AZƏRTAC xarici KİV-lərə istinadla xəbər verir ki, Braziliya yığmasının baş məşqçisi Karlos Albertu Parreyra bildirmişdir ki, komandanın ulduzları gələn ilin yayında Almaniyada keçiriləcək dünya çempionatında öz ölkəsi üçün altıncı dəfə Dünya çempionu adını qazanmaq istəyirlərsə, şəxsi iddialarını unutmalıdırlar.

Məşqçi demişdir: “Oyunçuların şəxsi iddialarını cilovlaya bilməsək, altıncı Kuboku qazanmaq mümkün olmayacaqdır. Bizim başlıca vəzifəmiz dünya səviyyəli ulduzların komanda üçün can yandırmasına nail olmaqdır”.

Parreyra futbolçulara məsləhət görmüşdür ki, onlar qarşıdakı birinciliyin favoritləri olduqları barədə düşünməsinlər. Bir çox favoritlərə, məsələn, 1954-cü ildə Macarıstana, yaxud 1974-cü ildə Hollandiyaya çempionluq nəsib olmamışdı. Bizə qarşı Avropanın 14 komandası və Argentina oynayacaqlar. Bu komandaların hər biri məhz Braziliyaya qalib gəlməyə çalışaçaqdır.