Xəbər verildiyi kimi, Milli Məclisin sədri Murtuz Ələsgərovun başçılığı ilə parlament nümayəndə heyəti martın 9-dan 14-dək Böyük Britaniyada səfərdə omuşdur.

Martın 12-də nümayəndə heyəti Şotlandiyanın paytaxtı Edinburq şəhərinə gəlmişdir. Ertəsi gün nümayəndə heyəti şəhərin görməli yerləri və ölkə parlamentinin tikilməkdə olan yeni binası ilə tanış olduqdan sonra Şotlandiya ali qanunvericilik orqanına gəldi. Burada parlamentarlarımıza Şotlandiya parlamenti haqqında ətraflı məlumat verildi, onları maraqlandıran suallar cavablandırıldı.

Sonra Şotlandiya parlamenti sədrinin müavini Corc Reydlə görüş oldu. Görüşdə parlamentlərarası münasibətlər, iki ölkə arasında qarşılıqlı əməkdaşlığın inkişafında ali qanunvericilik orqanlarının rolu, Dağlıq Qarabağ problemi, qanun yaradıcılığı sahəsində informasiya və təcrübə mübadiləsi, Qafqaz regionunda ictimai-siyasi vəziyyət və digər məsələlər barədə söhbətlər aparıldı, tədbirdə ölkələrimiz arasında bütün sahələrdə əlaqələrin bundan sonra da inkişaf etdirilməsinin vacibliyini vurğuladı.

Həmin gün deputatlarımız Şotlandiya ali qanunvericilik orqanının iclasında iştirak etdilər və ölkənin birinci naziri Cek Mark Konnel ilə parlamentdə aparılan sual-cavabı izlədilər.

Sonra deputatlarımız Şotlandiya krallarına məxsus Edinburq qəsri ilə tanış olub, bu qədim memarlıq abidəsinin tarixi ilə maraqlandılar. Qəsr şotlandiyalılar üçün qürur yeri hesab olunur. Abidə bu cəsur xalqın qəhrəmanlıq tarixinin şahididir.

Səfər zamanı nümayəndə heyəti ölkənin sahibkarlıq və nəqliyyat nazirinin müavini, Şotlandiya parlamentinin üzvü Lyuis Mak Donaldla görüşdü. Burada ölkələrimiz arasında müxtəlif istiqamətlərdə, xüsusilə iqtisadi sahədə əməkdaşlığın perspektivləri müzakirə olundu. Müzakirələrdə deputatlardan akademik Cəlal Əliyev, Asəf Hacıyev, Şahlar Əsgərov, Vaqif Abdullayev, Şirzad Əyyubov da yaxından iştirak etdilər, mövzu barədə fikirlərini bölüşdülər. Millət vəkili Mikayıl Mirzəyev Azərbaycanın zəngin mədəniyyəti və incəsənəti barədə görüş iştirakçılarına məlumat verdi. Milli Məclisin sədri Murtuz Ələsgərov parlament nümayəndə heyətimizin Britaniya səfəri müddətində göstərilən qayğı və səmimi münasibətə görə minnətdarlığını bildirdi.

Böyük Britaniyaya səfər müddətində Milli Məclisin spikeri ölkə parlamentinin icmalar palatasının sədri Maykl Martinlə, Xarici əlaqələr komitəsinin rəhbəri Donald Andersonla, Müdafiə komitəsinin və ATƏT Parlament Assambleyasının, həmçinin Britaniya-Azərbaycan parlament qrupunun sədri Bryus Corcla, LİNKS təşkilatının icraçı direktoru Dennis Sammutla, xarici işlər nazirinin müavini Mayk O`Brayanla, Parlamentlərarası İttifaqın Britaniya qrupunun üzvləri ilə, Elm və texnologiya komitəsinin rəhbəri Yan Qibsonla, Standartlar üzrə parlament komissarı Ser Filip Maurla, Britaniya hökumətinin Lordlar palatasında xarici əlaqələr üzrə nümayəndəsi Baronessa Kroli və digər rəsmi şəxslərlə görüşmüşdür. Görüşlərdə ölkələrimiz arasında müxtəlif sahələrdə münasibətlərin inkişaf perspektivləri, parlamentlərarası əlaqələrin möhkəmləndirilməsi, regional münaqişələrin həlli yolları barədə səmərəli danışıqlar aparılmışdır.

Martın 14-də Milli Məclisin nümayəndə heyəti Vətənə qayıtmışdır.

Ceyhun Quliyev

Milli Məclisin mətbuat

xidməti şöbəsinin əməkdaşı