Bakı, 10 noyabr, AZƏRTAC

On ayda dörd şəhərdə su və kanalizasiya şəbəkəsinin tikintisi başa çatdırılıb.

“Azərsu” ASC-nin mətbuat xidmətindən AZƏRTAC-a bildirilib ki, 2016-cı ilin 10 ayında regionlarda su və kanalizasiya sistemlərinin yenidən qurulması, həmçinin yeni infrastrukturların yaradılması istiqamətində ciddi addımlar atılıb. 4 şəhərdə - Qusar, Beyləqan, Tərtər, Şamaxıda su və kanalizasiya şəbəkəsinin tikintisi başa çatdırılıb. Şirvan-Muğan qrup su kəmərindən Salyan şəhərinə yeni magistral su xətti çəkilərək istismara verilib. Bununla da Salyan şəhərinin 12 min 500 sakini mərkəzləşdirilmiş qaydada fasiləsiz və keyfiyyətli içməli su ilə təmin olunub. Eyni zamanda Şirvan-Muğan qrup su kəmərindən Şirvan şəhərinə yeni birləşmə verilib, şəhər əhalisinin böyük əksəriyyətinin su təchizatının yeni mənbədən aparılması mümkün olub. Beləliklə, Hacıqabul, Şirvan, Salyan, Neftçala, Biləsuvar şəhərlərinin, həmçinin 121 kəndin içməli su təminatına hesablanan Şirvan-Muğan qrup su kəmərindən Neftçala şəhəri istisna olmaqla digər 4 şəhərə suyun verilməsi təmin edilib. Növbəti mərhələdə Neftçala şəhəri və kəmərin marşrutu boyunca yerləşən bəzi kəndlərə suyun verilməsi nəzərdə tutulur.

Ötən müddət ərzində içməli sudan əziyyət çəkən kənd və qəsəbələrin su təchizatının yaxşılaşdırılması da diqqətdə saxlanılıb. Hesabat dövründə Balakən rayonunun Hənifə, Quba rayonunun Qəçrəş, Yardımlı rayonunun Vərov və Yolacaq, Ağsu rayonunun Elabad və Yenilik kəndlərində, Ağdam rayonun Quzanlı, Biləsuvar rayonun ərazisində yerləşən Cəbrayıl rayonundan olan qaçqın və məcburi köçkünlərin yaşadığı qəsəbələrin, Ağcabədi rayonu ərazisində yerləşən Laçın rayonundan olan qaçqın və məcburi köçkünlərin yaşadığı Misni-Mais obalarının su təchizatı yaxşılaşdırılıb. Bunlarla yanaşı, Masallı rayonunun Muğanlı zonasında yerləşən 5 kəndinə Viləşçay anbarının sahilində tikilmiş yeni sutəmizləyici qurğudan suyun verilməsi üçün magistral kəmərlərin inşası yekunlaşıb, kəndlərə suyun verilməsinə hazırlıq görülür.

Ümumilikdə 2016-cı ilin 10 ayı ərzində regionlarda 600 kilometrə yaxın magistral və şəbəkə su xətləri, 370 kilometrdən artıq kanalizasiya kollektorları və şəbəkələri inşa edilib, 17 subartezian quyusu qazılıb. Görülmüş işlər nəticəsində regionlarda 130 mindən çox sakin ilk dəfə mərkəzləşmiş qaydada içməli su ilə təmin edilib, 40 min nəfərin su təchizatı isə fasiləsiz rejimə keçirilib. Bununla da bölgələrdə fasiləsiz su ilə təmin olunan əhalinin sayı 650 min nəfəri keçib.

İndiyə qədər respublikanın 43 şəhər və rayon mərkəzində içməli su və kanalizasiya layihələri həyata keçirilib ki, bunların da 29-da işlər “Azərsu” ASC-nin sifarişi ilə icra olunub. Bu şəhərlərin 11-də layihələr dövlət büdcəsi vəsaiti, 18-də isə beynəlxalq maliyyə qurumlarından cəlb olunmuş kreditlər hesabına reallaşdırılır. Artıq 8 şəhərdə - Quba, Qusar, Göyçay, Beyləqan, Şamaxı, Tərtər, Biləsuvar, Naftalanda su və kanalizasiya şəbəkələrinin tikintisi başa çatdırılıb, digər 8 şəhərdə - Lənkəran, Hacıqabul, Sabirabad, Saatlı, İmişli, Kürdəmir, Ucar və Zərdabda layihələrin içməli su ilə bağlı olan hissəsi yekunlaşıb. Qarşıdakı aylarda Ağcabədi şəhərinin içməli su və kanalizasiya sistemlərinin yenidən qurulmasına başlanılacaq.