Bakı, 6 iyul, AZƏRTAC

İkinci Qarabağ müharibəsi Azərbaycan hərb tarixinin ən şanlı səhifəsi kimi əbədi olaraq tariximizə yazıldı. 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə şanlı ordumuz tarixi torpaqlarımızı işğaldan azad etdi, ərazi bütövlüyümüz bərpa olundu.

Bu fikirləri AZƏRTAC-a açıqlamasında AMEA Hüquq və İnsan Haqları İnstitutunun direktoru, hüquq üzrə elmlər doktoru, professor Aytən Mustafazadə deyib.

O bildirib ki, erməni silahlı qüvvələrinin 1988-ci ildən başlayan hərbi təcavüzü nəticəsində Azərbaycanın işğal olunmuş Dağlıq Qarabağ regionu və ətrafındakı 7 rayonun 600 mindən çox sakini öz yaşayış yerlərindən məhrum edilərək respublikanın 62 şəhər və rayonunda, 1600-dən çox məskunlaşma obyektində məcburi köçkün həyatı yaşamağa başladı.

Ulu öndər Heydər Əliyevin 1993-cü ildə xalqın təkidi ilə siyasi hakimiyyətə gəlməsinə qədər ölkədə ictimai-siyasi mühitin kəskinləşməsinə təsir edən faktorlardan ən başlıcası Ermənistan silahlı qüvvələrinin bir-birinin ardınca Azərbaycan ərazilərini işğal etməsi və bundan irəli gələn mənəvi-psixoloji, hərbi-siyasi böhran idi. Heydər Əliyevin siyasi hakimiyyətə qayıdışı ilə xalqın özünəinamı qayıtdı, Azərbaycan tarixində yeni səhifə açıldı.

Heydər Əliyev siyasi məktəbinin layiqli davamçısı İlham Əliyevin 2003-cü ildə prezident seçkilərində xalqın böyük əksəriyyətinin səsini qazanması və inamlı qələbəsi ilə respublikanın ictimai-siyasi həyatında yeni inkişaf mərhələsi başlandı.

Prezident İlham Əliyevin ölkəyə rəhbərlik etdiyi illər Azərbaycan tarixinə hərtərəfli və sürətli inkişaf dövrü kimi daxil olub. Ümummilli lider Heydər Əliyevin inkişaf strategiyasını, onun müəyyənləşdirdiyi daxili və xarici siyasi xətti Prezident İlham Əliyev uğurla və qətiyyətlə davam etdirir. Ciddi təməllər üzərində formalaşdırılan inkişaf strategiyası çox qısa müddət ərzində Azərbaycanı Cənubi Qafqaz regionunun sürətli inkişafa nail olan qüdrətli ölkəsinə çevirib. Bu gün Azərbaycan dünyada dayanıqlı iqtisadiyyata və vacib geostrateji mövqeyə malik olan bir ölkə kimi qəbul edilir. Cənubi Qafqazın lideri olan ölkəmiz artıq regionda hadisələrin inkişaf istiqamətinin müəyyənləşdirilməsində vacib və aparıcı rol oynayır.

Professor Aytən Mustafazadə vurğulayıb ki, Azərbaycanda təkcə iqtisadi sahədə deyil, bütün sahələrdə, o cümlədən hərbi sahədə də məqsədyönlü siyasət aparılır. Azərbaycan Ordusu dünyada güclü ordulardan birinə çevrilib. 30 ilə yaxın müddətdə düşmən işğalı altında qalan tarixi torpaqlarımızın azad edilməsi bunu bir daha sübut edir: “Prezident İlham Əliyev nüfuzlu beynəlxalq tədbirlərdə, görüş və qəbullarında, müsahibə və çıxışlarında hər zaman qeyd edirdi ki, Azərbaycan heç vaxt öz tarixi torpağında ikinci erməni dövlətinin yaradılmasına imkan verməyəcək. Məsələ Azərbaycanın ərazi bütövlüyü çərçivəsində həll edilməlidir və həll ediləcək. Prezident Dağlıq Qarabağ münaqişəsinin həlli istiqamətində danışıqlar yoluna üstünlük versə də, torpaqların işğaldan azad edilməsi üçün lazım gələrsə, digər vasitələrdən də istifadə etmək hüququmuzun olduğunu xatırladırdı. Ona görə də məsələnin siyasi həlli yolu istiqamətində fəaliyyətlə yanaşı, hərbi qüdrətimizi də inkişaf etdirirdi. Azərbaycan Ordusu bu gün dünya miqyasında güclü ordular sırasındadır”.

Aytən Mustafazadə diqqətə çatdırıb ki, humanist, sülhpərvər siyasət yeridən Azərbaycan rəhbərliyi torpaqlarımızın yalnız sülh və danışıqlar yolu ilə qaytarılmasına çalışırdı, hərbi əməliyyatlar danışıqların limiti tükəndiyi təqdirdə son çıxış yolu hesab edilirdi. Ermənistan-Azərbaycan, Dağlıq Qarabağ münaqişəsinin sülh yolu ilə, danışıqlar masası arxasında, beynəlxalq hüquq əsasında ədalətli şəkildə həll olunması üçün Azərbaycan səylə çalışdı. Lakin Ermənistan təxribatlarından əl çəkmədi. 2020-ci il sentyabrın 27-də Azərbaycan Ordusu əks-hücuma keçdi, İkinci Qarabağ müharibəsi başladı. BMT-nin Nizamnaməsinin 51-ci maddəsində göstərilir ki, hər bir dövlət özünün ərazi bütövlüyünü müdafiə etmək üçün istənilən anda hərbi yoldan istifadə edə bilər və hər bir dövlətin özünümüdafiə hüququ var. Müzəffər Ali Baş Komandan İlham Əliyevin rəhbərliyi ilə igid və cəsur Azərbaycan Ordusu torpaqlarımızın işğaldan azad edilməsi əməliyyatlarına başladı. Vətən müharibəsi Azərbaycanın Zəfəri, Ermənistanın kapitulyasiyası ilə yekunlaşdı. 44 günlük Vətən müharibəsinin gedişi zamanı ideoloji cəbhədə düşmənlə döyüşən Prezident İlham Əliyev xarici KİV-lər vasitəsilə beynəlxalq aləmə Azərbaycanın haqq işi barədə məlumat verirdi, erməni tərəfinin əsl simasını açırdı.

“Artıq bir sıra əməliyyatları əcnəbi hərbi ekspertlər tərəfindən öyrənilən 44 günlük Vətən müharibəsinin yekunları Azərbaycan Ordusunun maddi-texniki bazasının möhkəmləndirilməsinin, silahlanmaya yeni, müasir silah növlərinin, hərbi texnikanın daxil edilməsi istiqamətində atdığı addımların məhz müdrik və uzaqgörən siyasətin nəticəsi olmasını sübut edir. İndi ordumuz beynəlxalq hərbi tədqiqat mərkəzlərinin hesabatlarında dünyanın ən güclü ordularından biri kimi qiymətləndirilir. Azərbaycan bu gün çox güclü bir dövlətdir. Ölkə rəhbərliyinin qarşıya qoyduğu bütün məsələlər öz həllini tapır, davamlı inkişaf konsepsiyaları həyata keçirilir. 30 illik erməni işğalına son qoyulduqdan sonra Azərbaycanın bu ərazilərində abadlıq-quruculuq işləri geniş vüsət alıb. İşğaldan azad edilmiş torpaqlarımız tezliklə əsl sakinlərini qəbul edəcək, bu ərazilərimizə yeni nəfəs - qurub-yaratmaq həvəsli, doğma torpaqlarını sevən insanların nəfəsi gələcək. Ölkəmiz üçün yeni bir dövr başlanacaq. Bu yeni dövr təkcə iqtisadi sahədə yox, eyni zamanda, siyasi münasibətlər sahəsində böyük imkanlar açacaq. Azərbaycan beynəlxalq arenada öz rolunu daha da artıracaq”, - deyə professor Aytən Mustafazadə qeyd edib.