Lənkəran, 25 mart, Bağır Əliyev, AZƏRTAC

“Ölkəmizi tanıyaq” tur-aksiyası çərçivəsində Sumqayıt, Naftalan və Mingəçevir şəhərlərinin, Xızı, Siyəzən, Şabran, Qubadlı və Laçın rayonlarının məktəblilərinin Azərbaycanın cənub bölgəsi ilə tanışlığı martın 25-də davam etdirilib.

AZƏRTAC xəbər verir ki, Siyəzən, Şabran, Qubadlı və Laçın rayonlarının IX-XI sinif şagirdləri Astara və Masallı rayonlarından sonra səyahətlərini Lənkəranda davam etdiriblər.

Lənkəran şəhərindəki “Qoşa qala” qapıları, “Dairəvi qala”, “Mayak” binası, “Samovar” istirahət mərkəzi və rayon tarix-diyarşünaslıq muzeyi ilə tanışlıq məktəblilərin böyük marağına səbəb olub.

Tur-aksiyanın iştirakçıları iki dəfə Sovet İttifaqı Qəhrəmanı, tank qoşunları general-mayoru Həzi Aslanovun Lənkəran şəhərindəki ev-muzeyində nümayiş etdirilən eksponatlarla tanış olublar. Burada şagirdlərə cəsur sərkərdənin ikinci dünya müharibəsində keçdiyi döyüş yolu barədə ətraflı məlumat verilib. Diqqətə çatdırılıb ki, 34 yaşında iki dəfə Sovet İttifaqı Qəhrəmanı adına və general rütbəsinə layiq görülən həmyerlimizin adı qəhrəmanlıq simvoluna çevrilib.

Tur-aksiyanın iştirakçıları, həmçinin Lənkəran Şəhər Mədəniyyət Mərkəzində Sovet İttifaqı qəhrəmanlarına həsr olunmuş “Tarixin canlı əfsanələri” filminə baxıblar.

Günün ikinci yarısında aksiyanın iştirakçıları Hirkan Milli Parkına gəliblər. Məktəblilərə məlumat verilib ki, Lənkəran və Astara inzibati rayonlarının ərazisində yerləşən Hirkan Milli Parkı zəngin flora və faunasına görə nəinki Azərbaycanın, dünyanın ən nadir milli parkı hesab olunur. Burada buzlaşma dövründən qabaqkı endemik, relikt dövr bitkiləri, o cümlədən heyvanat aləmi qorunub saxlanılır.

Ərazisi 40 min 358 hektar olan Hirkan Milli Parkda Azərbaycanın “Qırmızı kitab”ında olan ağac və kol bitkilərinin yarıdan çoxuna təsadüf edilir. Parkda təkcə nadir bitki aləmi deyil, nəsli tükənməkdə olan heyvan növləri də mühafizə edilir.

Hirkan Milli Parkı ilə tanışlıqdan sonra məktəblilər “Xanbulan” İstirahət Mərkəzinə səyahət edib, çay plantasiyalarında və sitrus meyvə bağlarında olublar.

Qeyd olunub ki, Lənkəranda ilk dəfə çay bitkisi 1898-ci ildə əkilib. Sovet dövründə Azərbaycan əhalisinin çaya olan tələbatının 70 faizini respublikada istehsal olunan çay məhsulu ödəyib. Uzun müddət tənəzzül dövrünü yaşayan çayçılıq təsərrüfatı regionların sosial-iqtisadi inkişafına dair Dövlət Proqramlarında müəyyən edilmiş tədbirlərin icrası nəticəsində yeni dirçəliş dövrünü yaşayır.

Şam yeməyindən sonra məktəblilər Lənkərandakı “Şah sarayı”nda musiqili-əyləncəli proqramlarda iştirak ediblər.

Martın 25-də tur aksiyanın Sumqayıt, Naftalan və Mingəçevir şəhərlərinin və Xızı rayonundan olan iştirakçıları Lənkərandan sonra Astara və Masallı rayonlarına səyahət ediblər.

Humanitar aksiyanın iştirakçılarını Astara Rayon İcra Hakimiyyətinin məsul işçiləri, müəllimlər, gənclər və ictimaiyyətin nümayəndələri qarşılayıblar.

Rayon icra hakimiyyəti başçısının müavini Yasəmən Rəsulova cənub bölgəsinə səyahət edən şagirdləri və onların müəllimlərini Novruz bayramı münasibətilə təbrik edərək Prezident İlham Əliyevin tapşırığına əsasən keçirilən tur-aksiyanın məktəblilərin dünyagörüşünün formalaşmasındakı rolunu yüksək dəyərləndirib.

Məktəblilər Heydər Əliyev Muzeyində Ümummilli Liderin həyat və fəaliyyətini, dahi rəhbərin Astara rayonuna səfərlərini əks etdirən eksponatlar və fotoşəkillərlə böyük maraqla tanış olublar.

Sonra tur-aksiyanın iştirakçıları Astara şəhərində, Xəzər dənizi sahilində salınmış park-bulvar kompleksinə gəliblər.

Məktəblilərə Astaranın qədim tarixi, mədəniyyəti, adət-ənənələri, turizm potensialı, əhalinin məşğulluğu və sosial-iqtisadi inkişafı barədə məktəblilərə məlumat verilib.

Qeyd olunub ki, Astara zəngin təbiətə və qədim tarixə malik, nadir el sənətkarlığının, qədim adət-ənənələrin və folklorun qorunduğu qədim yaşayış məntəqəsidir.

Park-bulvar kompleksi ilə tanışlıqdan sonra tur-aksiyanın iştirakçıları “Astaraçay” MMC-nin çay fabrikində çay emalı prosesini izləyib, burada yaradılmış “Çay muzeyi”də nümayiş etdirilən eksponatlarla tanış olublar.

Günün ikinci yarısında məktəblilər Masallı rayonuna səyahət ediblər.

Tur-aksiyanın iştirakçılarını Masallı Rayon İcra Hakimiyyətinin məsul işçiləri, müəllimlər və ictimaiyyətin nümayəndələri qarşılayıblar.

Masallı şəhərindəki Heydər Əliyev parkında məktəblilərlə görüşdə çıxış edən rayon icra hakimiyyəti başçısının müavini Aybəniz Qafarova “Ölkəmizi tanıyaq” aksiyası çərçivəsində təşkil olunan tur-aksiyanın əhəmiyyətindən danışıb, şagirdlərə xoş arzularını çatdırıb.

Məktəblilər Heydər Əliyev parkında Ümummilli Liderin abidəsi önünə gül dəstələri düzərək xatirəsini ehtiramla yad edib, Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlar və fotoşəkillərlə tanış olublar.

Humanitar aksiyanın iştirakçıları Mərkəzin rəqs qrupunun çıxışlarını böyük maraqla izləyiblər.

Sonra məktəblilər Uşaq İncəsənət Məktəbinə gəliblər.

Məlumat verilib ki, Uşaq İncəsənət Məktəbi ötən il sentyabrın 3-də Prezidenti İlham Əliyevin iştirakı ilə istifadəyə verilib. Ümumi sahəsi 2743 kvadratmetr olan ikimərtəbəli binada 33 sinif otağı var. Sinif otaqlarının hamısı müasir avadanlıqla, təlim-tədris ləvazimatları ilə təchiz olunub. 150 yerlik akt zalında müxtəlif tədbirlərin keçirilməsi üçün hər cür şərait yaradılıb. Kitabxana, rəsm otağı və heykəltəraşlıq emalatxanasında dərslərin keçirilməsi üçün bütün imkanlar nəzərə alınıb. Məktəbdə hazırda 305 şagird təhsil alır və 70 müəllim çalışır.

Tur-aksiyanın iştirakçıları ötən il sentyabrın 3-də istifadəyə verilmiş Tarix-Diyarşünaslıq Muzeyi ilə də tanış olublar. Muzeyin direktoru Əntiqə Tağıyeva bildirib ki, Prezident İlham Əliyev Masallıya səfəri çərçivəsində Tarix-Diyarşünaslıq Muzeyinin açılışında iştirak edib. Muzey 1950-ci ildə yaradılıb və əvvəllər şəhər mərkəzindən 16 kilometr məsafədə yerləşən keçmiş məktəb binasında fəaliyyət göstərib. Ümumi sahəsi 1861 kvadratmetr olan muzeyin yeni binasında 5 ekspozisiya zalı yaradılıb. Ekspozisiyalarda Masallının tarixi, bu ərazidə tapılan qədim əşyalar, ümumiyyətlə, rayonun həyatı ilə bağlı məlumatlar toplanıb. Muzeydə 7 mindən çox eksponat var. Onlardan 2 mini ekspozisiya zallarında nümayiş etdirilir. Muzeydə müstəqillik tariximizə xüsusi yer verilib. Müstəqilliyimizin banisi olan xalqımızın ümummilli lideri Heydər Əliyevin və Prezident İlham Əliyevin həyat və fəaliyyətlərini əks etdirən fotolardan ibarət guşələr yaradılıb.

Sonra tur-aksiyanın iştirakçıları Masallı şəhərindəki “ASAN həyat” kompleksinə gələrək burada yaradılan şəraitlə tanış olublar. Məktəblilər, həmçinin Masallı Olimpiya İdman Kompleksi, Bayraq Meydanı və Azərbaycanın Dövlət Rəmzləri Muzeyi ilə də yaxından tanış olublar.

Tur-aksiyanın iştirakçılarına məlumat verilib ki, "ASAN həyat" kompleksi, Bayraq Meydanı, Azərbaycanın Dövlət Rəmzləri Muzeyi də Prezidenti İlham Əliyevin iştirakı ilə istifadəyə verilib. Bayraq Meydanının ümumi sahəsi 1,3 hektardır. Meydanda hündürlüyü 62 metr olan bayraq dirəyi ucaldılıb, fəvvarə inşa olunub. Ərazidə geniş abadlıq işləri görülüb, yaşıllıq zolağı salınıb, müasir suvarma və işıqlandırma sistemləri yaradılıb.

Ekspozisiya zalından və köməkçi otaqlardan ibarət Azərbaycanın Dövlət Rəmzləri Muzeyində tariximizin müxtəlif dövrlərinə aid eksponatlar, bayraqlar və dövlət rəmzləri qorunur.

Astara və Masallı rayonları ilə tanışlıqdan sonra tur-aksiyanın iştirakçıları Lənkərana zəngin təəssüratla qayıdıblar.