Bakı, 28 iyul, Səadət Hakıyeva, AZƏRTAC

İyulun 21-də Bakının Xətai rayonunda şəhid ailələrinə, müharibə əlillərinə mənzillərin və avtomobillərin təqdim olunması mərasimi keçirildi. Prezident İlham Əliyevin və Birinci vitse-prezident Mehriban Əliyevanın iştirakı ilə keçirilən tədbir həm də işğalçı Ermənistanın hərbi təxribatının qarşısının alınmasından sonra təşkil edildi. Azərbaycan Prezidentinin təqdimat mərasimindəki nitqi mühüm mesajlarla geniş rezonans doğurdu.

Prezident İlham Əliyevin mesajları bu gün də gündəmdədir və öz aktuallığını itirmir. Həmin tədbirdə deyilən tarixi sözlər qardaş Türkiyənin nüfuzlu KİV-lərində də tirajlanır, politoloqlar, konfliktoloqlar, hərbi eskpertlər dövlətimizin başçısının çıxışına istinad edirlər: “Gəl, bizimlə təkbətək vuruş, təkbətək, baxaq görək, bunun axırı nə olacaq”.

Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri, siyasi elmlər doktoru Qənirə Paşayeva deyib.

Prezident İlham Əliyevin nitqinin siyasi önəmi ilə yanaşı, sosial-iqtisadi faktlar və yanaşmalar baxımından da çox əhəmiyyətli olduğunu diqqətə çatdıran parlamentin Mədəniyyət komitəsinin sədri bildirib: “Prezidentin nitqi, ilk növbədə, şəhid ailələrinin, müharibədə sağlamlığını itirmiş vətəndaşlarımızın problemlərinin dövlətin, şəxsən dövlət başçısının diqqət mərkəzində olduğunu bir daha təsdiq edir. Son illər ərzində bu istiqamətdə kifayət qədər iş görülüb. Belə ki, 8 mindən çox şəhid ailəsi, müharibədə sağlamlığını itirmiş veteranlar mənzillərlə təmin edilib və onlara 7 minə yaxın avtomobil verilib. Digər tətəfdən, şəhid ailələrini, müharibədə sağlamlığını itirmiş vətəndaşlarımızı, müharibə veteranlarını, məcburi köçkünləri əhatə edən çox böyük proqramlar icra olunur. Bu da son deyil. 2020-ci ildə 7 mindən çox məcburi köçkün ailəsi mənzillərlə təmin ediləcək. Artıq özəl sektor da bu sahədə fəallıq göstərir.

Qənirə Paşayeva qeyd edib ki, görülən işlər, həyata keçirilən tədbirlər bu kateqoriyadan olan insanlara dövlət və özəl sektor tərəfindən qayğının təzahürüdür. Sosial sahədə çox böyük işlər görülür. Keçən il şəhid ailələrinin müavinəti 20 faiz artırılıb, yəni, 250 manatdan 300 manata çatdırılıb. Köçkünlər üçün müavinətlər 50 faiz, bəzi müavinətlər isə 100 faiz artırılıb. Bu il pensiyalar orta hesabla 27 faiz, orta əməkhaqqı 25 faiz artıb. Həmçinin cari ildə 90 min insan ödənişli ictimai iş yerləri ilə təmin ediləcək. Pandemiya dönəmində əhalinin sağlamlığının qorunması məqsədilə modul tipli yeni xəstəxanalar inşa edilərək xəstələlərin istifadəsinə verilir. Pandemiya ilə əlaqədar böhranın davam etməsinə baxmayaraq, dövlətimiz heç bir sosial layihəni ixtisar etməyib və təxirə salmayıb. Bütün layihələr uğurla davam etdirilir.

“Dövlətin başçısının dediyi kimi, bizim siyasətimiz ədalətli siyasətdir. Bizim siyasətimiz beynəlxalq hüquqa, tarixi ədalətə söykənir və biz istədiyimizə nail olacağıq. Mən bir neçə ildir beynəlxalq qurumlarda təmsil olunan bir deputat olaraq, bu günlərdə heç vaxt olmadığı qədər güclü beynəlxalq dəstək gördüyümüzü qürur hissi ilə qeyd etməliyəm. İlk dəstək Türkiyədən gəldi. Türkiyənin Prezidenti, Müdafiə naziri, Xarici İşlər naziri, parlament üzvləri, ictimai xadimlər Azərbaycana birmənalı dəstək göstərdilər. Beynəlxalq qurumlar – qurucusu və üzvü olduğumuz Türkdilli Dövlətlərinin Əməkdaşlıq Şurası, TÜRKPA, GUAM Azərbaycana dəstək bəyanatları verdi. BMT-dən sonra ən böyük beynəlxalq təşkilat olan Qoşulmama Hərəkatı, İslam Əməkdaşlıq Təşkilatı bizə birmənalı dəstəyini ifadə etdi. Pakistan, Ukrayna, Bosniya-Herseqovinanın ölkəmizə dəstəyini minnətdarlıqla qeyd edirik”, – deyə deputat bildirib.

Q.Paşayeva fikirlərini Prezident İlham Əliyevin fikirləri ilə bitirərək deyib: “Bütün bu məsələlər bir daha onu göstərir ki, bu gün Azərbaycan həm beynəlxalq müstəvidə, həm ölkə daxilində, həm mənfur qonşu ilə mübarizədə çox böyük bir gücə çevrilib. Bunu biz yaratmışıq, Azərbaycan xalqı yaradıb. Azərbaycan xalqı tam əmin ola bilər ki, Azərbaycanın müstəqilliyi, azadlığı, insanların rifahı və ölkəmizin güclənməsi daim diqqət mərkəzində olacaq”.