eksponatlar, bayraqlar və dövlət rəmzləri qorunur.
Astara və Masallı rayonları ilə tanışlıqdan sonra tur-aksiya iştirakçıları Lənkərana qayıdıblar.
X X X
Martın 24-də tur-aksiyanın Sumqayıt, Naftalan, Mingəçevir şəhərlərindən və Xızı rayonundan olan iştirakçıları isə Lənkəran rayonuna səyahətlərini davam etdiriblər.
Məktəblilər Lənkəran Rayon Tarix-Diyarşünaslıq Muzeyində, “Qoşa Qala qapıları” meydanında, “Mayak” binasında, Hirkan Milli Parkında, Xanbulan gölündə, çay plantasiyalarında, sitrus meyvə bağlarında, general Həzi Aslanovun ev-muzeyində olublar.
Tur-aksiyanın iştirakçıları, həmçinin Lənkəran Şəhər Mədəniyyət Mərkəzində “Tarixin canlı əfsanəsi” filminə tamaşa edib, Separadi kəndində “Nənələr” və “Nəvələr” folklor kollektivlərinin üzvləri ilə görüşüblər.
Məktəblilər şam yeməyindən sonra müxtəlif əyləncəli proqramlarda iştirak ediblər.