MƏDƏNİYYƏT


Parisdə tanınmış fotojurnalist Rza Deqatinin videoproyektor formatında sərgisi açılıb

Paris, 10 sentyabr, AZƏRTAC

Parisin “La Villette Grande Halle” böyük sərgi mərkəzində fotojurnalist Rza Deqati və Plantunun birgə “Yağış altında rəqs etmək” adlı sərgisi açılıb. Sərgi yeni videoproyektor formatında təşkil olunub.

AZƏRTAC xəbər verir ki, yeni formatda təşkil edilmiş sərgidə Rza Deqatinin Bakıda çəkdiyi şəkillər də nümayiş olunub.

Fotolar klassik sərgilərdə olduğu kimi, kağız üzərində deyil, videoproyektorlarla sərgi zalının divarlarında film formasında təqdim olunub.

Nümayiş olunan fotolar haqqında ətraflı məlumat verilib.

Qeyd edək ki, sadə insanların gündəlik həyatını, məişətini, adət-ənənələrini fotolarda əbədiləşdirən Rza Deqatnin ölkəmizdə dini tolerantlığa həsr olunmuş “Azərbaycan. Tolerantlıq məkanı” fotosərgisi bir çox ölkələrdə, eləcə də BMT-nin mənzil qərargahında, Avropa Parlamentində nümayiş olunub.

Heydər Əliyev Fondunun dəstəyi ilə fotojurnalist Reza Deqatinin “Odun cazibəsi” və “Günahsızların qırğını” adlı iki foto kitabı işıq üzü görüb.

“Odun cazibəsi” kitabında Reza Deqatinin 1987-ci ildən başlayaraq Azərbaycana səfərləri zamanı çəkdiyi fotolar nümayiş olunub. Bu fotolarda Azərbaycanın rayonları, ucqar kəndləri, sadə insanların həyat tərzi, adət-ənənələri və digər məqamlar əksini tapıb. Müəllif müxtəlif tədbirlərdən çəkdiyi fotolarla Azərbaycan mədəniyyətinin özünəməxsus mənzərəsini yaradıb.

“Günahsızların qırğını” kitabında isə fotojurnalistin 1992-ci ildə Ermənistanın azərbaycanlılara qarşı törətdiyi Xocalı soyqırımı zamanı lentə aldığı görüntülər toplanıb. Kitabda, həmçinin Xocalı soyqırımının dünyada tanınması məqsədilə müxtəlif ölkələrdə keçirilən tədbirlərdən, qaçqın və məcburi köçkünlər üçün salınan şəhərcikdən fotolar da yer alıb.

Şəhla Ağalarova

AZƏRTAC-ın xüsusi müxbiri

Paris

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.