“PAŞA Bank” korporativ istiqrazların yerləşdirilməsində uğurlu məsləhət və anderraytinq xidmətləri göstərir

Bakı, 21 avqust (AZƏRTAC). Avqustun 21-də “Embawood” MMC-nin istiqrazlarının Bakı Fond Birjasında ilk dəfə kütləvi təklif üsulu ilə yerləşdirilməsinə həsr edilmiş təqdimat mərasimi keçirilib.

Bankdan AZƏRTAC-a bildiriblər ki, tədbirdə çıxış edən “PAŞA Bank”ın idarə heyətinin üzvü, baş investisiya inzibatçısı Taleh Kazımov bankın bu günədək 15-ə yaxın korporativ istiqrazların yerləşdirilməsində şirkətlərə uğurlu məsləhət və anderraytinq xidmətləri göstərdiyini qeyd edib. “PAŞA Bank” və “PAŞA Kapital” bu sahədəki fəaliyyətinə görə dünyanın nüfuzlu maliyyə jurnallarından olan “EMEA Finance” tərəfindən “İlin ən yaxşı investisiya bankı” və “İlin ən yaxşı broker şirkəti” adına layiq görülüb.

Tədbirdə istiqrazları ilk dəfə listinqə daxil edilən “Embawood” şirkəti ilə müvafiq saziş imzalanıb.