MƏDƏNİYYƏT
PARİSDƏ KEÇİRİLMİŞ TURİZM SƏRGİSİNDƏ AZƏRBAYCAN LAYİQİNCƏ TƏMSİL OLUNMUŞDUR
Paris, 23 sentyabr (AZƏRTAC). Parisin möhtəşəm sərgi salonlarından olan Port de Versalda “Topreza“ adlı beynəlxalq turizm yarmarka-satış sərgisi təşkil edilmişdir.
Sərgidə dünyanın 200-dən artıq ölkəsinin müxtəlif turizm şirkətləri öz məhsullarını nümayiş etdirmişlər. Bu möhtəşəm yarmarka-satış sərgisində Azərbaycan da təmsil olunmuşdur.
Azərbaycan Respublikası Mədəniyyət və Turizm Nazirliyi turizm idarəsinin daxili turizmin inkişafı sektorunun müdiri Mahir Qəhrəmanov sərgi ilə bağlı AZƏRTAC-ın xüsusi müxbirinə müsahibə vermişdir.
Mahir Qəhrəmanov demişdir: - Azərbaycan artıq ikinci ildir ki, Parisdə keçirilən belə möhtəşəm sərgidə iştirak edir. Keçən dəfə olduğu kimi, bi il də ölkəmiz bu möhtəşəm tədbirdə böyük nümayəndə heyəti - Mədəniyyət və Turizm Nazirliyinin əməkdaşları, 6 şirkət, bir otel qrupu və “Cəngi” folklar ansamblı ilə təmsil olunur.
Belə sərgilərdə iştirak etməyimiz heç də təsadüfi xarakter daşımır. Fransa bizim üçün maraqlı bazardır. Mütəxəssislərimizin araşdırmaları göstərir ki, Bakı-Paris hava reysinin mövcudluğu, digər tərəfdən isə fransızların ölkəmizin tarixinə, mədəniyyətinə, ekoturizminə böyük maraq göstərmələri iki ölkə arasında turizm əlaqələrinin inkişafına əlverişli şərait yaratmışdır.
Azərbaycanda turizmin daha da inkişaf etdirilməsi üçün böyük potensial imkanlar vardır. Biz bu istiqamətdə işlər aparırıq. 2009-cu ilin sonları 2010-cu ilin əvvəllərində 9 ölkənin iştirakı ilə beynəlxalq səviyyədə Mədəniyyət və Turizm Mübadiləsi Assosiasiyası yaradılmışdır. Azərbaycan həmin assosasiyanın təsisçilərindən biri və idarə heyətinin üzvüdür. Assosiasiyanın yaradılmasının əsas məqsədi Azərbaycandakı mədəni marşrutlarının, xüsusilə də “Şərab yolları”, “İpək yolu” və digər marşrutların turizm üçün əlverişliliyinin öyrənilməsindən, ölkəmizin turizm imkanlarının bütün dövlətlərə, o cümlədən Fransaya çatdırmaqdan ibarət olmuşdur.
Mədəni marşrutlar çərçivəsində fransızlar üçün daha çox maraq doğuran “Aleksandr Düma Qafqazda“ layihəsidir. Həmin layihə artıq üç ildir ki, həyata keçirilir. Bu layihənin fransızlar üçün geniş bazar olduğunu nəzərə alaraq səfərimiz çərçivəsində bir neçə görüş planlaşdırmışıq. Parisdəki “Düma dostları” klubunun və böyük yazıçının doğulduğu şəhərin meri ilə görüşməyi və onlarla əlaqə yaratmağı qərara almışıq. Bununla da biz dümasevərlərin Azərbaycana səfərlərini təşkil etmək istəyirik.
Sərgi ilə bağlı onu bildirmək istəyirəm ki, iştirakçılar Azərbaycan guşəsinə böyük maraqla tamaşa edirlər. Onlar ölkəmizə, onun mədəniyyətinə, turizm imkanlarına, musiqisinə, milli mərbəxinə xüsusi maraq göstərirlər. Belə maraq ölkəmizin beynəlxalq aləmdə nüfuzunun getdikcə artmasına dəlalət edir. Əlbəttə, biz ölkəmizin tarixi, mədəniyyəti, abidələri barədə ətraflı məlumatlar verir, Azərbaycan və onun turizmi ilə bağlı kitabları, broşürləri onlara təqdim edirik. Sərgiyə gələnlər “Cəngi“ ansamblının çıxışına valeh olduqlarını açıq şəkildə bildirirlər. Onlar mətbəximizin məhsulları olan şirniyyatlara da böyük həvəs göstərirlər.
Biz sərgidə öz turizm məhsullarını nümayiş etdirən ayrı-ayrı ölkələrin şirkətləri ilə əlaqə yaratmağa çalışırıq. Artıq bir neçə ölkənin turizm şirkətləri ilə danışıqlar aparmışıq.
Azərbaycanın Fransadakı səfiri Elçin Əmirbəyov ölkəmizlə bağlı guşənin açılışında iştirak etmişdir.
Əsgər Əliyev
AZƏRTAC-ın xüsusi müxbiri
Paris