REGİONLAR


Ötən bir ilin nəticələri regionlarda düşünülmüş və davamlı inkişaf strategiyasının həyata keçirildiyini təsdiqləyir

Bakı, 11 aprel, AZƏRTAC

Azərbaycanda son illərdə həyata keçirilən islahatlar ölkəmizin, onun regionlarının davamlı sosial-iqtisadi inkişafına zəmin yaradıb. Müasir dünyada davam edən mənfi proseslərə, qlobal çağırışlara baxmayaraq, son bir ildə Prezident İlham Əliyev tərəfindən yürüdülən uğurlu daxili və xarici siyasət bu proseslərin ölkəyə təsirini minimuma endirib. Belə ki, keçən il bir çox ölkələrdə iqtisadi durum ağırlaşdığı və resesiyaya uğradığı halda, respublikamızda ümumi daxili məhsul 3 faiz artıb. Bu isə, regionların sosial-iqtisadi inkişafına əlavə maliyyə vəsaitlərinin yönəldilməsinə əlverişli şərait yaradıb.

Bunu AZƏRTAC-a açıqlamasında Regional İnkişaf Mərkəzinin rəhbəri, Bakı Dövlət Universitetinin professoru Çingiz İsmayılov deyib.

O qeyd edib ki, respublikanın gömrük və vergi sistemlərində köklü islahatlar nəticəsində bu sahələrdən büdcəyə daxil olan maliyyə vəsaitlərinin həcminin xeyli artması da sosial və iqtisadi layihələrin realizə edilməsinə imkan verib. Bu, eyni zamanda, sahibkarlardan vergi tutumlarının azaldılmasında və xüsusən regionlarda kiçik və orta sahibkarlığın inkişafında yardımçı rol oynayıb. Bu kontekstdə, vətəndaşların banklardan götürdükləri kreditlər üzrə kompensasiyanın ödənilməsinə dair Prezident İlham Əliyevin imzaladığı Sərəncam, əvvəlcə məhz kiçik və orta sahibkarlıq üçün əhəmiyyətli bir qərar olub. Nəzərə alsaq ki, sahibkarların bu kateqoriyası əsasən regionlardadır, Sərəncamın, eyni zamanda, rayonlarda əhalinin yaşayış durumunun yaxşılaşmasına yönəldiyi aydın olar.

Onun sözlərinə görə, regionların sosial-iqtisadi vəziyyəti və inkişaf meyilləri bölgələrin təbii resurs və insan potensialının səmərəli istifadəsindən bilavasitə asılıdır. Lakin bu sahədə uğurun əldə edilməsi üçün düşünülmüş uzunmüddətli və davamlı inkişaf strategiyası həyata keçirilməlidir. Son bir ildə bu istiqamətdə respublikada aparılmış işlər bunun bariz nümunəsidir.

Çingiz İsmayılov deyib: “Bu günlərdə respublikada 10 milyonuncu sakinin dünyaya gəlməsi və bütövlüklə ölkədə əhalinin təbii artımında son illər müsbət saldonun olması, demoqrafik vəziyyətin pozitiv istiqamətdə davam etməsi ilə yanaşı, respublikada sosial durumun əlverişli olmasını da bir daha təsdiqləyir. Regionlarda əhalinin sosial problemlərinin həllini Prezident İlham Əliyev, demək olar ki, ciddi nəzarət altında saxlayır. Bunu Prezidentin keçən il bölgələrə səfərləri də təsdiqləyir. Qeyd etmək yerinə düşər ki, bir ildə Prezident İlham Əliyev bölgələrə 30-dək səfər edib və sakinlərlə görüşərək problemləri ilə maraqlanıb, onların həlli üçün müvafiq dövlət strukturlarının nümayəndələrinə lazımi tapşırıqlar verib. Bu baxımdan, fevralda Ağsu, Şamaxı və İsmayıllı rayonlarında baş vermiş zəlzələ nəticəsində yaranmış vəziyyətlə yaxından tanış olmaq və yaranmış problemlərin operativ həlli üçün şəxsən Prezident İlham Əliyevin və birinci xanım Mehriban Əliyevanın zərər çəkmiş sakinlərlə yerlərdə görüşməsi onlara böyük dəstək oldu. Nəticədə, dağılmış evlərin yerində tezliklə yeni yaşayış evləri inşa edildi və bu iş hazırda da davam etməkdir”.

Prezident İlham Əliyevin rayonlara səfərlərinin əhali ilə birbaşa təmas əsasında mövcud problemlərin həllinə yönəldiyini vurğulayan Ç.İsmayılov bildirib ki, bölgələrimizin zəngin təbii potensialının istifadəsi üçün lazımi infrastruktur şəbəkəsinin yaradılması istiqamətində rayonlararası və rayondaxili avtomobil yollarının inşası, yeni iş yerlərinin açılması, kənd təsərrüfatı və turizm sahələrinin inkişafı regionların sosial-iqtisadi inkişafında aparıcı istiqamətlərdən biridir. Regionlarda “ASAN xidmət” mərkəzlərinin açılması, Ailə Biznesinə Asan Dəstək – ABAD layihəsinin daha geniş coğrafiyanı əhatə etməsi, kiçikhəcmli kreditlərin ayrılması ev təsərrüfatlarının inkişafına təkan verib. Baramaçılığın, tütünçülüyün, fındıqçılığın və pambıqçılığın inkişafına dair sərəncamlar, Prezidentin regionlarda bu sahədə çalışan kənd zəhmətkeşləri ilə görüşləri istehsalın və xidmət sahələrinin intensiv inkişafına səbəb olub. Bunun əsasında yerlərdə əhali əlavə gəlir əldə edir və nəticədə insanların rifah halı yaxşılaşır. Qeyd etmək yerinə düşər ki, son bir ildə regionlarda yeni aqroparklar, turizm mərkəzləri, məktəblər, uşaq bağçaları, suvarma kanalları və elektrik stansiyaları istifadəyə verilib.

“Son bir ildə Prezident İlham Əliyevin regionların sosial-iqtisadi inkişafına dair və əhalinin yaşayış rifahının yaxşılaşdırılmasına yönəlmiş onlarla sərəncamının icrası nəticəsində ölkədə əhalinin yaşayış səviyyəsi daha da yaxşılaşıb. Bu günlərdə Fransanın “Opinion Way” şirkəti tərəfindən Prezidentin son bir ildəki fəaliyyətinin qiymətləndirilməsinə dair keçirilən sosioloji sorğunun nəticələri və əhalinin mövcud vəziyyətdən məmnun olduqlarını bildirməsi də bunu bir daha təsdiqləyir”, - deyə Çingiz İsmayılov qeyd edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.