İDMAN


Ötən doqquz ay “Zenit” Bədən Tərbiyəsi-İdman Cəmiyyəti üçün uğurlu olub

Bakı, 6 oktyabr, AZƏRTAC

Bu ilin ötən doqquz ayı ərzində “Zenit” Bədən Tərbiyəsi-İdman Cəmiyyəti İctimai Birliyinin (BTİCİB) yetirmələri böyük uğurlara imza atıblar. Sərbəst güləşçilərimiz Cəbrayıl Həsənov (79 kq) və Əfqan Xaşalov (57 kq) apreldə ABŞ-da keçirilən dünya kubokunda gümüş medal qazanıblar. Bir aydan sonra Rusiyanın Kaspiysk şəhərində Cəbrayıl Həsənov daha bir uğura imza ataraq Avropa çempionatının bürünc medalını əldə edib. Əfqan Xaşalov isə U-23-lər arasında qitə çempionatının gümüş medalını qazanıb.

Bu sözləri “Zenit” Bədən Tərbiyəsi-İdman Cəmiyyəti İctimai Birliyinin sədri Fazil Hadıbəyov AZƏRTAC-a məxsusi müsahibəsində deyib.

O bildirib ki, güləşçilər yeniyetmələr arasında dünya, Avropa birinciliklərində də böyük uğurlar əldə ediblər. Onlardan Turan Bayramovun (65 kq) nailiyyətlərini xüsusi qeyd etmək istərdim. İstedadlı güləşçinin bu il ən böyük uğuru iyulda Xorvatiyanın paytaxtı Zaqrebdə keçirilmiş dünya birinciliyinin qızıl medalıdır. Bu ilin mayında isə Makedoniyanın paytaxtı Skopyedə təşkil olunan yeniyetmələrin Avropa birinciliyinin qalibi olub. O, bu nəticəsinə görə Yeniyetmələrin III Yay Olimpiya Oyunlarına lisenziya əldə edib. Digər yeniyetmə sərbəst güləşçimiz Əlihəsən Əmirli (42 kq) də Zaqrebdəki dünya birinciliyində fəxri kürsünün ən yüksək pilləsində yer alıb. Skopyedəki qitə birinciliyində isə gümüş medal qazanıb. Samboçumuz Vüqar Ağcayevin Praqada keçirilən Avropa birinciliyində qazandığı gümüş medal da yaxşı nəticədir.

F.Hadıbəyov qeyd edib ki, idman cəmiyyətində 9 bölmə və 138 qrupun tərkibində 1478 idmançı sərbəst güləş, yunan-Roma güləşi, sambo, boks, cüdo, taekvondonun sirlərinə yiyələnir. Müxtəlif idman bölmələrində 56 məşqçi-müəllim çalışır. Onların arasında Əməkdar məşqçilər Aslan Ağayev, Cavid Qurbanov, Əbülfəz Məmmədov, Zöhrab Abbasov, Yaqub Abdullayev, Təvəkkül Məmmədovu xüsusi vurğulamaq istəyirəm.

“Zenit” BTİCİB-in respublikanın bədən tərbiyəsi və idmanın inkişafında, uşaq və gənclərin sağlamlığının möhkəmləndirilməsi və yüksək dərəcəli məşqçilərin, idmançıların hazırlanmasında öz dəsti-xətti olduğunu vurğulayan F.Hadıbəyov qeyd edib ki, hazırda müxtəlif idman bölmələrində uşaqlar və yeniyetmələr arasında çoxlu perspektivli idmançılar yetişirlər. Güclü potensiala malik güləşçilərdən olan Turan Bayramovun Yeniyetmələrin III Yay Olimpiya Oyunlarında qalib gələcəyinə inandığını vurğulayan Birliyin sədri deyib: “Turan bu il həm Avropa, həm də dünya birinciliyində çempion olub. Ümid edirik ki, Yeniyetmələrin Yay Olimpiya Oyunlarında da qalib olacaq”.

Fazil Hadıbəyov Cəmiyyətin yetirmələrinin ötən aylar ərzində təşkil edilmiş müxtəlif beynəlxalq turnirlərdə fərqləndiklərini də qeyd edib: “Bu ilin yanvarında Müşfiq İsayevin xatirəsinə həsr olunmuş sərbəst güləş üzrə yeniyetmələr arasında Bakıda təşkil olunmuş ənənəvi beynəlxalq turnirdə Ruslan Şıxiyev (48 kq) bürünc medal qazanıb. Fevralda Ukraynada keçirilən sərbəst güləş üzrə beynəlxalq turniri Cəbrayıl Həsənov gümüş, Əfqan Xaşalov bürünc mükafatla başa vurublar. Almaniyada məktəblilər arasında sərbəst güləş üzrə beynəlxalq turnirdə də cəmiyyətimizin yetirmələri fərqləniblər. Bu yarışda güləşçilərimizin qazandığı 7 medalın 4-ü qızıl olub. Boksçularımız isə mayda Rusiyada təşkil olunan beynəlxalq turnirdə müxtəlif yaş kateqoriyalarında 3 qızıl, 2 gümüş, 2 bürünc medal qazanıblar. Həmin ay dəri əlcək ustalarımız daha bir yarışda – Ukraynada yeniyetmələr arasında keçirilən beynəlxalq turnirdə 8 medal əldə ediblər ki, onlardan da ikisi qızıl medal olub. Ötən ay sərbəst güləşçilərimizdən Nurəddin Novruzov (48 kq) Türkiyədə keçirilən beynəlxalq yarışda fəxri kürsünün ən yüksək pilləsində yer alıb. Bu növ üzrə Şamaxıda keçirilən beynəlxalq yarışda isə Ayxan Verdiyev (41 kq) qızıl, Abdulrəhim İbrahimov (44 kq) gümüş medal qazanıblar. Qadın güləşçimiz Elmira Qəmbərova (62 kq) isə Minskdə beynəlxalq yarışda bürünc mükafata sevinib”.

Qurumun rəhbəri “Zenit” BTİCİB-yə aid olan müəssisə, təşkilat və idarələrdə bədən tərbiyəsi və idmanın təbliğinə, insanların sağlamlıqlarının möhkəmləndirilməsinə xüsusi diqqət yetirildiyini vurğulayaraq bununla bağlı müəyyən tədbirlərin görüldüyünü də diqqətə çatdırıb: “Elektroenergetika və elektrotexnika sənayesi, müdafiə sənayesi, avtomobil nəqliyyatı və yol təsərrüfatı, aviasiya, metropoliten, metal, “Baku Steel Company” işçiləri həmkarlar ittifaqları respublika komitələri ilə birlikdə hər il təşkil edilən spartakiada yarışları bu baxımdan xüsusi əhəmiyyət daşıyır. Bu tədbirin təşkilində əsas məqsəd zəhmətkeşlərin sağlamlığını möhkəmləndirmək, onları bədən tərbiyəsi və idman məşğələlərinə cəlb etmək, asudə vaxtın səmərəli təşkilinə nail olmaq və eyni zamanda, bədən tərbiyəsi və idman yarışlarını yaxşı təşkil etmiş müəssisələri, təşkilatları müəyyən etməkdir. Mini futbol, daşqaldırma, kəndirdartma, qol güləşi, stolüstü tennis, üzgüçülük, dama, nərd, şahmat, güllə atıcılığı üzrə təşkil edilən spartakiada yarışlarının ilkin mərhələsində 3 mindən artıq idmançı mübarizə aparır ki, bu da idmanın kütləviliyinin təmin edilməsində mühüm rol oynayır”.

İdman mütəxəssisi qarşıdakı yarışlardan da söhbət açıb. Bildirib ki, oktyabrda Budapeştdə sərbəst güləş üzrə 23 yaşadək idmançılar arasında keçiriləcək dünya çempionatında idman cəmiyyətinin iki yetirməsi Ruslan Qasımov və Əfqan Xaşalov (57 kq) iştirak edəcəklər. O, hər iki idmançının mundialda uğurla çıxış edəcəyinə ümid etdiyini deyib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.