REGİONLAR


Ötən aylarda Dövlət İmtahan Mərkəzinin keçirdiyi imtahanlarda uğur qazanan 166 nəfər müvafiq vəzifələrə təyin olunub

Naxçıvan, 12 iyul, AZƏRTAC

Bu ilin birinci yarımili ərzində Naxçıvan Muxtar Respublikasının Dövlət İmtahan Mərkəzi tərəfindən Naxçıvan Muxtar Respublikası Ali Məclisi Sədrinin fərman və sərəncamlarından irəli gələn vəzifələrin və mərkəzə aid cari tapşırıqların icra olunması diqqətdə saxlanılıb. Dövlət qulluğuna dair qanunvericiliyin dövlət orqanlarında tətbiqinə nəzarət edilib, 1 dövlət orqanının qanunvericiliyə uyğun olmayan 1 qərarı ləğv etdirilib, 2 dövlət orqanının 4 qərarı isə dəyişdirilib.

Muxtar respublikanın Dövlət İmtahan Mərkəzinin mətbuat xidmətindən AZƏRTAC-ın Naxçıvan bürosuna bildirilib ki, bu faktlar mərkəzdə 2021-ci ilin altı ayı ərzində görülən işlər və qarşıda duran vəzifələrlə bağlı keçirilən tədbirdə qeyd olunub.

Mərkəzin sədri İsmayıl Qəribli bildirib ki, Naxçıvan Muxtar Respublikası Ali Məclisinin altıncı çağırış üçüncü sessiyasında Dövlət İmtahan Mərkəzinə dövlət qulluğuna və digər orqanlara qəbul imtahanlarının dövriliyinin təmin edilməsi, kadr hazırlığı üzrə kursların təşkili, test bankının yenilənməsi və zənginləşdirilməsinin təmin edilməsi tapşırılıb. Verilmiş tapşırıqlara uyğun olaraq il ərzində 6-sı işə qəbul, 4-ü attestasiya və 1-i sertifikasiya olmaqla, ümumilikdə 11 müsabiqə keçirilib. 2021-ci ilin ötən dövrü ərzində dövlət qulluğunda, hüquq-mühafizə orqanlarında, dövlət ümumi təhsil və musiqi təhsili müəssisələrində, Səhiyyə Nazirliyinin tabeliyində olan müəssisələrdə, AMEA Naxçıvan Bölməsində vakant vəzifələrin tutulması, attestasiya və sertifikasiya üçün keçirilən imtahanlarda 7468 namizəd iştirak edib, 4604 namizəd keçid balını toplayıb. Hesabat dövründə Dövlət İmtahan Mərkəzinin keçirdiyi imtahanlarda uğur qazanan 166 nəfər müvafiq vəzifələrə təyin olunub. Eyni zamanda, ehtiyat kadrlar siyahısından 1 namizəd işlə təmin olunub.

Qeyd olunub ki, bu il ilk dəfə olaraq tibb işçilərinin işə qəbulu test imtahanı vasitəsilə keçirilib. İmtahanın test mərhələsində 108 namizəd iştirak edib, onlardan 73-ü keçid balını toplayıb. Klinik tapşırıq mərhələsində iştirak edən 73 namizəddən 54-ü keçid balını toplayıb və onlardan 18-i müvafiq vəzifələrə təyin olunublar. 2021-ci ilin 6 ayı ərzində müəllimlərin işə qəbulu və sertifikasiyanın aparılması üçün 5494, tibb işçilərinin dövlət səhiyyə müəssisələrinə işə qəbulu və sertifikasiyasının aparılması üçün 11 min 629, musiqi müəllimlərinin işə qəbulu və sertifikatlaşdırma üçün 350, dövlət qulluğuna qəbulla əlaqədar 100 yeni sual olmaqla, ümumilikdə 17 min 573 sual test bankına işlənib. Həmçinin musiqi müəllimlərinin işə qəbulu və attestasiyası üçün 2026 sual ekspertiza edilib. Birinci yarımil ərzində Dövlət İmtahan Mərkəzi tərəfindən təşkil olunmuş hazırlıq kurslarında, ümumilikdə 192 nəfər, sınaq imtahanlarında isə 594 nəfər iştirak edib.

“Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” Naxçıvan Muxtar Respublikası Ali Məclisi Sədrinin 2019-cu il 3 aprel tarixli Sərəncamının icrasını təmin etmək məqsədilə Dövlət İmtahan Mərkəzinə hamiliyə verilən Naxçıvan Dövlət Universitetinin Dövlət və bələdiyyə idarəetməsi ixtisasının tələbələrinin iştirakı ilə müxtəlif mövzularda 4 seminar və universitetin sonuncu kurs tələbələrinin iştirakı ilə “Karyera günü” keçirilib”, - deyən İsmayıl Qəribli bildirib ki, dövlət qulluqçularının peşəkarlığının və xidməti fəaliyyətinin keyfiyyətinin artırılması üçün dövlət qulluğu sahəsində qəbul edilmiş normativ-hüquqi aktların öyrənilməsi Dövlət İmtahan Mərkəzinin əsas hədəflərindən biri olub. “Dövlət orqanlarında dövlət qulluqçularına ixtisas dərəcələrinin verilməsi qaydaları”, “Dövlət qulluqçusunun xidməti fəaliyyətinin qiymətləndirilməsi qaydaları” mövzusunda 2 seminar keçirilib, keçirilən seminarlarda, ümumilikdə 88 dövlət qulluqçusu iştirak edib.

Sonra Mərkəzin İmtahanların təşkili və keçirilməsi şöbəsinin müdiri Samiq Salayev, İnformasiya texnologiyaları və proqram təminatı şöbəsinin müdiri Mahir Abbasov, Dövlət qulluğu məsələləri şöbəsinin müdiri Razi Məmmədov və Mühasibat uçotu və ümumi işlər şöbəsinin müdiri Kəramət Əliyev məruzə ətrafında çıxış ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.