Bakı, 9 aprel, AZƏRTAC

Fransanın nüfuzlu və peşəkar tədqiqat mərkəzlərindən biri olan “Opinion Way” şirkətinin Azərbaycan Prezidentinin son 1 il ərzindəki fəaliyyəti ilə bağlı ölkəmizdə çoxsaylı respondentlərin iştirakı ilə keçirdiyi sorğunun nəticələri real ictimai rəyi əks etdirir.

Bu fikirləri AZƏRTAC-a açıqlamasında siyasi ekspert Elçin Mirzəbəyli söyləyib. Ekspert qeyd edib ki, Prezident İlham Əliyevin son bir il ərzində gördüyü işləri respondentlərin 85,1 faizinin müsbət dəyərləndirməsi dövlət başçısının həyata keçirdiyi siyasətin vətəndaşlar tərəfindən dərk edildiyini və yüksək dəyərləndirdiyini nümayiş etdirir. Müsbət dəyərləndirmə, əslində görülən işlərin müsbət nəticələrinə verilən qiymətdir. Deməli, sorğuda iştirak edənlərin 85,1 faizi görülən müsbət işlərin nəticəsini təkcə ölkə miqyasında deyil, həm də gündəlik həyatlarında hiss edib.

E.Mirzəbəyli əlavə edib ki, respondentlərin 80,1 faizinin ölkədəki mövcud ictimai-siyasi və sosial-iqtisadi sabitliyin qorunub saxlanılmasını Prezident İlham Əliyevin fəaliyyətinin ən uğurlu nəticəsi kimi dəyərləndirməsi sübuta yetirir ki, vətəndaşlarımız sabitliyin nə qədər mühüm əhəmiyyətə malik olduğunu yaxşı başa düşür və dəyərləndirirlər. Azərbaycan kifayət qədər həssas regionda yerləşir. Dünyada baş verən hadisələr ölkələrin xəritəsini dəyişir, milyonlarla insanı məhrumiyyətə düçar edir. Qanlı toqquşmalar, terrorizm, ticarət müharibələri, idarə olunan maliyyə sabitsizliyi Azərbaycandan dəfələrlə böyük ölkələri olduqca acınacaqlı bir vəziyyətlə qarşı-qarşıya qoyur. Belə bir zaman kəsiyində Azərbaycan Prezidentinin ictimai-siyasi və sosial-iqtisadi sabitliyin qorunub saxlanılmasına nail olması tarixi nailiyyətdir.

Ekspert vurğulayıb ki, sorğuda iştirak edən vətəndaşlarımızın 90,5 faizinin Azərbaycanda həyata keçirilən sosial-iqtisadi fəaliyyəti və bu sahədə Prezident İlham Əliyevin son ildə apardığı islahatları bütövlükdə müsbət qiymətləndirməsi olduqca yüksək göstəricidir. Burada mühüm olan amil həm də ölkə vətəndaşlarının həyata keçirilən islahatların perspektivinə olan inamı ilə bağlıdır. Bu da çox mühüm stimullaşdırıcı və islahatların dinamikasına təsir göstərə biləcək amildir. Bu, o deməkdir ki, Azərbaycanda Prezidentin həyata keçirdiyi islahatları əhalinin mütləq əksəriyyəti dəstəkləyir və prosesin dərinləşməsinə tam hazırlıqlı vəziyyətdədir.

Sorğuda iştirak edənlərin böyük əksəriyyətinin Prezidentin kadr islahatlarını müsbət qiymətləndirməsi bu prosesin uğurla həyata keçdiyini nümayiş etdirir. Məlum olduğu kimi, sorğuda iştirak edənlər ölkə Prezidentinin bölgələrə çoxsaylı səfərlərinin faydalılıq əmsalına da yüksək qiymət veriblər.

Əslində dövlətimizin başçısının regionlara səfəri zamanı Azərbaycan vətəndaşlarının ona olan sevgisini olduqca səmimi şəkildə sərgiləmələrinin belə bir nəticənin ortaya çıxacağına tamamilə əsas verdiyini deyən ekspert əlavə edib ki, bu münasibət təkcə Prezidentin səfərlərindən sonra baş verən müsbət dəyişiklikləri əks etdirmir, eyni zamanda, vətəndaşların dövlət başçısına olan inamını, etimadını, sevgisini göstərir. Sevgini isə yalnız gerçək bir səmimiyyətlə qazanmaq mümkündür.

Elçin Mirzəbəylinin sözlərinə görə, sorğuda iştirak edən vətəndaşlarımız mütləq çoxluqla Azərbaycan Prezidentinin xarici siyasətini dəstəklədiklərini bəyan ediblər. Əslində sorğuda yer alan bütün istiqamətlər bir-biri ilə sıx bağlıdır. Əgər xarici siyasətdə Azərbaycanın müstəqil mövqeyini önə çıxaran amillər olmasaydı, o zaman ölkədə sabitliyin təmin olunması da çox çətin olardı. Yaxud əgər daxildə ictimai-siyasi və sosial-iqtisadi sabitliyə, Azərbaycan xalqının birliyinə, həmrəyliyinə nail olunmasaydı, şübhəsiz ki, xarici siyasətdə də indiki nəticələrə nail ola bilməzdik.

Dövlət həyatı bütöv, kompleks yanaşma tələb edir. Azərbaycanın timsalında da biz bu bütöv siyasətin inikasını görürük. Şübhəsiz ki, bu siyasətin əsasında Prezident İlham Əliyevin siyasi iradəsi, dərin zəkası, cəsarəti, xarakteri və dövlətçilik təcrübəsi dayanır.