Azərbaycanın Daxili İşlər Nazirliyi və Baş Prokurorluğunun mətbuat xidmətlərindən AZƏRTAC-a daxil olmuş məlumatda deyilir ki, son vaxtlar beynəlxalq terrorizmin miqyasının genişlənməsi və daha təhlükəli xarakter alması, bir sıra Avropa və Orta Asiya ölkələrində törədilən faciəli terrorçuluq hərəkətləri respublikamızda müvafiq təhlükəsizlik tədbirlərinin daha da gücləndirilməsini zəruri etmişdir. Azərbaycanın hüquq mühafizə orqanları tərəfindən lazımi təhlükəsizlik işləri görülmüş, ictimai və milli təhlükəsizliyin qorunması ciddi nəzarətdə saxlanılır.

Bununla yanaşı, son günlər insanların daha çox cəmləşdiyi istirahət, müalicə, dini ibadət yerlərində, təhsil müəssisələrində, həyat əhəmiyyətli obyektlərdə partlayış törədiləcəyi haqqında anonim telefon zəngləri barədə kütləvi informasiya vasitələrində və əhali arasında məlumatlar yayılmışdır.

Türkiyənin Azərbaycandakı səfirliyində və Yəhudi dini icmasında, eləcə də Bakı metropolitenində və başqa yerlərdə partlayışlar törədiləcəyi haqqında hüquq mühafizə orqanlarına yazılı məlumatlar və telefon zəngləri daxil olmuşdur. Bununla əlaqədar dərhal aparılan yoxlamalarla onların yalan xarakter daşıdığı müəyyən edilmişdir. Fakt üzrə Azərbaycan Respublikası Cinayət Məcəlləsinin “Terrorçuluq barədə bilə-bilə yalan məlumat vermə” və “xuliqanlıq” maddələri ilə cinayət işi başlanmışdır. Eyni zamanda, lazımi təhlükəsizlik tədbirləri də görülmüş, bütün mühüm obyektlərin mühafizəsinin gücləndirilməsi üçün əlavə işlər görülmüşdür.

Respublika hüquq mühafizə orqanlarının həyata keçirdiyi istintaq-əməliyyat tədbirləri nəticəsində 2004-cü il aprelin 10-da saat 12.48-də “Space” teleşirkətində partlayış olacağı barədə yalan məlumat vermiş şəxs – Bakı şəhər sakini, 1988-ci il təvəllüdlü, 204 nömrəli orta məktəbin 10-cu sinif şagirdi Nadir Aydın oğlu Babayev müəyyən edilərək haqqında həbs qətimkan tədbiri görülmüşdür.

Həmçinin görülmüş tədbirlərlə 2004-cü il aprelin 2-də, saat 19.50-də İmişli Rayon Polis Şöbəsinə zəng edərək rayonun dəmir yol xəstəxanasında partlayış törədiləcəyi barədə yalan məlumat vermiş şəxs – həmin rayonun sakini, əvvəllər dəfələrlə məhkum olunmuş Ramiz Muradov da müəyyən edilərək tutulmuşdur. Ona Azərbaycan Respublikası Cinayət Məcəlləsinin “Terroçuluq barədə bilə-bilə yalan məlumat vermə” maddəsi ilə ittiham elan olunaraq barəsində həbs qətimkan tədbiri seçilmişdir.

Həyata keçirilən tədbirlərlə anonim telefon zənglərinin daha bir müəllifinin Bakı şəhər sakini, ruhi xəstə Mədinə Mehdiyeva olması müəyyənləşdirilmişdir. Bütün faktların araşdırılması və təqsirkar şəxslərin ifşası məqsədi ilə zəruri istintaq və əməliyyat-axtarış tədbirləri davam etdirilir.

Respublikanın Daxili İşlər Nazirliyi və Baş Prokurorluğu vətəndaşların nəzərinə çatdırır ki, ölkəmizin nüfuzuna xələl gətirən belə məsuliyyətsiz hərəkətlər yolverilməzdir və xalqımızın milli mənafeyinə ziddir. Bu cür halların qarşısının qətiyyətlə alınmasında hər bir kəs sayıqlıq göstərməli və hüquq mühafizə orqanları ilə əməkdaşlıq etməkdə maraqlı olmalıdır.