REGİONLAR


Ötən il muxtar respublikada 4500-dən çox mədəniyyət tədbiri keçirilib

Naxçıvan, 5 yanvar, AZƏRTAC

Ötən il muxtar respublikada əlamətdar və tarixi günlərlə bağlı 652 tədbir olmaqla, ümumilikdə, 4 min 520 müxtəlif mədəniyyət tədbiri keçirilib, 588 sərgi təşkil edilib. Xalqımızın milli-mənəvi dəyərlərinin yaşadılması, qorunması və təbliği, görkəmli şəxsiyyətlərin yubileylərinin, tarixi və əlamətdar günlərin qeyd olunması da diqqətdə saxlanılıb.

AZƏRTAC-ın Naxçıvan bürosu xəbər verir ki, bu barədə Naxçıvan Muxtar Respublikasının Mədəniyyət Nazirliyində 2018-ci ildə görülən işlər və qarşıda duran vəzifələrlə bağlı keçirilən kollegiya iclasında bəhs olunub.

İclasda Naxçıvan Muxtar Respublikasının mədəniyyət naziri Natəvan Qədimova məruzə ilə çıxış edərək bildirib ki, ilin mühüm mədəniyyət hadisələrindən biri də “Yallı (Köçəri, Tənzərə), Naxçıvanın ənənəvi qrup rəqsləri”nin UNESCO-nun Təcili Qorunma Siyahısına salınmasıdır. Naxçıvan Muxtar Respublikası Ali Məclisi Sədrinin 2018-ci il 24 dekabr tarixli “Şərur yallıları haqqında” Sərəncamı isə mədəniyyətimizə göstərilən daha bir diqqət və qayğının bariz ifadəsidir.

Martın 17-dən 27-dək “Şərur” Xalq Yallı Ansamblı Türkiyənin Kastamonu şəhərində keçirilən “Kastamonu – 2018 Türk Dünyası Mədəniyyət Paytaxtı”nın açılış mərasimində müxtəlif yallı nömrələri ilə çıxış edib.

Diqqətə çatdırılıb ki, ümummilli lider Heydər Əliyevin anadan olmasının 95-ci ildönümü ilə əlaqədar Bursa Bölgə Dövlət Simfonik Orkestrinin Naxçıvan şəhərindəki Heydər Əliyev Sarayında konserti olub, Naxçıvan Dövlət Filarmoniyasının yeni yaradılan simfonik orkestrinin Heydər Əliyev Muzeyinin qarşısında təqdimat konserti təşkil edilib, Ulu Öndərin anadan olmasının 95 illiyinə həsr edilmiş mahnı müsabiqəsi keçirilib.

Natəvan Qədimova deyib: Hesabat dövründə Naxçıvan Muxtar Respublikası Mədəniyyət Nazirliyi və qurumun sisteminə daxil olan müəssisə və təşkilatlar tərəfindən “Naxçıvan İslam Mədəniyyətinin Paytaxtı – 2018” ilinə həsr olunmuş müxtəlif xarakterli tədbirlər davamlı olaraq təşkil edilib. Belə ki, mədəniyyət ilinə həsr olunmuş 263, bu deviz altında 2 min 509 olmaqla, ümumilikdə, 2 min 772 tədbir keçirilib. Ötən il iyunun 20-də Naxçıvan Dövlət Musiqili Dram Teatrında “Naxçıvan İslam Mədəniyyətinin Paytaxtı – 2018”in açılış mərasimi, dekabrın 15-də isə Naxçıvan şəhərindəki Heydər Əliyev Sarayında bağlanış tədbiri olub. Bu əlamətdar hadisə ilə bağlı Beynəlxalq Türk Mədəniyyəti və İrsi Fondunun himayəsində yaradılmış “Dədə Qorqud” Kamera Orkestrinin konserti olub, “Gənclik” Mərkəzində “İslam filmləri həftəsi” keçirilib.

Mədəniyyət naziri diqqətə çatdırıb ki, bəhs olunan dövrdə “Naxçıvanqala” Tarix-Memarlıq Muzey Kompleksində keçirilən “Kətə”, “Göycə”, “Arıçılıq məhsulları – bal”, “Ailə təsərrüfatı məhsulları”, “Milli geyimlər” festivallarında nazirliyin tabeliyindəki müxtəlif mədəniyyət kollektivləri rəngarəng konsert proqramı ilə çıxış ediblər.

Hesabat dövründə muzeylərdə 8 eksponat təqdimatı keçirilib, mədəniyyət müəssisələrinə 1564 ədəd eksponat daxil olub. 2018-ci ildə muzeyləri 592 min 683 tamaşaçı ziyarət edib ki, onlardan 178 min 469 nəfəri əcnəbi vətəndaşdır.

Ötən il Bəhruz Kəngərli Muzeyinin, Naxçıvan Duz Muzeyinin, Qarabağlar Türbə Kompleksinin saytları fəaliyyətə başlayıb, Mədəniyyət Nazirliyinin yeni www.nmn.az saytı yaradılıb.

Bildirilib ki, hesabat dövründə mədəniyyətimizin inkişafındakı xidmətlərinə görə 10 nəfər Prezident mükafatına, 2 nəfər “Azərbaycan Respublikasının Əməkdar mədəniyyət işçisi”, 4 nəfər “Naxçıvan Muxtar Respublikasının Əməkdar mədəniyyət işçisi” fəxri adlarına, 4 nəfər “Tərəqqi” medalına layiq görülüb.

Natəvan Qədimova çıxışının sonunda Naxçıvan Muxtar Respublikasının Mədəniyyət Nazirliyinin bundan sonra da qədim diyarımızda mədəniyyət və incəsənətin inkişafı sahəsində qarşıya qoyulan vəzifələri layiqincə həyata keçirəcəyini vurğulayıb.

Sonra məruzə ətrafında çıxışlar olub.

Kollegiya iclasında nazirliyin 2019-cu il üçün iş planları təsdiq edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.