REGİONLAR
Ötən il Sabirabadda ümumi layihə gücü 45 milyon manat olan müxtəlif təyinatlı müəssisələr tikilib
Sabirabad, 14 fevral, Mahir Babayev, AZƏRTAC
2018-ci ildə Sabirabadda iqtisadiyyatın bütün sahələrində uğurlar qazanılıb, sosial obyektlərin tikintisi, sənaye və kənd təsərrüfatının inkişafı davam edib, bir sıra mühüm infrastruktur layihələri həyata keçirilib. Kiçik və orta sahibkarlığın daha da inkişaf etdirilməsi istiqamətində yerli investorların cəlb edilməsi hesabına rayonda ümumi layihə gücü 45 milyon manat olan müxtəlif təyinatlı müəssisələr tikilib.
AZƏRTAC-ın bölgə xəbər verir ki, bu barədə Sabirabadda 2018-ci ilin yekunları və qarşıda duran vəzifələrə həsr olunan hesabat yığıncağında rayon icra hakimiyyətinin başçısı Nazim İsmayılov məlumat verib.
Bildirilib ki, hesabat dövründə rayonda geniş tikinti, abadlıq-quruculuq işləri aparılıb, çoxmənzilli binaların əsaslı təmiri davam etdirilib. “Azərxalça”nın filialının binasında tikinti yekunlaşmaq üzrədir. Hazırda sənaye məhəlləsinin istehsal, yardımçı binalarının tikintisi və abadlıq işləri davam etdirilir. Tikintidə 250 nəfərə yaxın işçi çalışır. Sənaye məhəlləsinin cari ildə istifadəyə verilməsi nəzərdə tutulub. Ötən müddətdə rayonda kəndarası yolların tikintisində xeyli iş görülüb. 12600 nəfər əhalinin yaşadığı 18 yaşayış məntəqəsini birləşdirən 43 kilometr uzunluğunda Dadaşbəyli-Minbaşı-Salmanlı-Noxudlu-Salyan, 18 kilometr uzunluğunda Surra-Padar avtomobil yollarının tikintisi başa çatdırılaraq əhalinin istifadəsinə verilib. Ötən il 360 şagird yerlik Yaxadəllək kənd tam orta məktəbinin binası tikilib istifadəyə verilib, 200 şagird yerlik Bulaqlı və 1176 şagird yerlik Qaratəpə kənd tam orta məktəblərində əsaslı təmir işləri başa çatdırılıb. Son illər rayonda 3 uşaq bağçası tikilib, 6-sı isə əsaslı təmir olunub.
Məruzədə qeyd olunub ki, əhalini fasiləsiz və dayanıqlı elektrik enerjisi ilə təmin etmək məqsədilə rayon mərkəzində və 26 kənddə kabelləşmə işləri aparılıb, 9 kənddə isə bu işlər davam etdirilib. Nizami, Azadkənd və Yuxarı Axtaçı kəndlərində yerləşən 110/35/10 kilovoltluq yarımstansiyalarda yenidənqurma işləri aparılıb, 46 ədəd 10/6/04 kilovoltluq komplektləşdirilmiş transformator məntəqəsi yenidən qurulub. Rayonun bir sıra kəndlərində 35 və 10/04 kilovoltluq elektrik verilişi hava xətləri dəyişdirilib, iki min ədəddən çox yararsız dayaq yenisi ilə əvəz olunub. Tikintisi yekunlaşmaq üzrə olan 110/35/10/0.4 kilovoltluq Cavad yarımstansiyası 40 min nəfər əhalinin, eyni zamanda, Kür çayı boyunca 25 kilometr məsafədə yerləşən suvarma nasos stansiyalarının fasiləsiz elektrik enerjisi ilə təmin edilməsinə imkan yaradacaq.
Əhalinin təbii qazla təminatını yaxşılaşdırmaq məqsədilə görülmüş tədbirlər nəticəsində rayonun mərkəzinə və 62 kəndə qaz verilişi təmin olunub. Hesabat ilində Yuxarı Axtaçı, Yastıqobu kəndlərinə və Rüstəmli kəndində Zəngilan rayonundan olan məcburi köçkünlər üçün salınmış qəsəbəyə təbii qaz verilib, qalan 12 kəndin qazlaşdırılması üçün layihələndirmə işlərinə başlanılıb.
Diqqətə çatdırılıb ki, son illər rayonda aqrar sektorun digər sahələrinin inkişafı ilə yanaşı, pambıqçılığın inkişafına da diqqət xeyli artırılıb və müəyyən işlər görülüb. Hesabat ilində rayonda 13 min 55 hektar sahədə pambıq əkilib və 17 min 300 ton məhsul yığılıb.
Ötən il 24645 hektar sahəsində biçin aparılıb və 97093 ton taxıl istehsal olunub ki, bunun 61925 tonu buğda, 35168 tonu isə arpa olub. Hər hektarda ümumi məhsuldarlıq 39,4 sentner olub. 2018-ci ildə 19194 ton kartof, 65367 ton tərəvəz, 100221 ton bostan, 21124 ton meyvə istehsal edilib. Ötən ilin müvafiq dövrü ilə müqayisədə kartof istehsalı 368 ton, tərəvəz 1308 ton, bostan məhsulları 45 ton, meyvə isə 1171 ton çox olub.
Hesabat dövründə heyvandarlığın müasir texnologiyalar əsasında inkişaf etdirilməsi sahəsində də müəyyən tədbirlər həyata keçirilib. Heyvandarlıq məhsullarının istehsalının artırılmasında daha məhsuldar olan cins mal-qaranın yetişdirilməsi məqsədilə rayonda 17 süni mayalanma məntəqəsi yaradılıb. 2018-ci ildə iribuynuzlu mal-qaradan süni mayalama yolu ilə 3399 baş cins tərkibi yaxşılaşdırılmış bala alınıb. Ötən müddətdə iribuynuzlu heyvanların sayı 121 min 444 başa, qoyun və keçilərin sayı 228 min 470 başa çatıb. 2017-ci ilə nisbətən ət istehsalı 600 ton (diri çəkidə), süd istehsalı 7 min 143 ton, yun istehsalı 21 ton, yumurta istehsalı isə 8 milyon 141 min ədəd artıb.
Vurğulanıb ki, kənd təsərrüfatı məhsullarının istehsalında və məhsuldarlığın artırılmasında əkin sahələrinin suvarılması əsas amillərdəndir. Dövlətin qayğı və dəstəyi ilə rayonda bu sahədə xeyli iş görülüb. Dövlət başçısının tapşırığına əsasən rayonun Moranlı, Sarxanbəyli, Bala Həşimxanlı, Əliləmbəyli, Çöl Beşdəli və Çöl Ağaməmmədli kəndlərində əkin sahələrinin su təminatının yaxşılaşdırılması üçün H kanalının tikintisi tamamlanmaqla 11498 hektar əkin sahəsinin suvarma probleminə, beləliklə də, həmin kəndlərdə yaşayan əhalinin narahatlığına birdəfəlik son qoyulub.
Yığıncaqda cari ildə görüləcək işlər müəyyənləşdirilib, aidiyyəti qurumlara müvafiq tapşırıqlar verilib.