Bakı, 26 yanvar (AZƏRTAC). Ötən il respublikanın avtomobil yollarında tikinti, əsaslı təmir və yenidənqurma işləri davam etdirilmişdir. Bu dövrdə 537,2 kilometr, o cümlədən 134,6 kilometr respublika əhəmiyyətli, 402,6 kilometr yerli əhəmiyyətli yol təmir olunmuş, avtomobil yollarında 25 ədəd körpü tikilmişdir.

“Azəryolservis” ASC-nin mətbuat xidmətindən AZƏRTAC- a bildirmişlər ki, həmin dövrdə daxili investisiyalar hesabına Bakı-Ələt avtomobil yolunun 2-4 kilometr hissəsi (bayraq meydanına gedən yol), Yevlax-Xocalı-Laçın avtomobil yolunun Yevlax-Bərdə hissəsi (29 kilometr), Qusar-Ləzə avtomobil yolu (39 kilometr) və bu yol üzərində ümumi uzunluğu 318 metr olan 8 körpü tikilərək, Saatlı-Musalı-Mərzəli avtomobil yolunda Araz çayı üzərindəki körpü (238,8 metr) yenidən qurularaq istismara verilmişdir.

Daxili investisiya hesabına həmçinin 2012-ci ildə respublika əhəmiyyətli Gəndob - Rusiya Federasiyası ilə dövlət sərhədi yeni avtomobil yolunun tikintisi, Bakı-Ələt yolunun 50-69 kilometr sahələrinin, Qəbələ-Ağdaş, Ağstafa-Poylu-Gürcüstan Respublikası ilə dövlət sərhədi avtomobil yollarının yenidən qurulması, Ələt-Hacıqabul, Qəbələ-Oğuz, Goran–Naftalan, (336 kilometr)-Gəncə, Bəhramtəpə-Biləsuvar, Kürdəmir–İmişli, Bərdə-Tərtər avtomobil yollarının əsaslı təmiri layihələri üzrə tikinti işləri davam etdirilmişdir.