CƏMİYYƏT


Özünüməşğulluq proqramı beynəlxalq səviyyədə uğurlu təcrübə nümunəsi kimi yüksək dəyərləndirilir

Bakı, 17 may, AZƏRTAC

Azərbaycanda işsizlik və yoxsulluğa qarşı təsirli fəaliyyət mexanizmləri, uğurlu sosial proqramlar, xüsusilə Prezident İlham Əliyevin müvafiq Sərəncamına əsasən icra olunan özünüməşğulluq proqramı beynəlxalq səviyyədə yüksək qiymətləndirilir. Dünyanın mötəbər təşkilatlarından biri olan Beynəlxalq Sosial Təminat Assosiasiyasının (BSTA) özünüməşğulluq proqramını ən “Yaxşı təcrübə” xüsusi mükafatına layiq görməsi bunu bir daha sübut edir. 20 ölkədən 76 sosial layihənin iştirak etdiyi müsabiqədə münsiflər heyətinin yekdil rəyinə əsasən, özünüməşğulluq proqramı Avropa regionunda ən uğurlu təcrübələrdən biridir. Ölkəmizin bu təcrübəsindən BSTA-nın Bakıda keçirilən Avropa Regional Sosial Təminat Forumunda xüsusi bəhs olunub.

Əmək və Əhalinin Sosial Müdafiəsi Nazirliyinin (ƏƏSMN) ictimaiyyətlə əlaqələr və kommunikasiya şöbəsindən AZƏRTAC-a bildirilib ki, ƏƏSMN tərəfindən özünüməşğulluq proqramına cəlb edilənlərin sayı 2018-ci ildə 2017-ci illə müqayisədə 6,5 dəfə çox olmaqla 7896 nəfər olub. Onlardan biznes planlarını uğurla müdafiə edən 7267 nəfər proqramda iştirak edib. Həmin şəxslərin əksəriyyəti əlilliyi olan şəxslər, məcburi köçkünlər, ünvanlı dövlət sosial yardımı alan və ya şəhid ailələrinin, tərkibində sağlamlıq imkanları məhdud uşaqlar olan, yaxud çoxuşaqlı ailələrin üzvləri, müharibə veteranları və digərləri olub. Proqram çərçivəsində mal və material formasında verilmiş aktivlər hesabına onlar kiçik ailə təsərrüfatlarını qurublar. Bu proqrama dəstək kimi, Heydər Əliyev Fondunun “Regional İnkişaf” İctimai Birliyi tərəfindən də “Sosial bağlar” layihəsi əsasında 41 rayonda 125 aztəminatlı ailə üçün bağ, tərəvəz və bostançılıq təsərrüfatları yaradılıb.

Prezident İlham Əliyev Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat Agentliyinin - DOST Agentliyinin və ilk “DOST” mərkəzinin inzibati binasının açılışı zamanı çıxışında özünüməşğulluq proqramının sosial sahədə önəmli təşəbbüs olduğunu, Dünya Bankının da bu işlərə cəlb edildiyini deyib. “Dünya Bankı da öz maliyyə resurslarından istifadə edərək bu sahəyə vəsait ayıracaq və beləliklə, bu il təqribən 10 minə yaxın vətəndaş özünüməşğulluq proqramı ilə əhatə olunacaq. Gələcəkdə bu işin miqyası artmalıdır”, deyən dövlət başçısı bildirib ki, bu, həm məşğulluğun artırılmasına xidmət edəcək, eyni zamanda, ölkə iqtisadiyyatına böyük töhfə olacaq: “Özünüməşğulluq proqramının qeyri-neft sektorunun, kənd təsərrüfatının, xidmət sektorunun inkişafı üçün çox böyük əhəmiyyəti var”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.