ELM VƏ TƏHSİL
Partlayıcı sursatların təhlükəsinə dair maarifləndirmə üzrə “Metodiki tövsiyələr” hazırlanıb
Bakı, 6 may, AZƏRTAC
Mayın 6-da Təhsil Nazirliyi və Təhsil İnstitutunun birgə təşkilatçılığı ilə hazırlanan “Təhsil müəssisələrinin müəllim-şagird (tələbə) heyətinin mina və partlayıcı hərbi sursatların təhlükəsinə qarşı maarifləndirilməsinə dair “Metodiki tövsiyələr” nəşrinin təqdimatı keçirilib.
Bu barədə AZƏRTAC-a Təhsil Nazirliyindən məlumat verilib.
Tədbirdə açılış nitqi ilə çıxış edən təhsil nazirinin müavini Firudin Qurbanov Şanlı Ordumuzun texnikasının süni intellektlə bağlı olduğunu və son texnologiyalarla təchiz edildiyini vurğulayıb. Geri qayıdış prosesində soydaşlarımızın təhlükəsizliyinin çox önəmli olduğunu bildirən nazir müavini qeyd edib ki, təhlükələrin qarşısını almaq üçün minaların növləri haqqında gənclərimiz geniş məlumatı olmalıdır. Firudin Qurbanov metodik vəsaitin ərsəyə gəlməsində zəhməti keçən şəxslərə təşəkkürünü bildirib.
Təhsil İnstitutunun direktoru Rüfət Əzizov sistemli struktura malik metodik vəsaitin ümumi təhsil müəssisələrində istifadə olunacağından, fakültativ şəkildə bütün məktəblərdə tədris edilən fənlərə inteqrasiya ediləcəyindən danışıb. Əlavə olaraq bildirib ki, Azərbaycan Respublikasının Minatəmizləmə Agentliyi (ANAMA), UNICEF və Təhsil Nazirliyi arasında imzalanan memoranduma əsasən keçirilən layihənin icrasında artıq 2 mərhələ başa çatıb. Layihə çərçivəsində müəllimlərə distant təlim proqramları keçirilib və müəllimlər öyrəndikləri bilikləri şagirdlərinə çatdırıb.
Milli Məclisin deputatı, Azərbaycan Qızıl Aypara Cəmiyyətinin prezidenti Novruz Aslanov problemin aktuallığı haqqında çıxış edib və hazırlanan vəsaitin fəlsəfəsinin insanların həyatının xilas olunmasına xidmət etdiyini bildirib.
ANAMA-nın İdarə Heyətinin sədr müavini Samir Poladov minalanan ərazilərdə problemin aradan qaldırılması üçün maarifləndirmə işinin vacibliyini və metodik vəsaitin faydalı əməkdaşlığın nəticəsi olduğunu deyib.
Şuşa Rayon İcra Hakimiyyətinin başçısı Bayram Səfərov, Laçın Rayon İcra Hakimiyyətinin başçısı Aqil Nəzərli, orta ixtisas və ümumi təhsil müəssisələrinin rəhbərləri və müəllimləri, İkinci Qarabağ müharibəsinin qaziləri və digər qonaqların iştirak etdiyi tədbirdə iştirakçılara ANAMA-nın fəaliyyətini, eləcə də işğaldan azad edilmiş ərazilərə qanunsuz səfərlərin təhlükəsi və partlayıcı sursatların törədə biləcəyi xəsarətləri əks etdirən videoçarxlar nümayiş olunub.
Qeyd edək ki, “Metodik tövsiyələr”in hazırlanmasında məqsəd təhsilalanları mina və partlamamış hərbi sursatların (PHS) yaratdığı təhlükə barədə xəbərdar etmək, onlara riskli ərazilərdə davranış qaydaları və diqqətli olmağı aşılamaqdır. Eyni zamanda, onları cəmiyyətin məsuliyyətli üzvü olmağa həvəsləndirmək, partlayıcı sursatların təhlükəsinə dair əldə etdikləri bilik və bacarıqları başqaları ilə paylaşmağa təşviq etməkdir.