CƏMİYYƏT
Paytaxtın Xəzər, Nəsimi və Binəqədi rayonlarında narkotik vasitələrin satışını həyata keçirən 23 nəfər saxlanılıb VİDEO
Bakı, 26 iyul, AZƏRTAC
Polis əməkdaşları Bakıda narkotik vasitə və psixotrop maddələrin satışı ilə məşğul olan şəxslərin aşkarlanaraq məsuliyyətə cəlb olunmaları istiqamətində əməliyyatlar həyata keçiriblər. Əməliyyatlar paytaxtın Xəzər, Nəsimi və Binəqədi rayonlarında aparılıb.
Daxili İşlər Nazirliyinin mətbuat xidmətindən AZƏRTAC-a bildiriblər ki, Xəzər Rayon Polis İdarəsinin əməkdaşları rayon ərazisində, eləcə də paytaxtın digər rayonlarında psixotrop maddələrin - “patı”, “şüşə” adlandırılan metamfetamin, həmçinin heroinin satışı ilə məşğul olan şəxslərin saxlanılması istiqamətində əməliyyatlar həyata keçiriblər. Əvvəlcə Mərdəkan qəsəbəsində narkotiklərin satışı ilə məşğul olan şəxs - əvvəllər məhkum edilmiş Qəmbər Əliyev, qardaşları İmamverdi və Əliqəmə saxlanılıblar. Onların qəsəbə ərazisindəki evlərinin həyətinə baxış zamanı 27 kiloqram çəkidə 35 çətənə kolu, evdən isə 5 qram marixuana, 29 qram heroin, 9 qram metamfetamin və metadon həbləri aşkarlanıb. Qəmbər Əliyev ifadəsində qardaşları ilə birgə narkotik vasitələrin satışı ilə məşğul olduğunu etiraf edib.
Xəzər Rayon Polis İdarəsinin əməkdaşları tərəfindən reallaşdırılan digər tədbirlər zamanı rayon ərazisində narkotik vasitələrin satışını həyata keçirən Emil Heydərov və onun şəbəkəsinə daxil olan 12 nəfər tutulub. Araşdırma zamanı müəyyən edilib ki, Emil Heydərov müxtəlif yollarla əldə etdiyi narkotik vasitələrin Xəzər rayonu ərazisində həmin şəxslərin köməyi ilə satışını həyata keçirib.
Nəsimi Rayon Polis İdarəsi əməkdaşlarının həyata keçirdikləri əməliyyat-axtarış tədbirləri nəticəsində rayonun “Kubinka”, “Şamaxinka”, “Papanin” və digər ərazilərində narkotik vasitələrin və psixotrop maddələrin - metamfetaminin qanunsuz dövriyyəsi və satışı ilə məşğul olan daha 6 nəfər tutulub. Əməliyyat zamanı əvvəllər məhkum olunmuş Əflatun Qəmbərov, Qurban Həsənov, Asif Məmmədli, Roman Həsənov, Tural Qarayev və Zeynal Rufullayev tutularaq istintaqa cəlb ediliblər. Onların üzərlərinə və evlərinə baxış zamanı hazır bükümlərdə satış üçün nəzərdə tutulan külli miqdarda heroin, metamfetamin və elektron tərəzilər aşkar edilərək götürülüb. Onlar izahatlarında narkotik vasitələrin qanunsuz dövriyyəsi və satışı ilə məşğul olduqlarını etiraf ediblər.
Binəqədi Rayon Polis İdarəsinin 43-cü polis bölməsinin əməkdaşları tərəfindən həyata keçirilən əməliyyat zamanı isə Binəqədi qəsəbəsində psixotrop maddələrin satışı ilə məşğul olan şəxs - əvvəllər dəfələrlə məhkum edilmiş Ramil Quliyev yaxalanıb. Onun üzərinə və qəsəbə ərazisindəki evinə baxış zamanı 1 kiloqram 240 qram metamfetamin, 6 qram heroin və tiryək aşkarlanaraq götürülüb. Araşdırma zamanı onun Binəqədi rayonu və ətraf ərazilərdən müxtəlif vaxtlarda 20-yə yaxın evdən oğurluqlar etdiyi də məlum olub. Ramil Quliyevin yaşadığı evə baxış zamanı oğurluq yolu ilə əldə etdiyi məişət əşyaları da aşkarlanaraq maddi sübut kimi götürülüb.
Faktlarla bağlı Xəzər, Nəsimi və Binəqədi Rayon Polis idarələrində Cinayət Məcəlləsinin müvafiq maddələri ilə cinayət işləri başlanıb. Adları qeyd edilən şəxslər tutularaq istintaqa cəlb olunublar. Cinayət işləri üzrə zəruri istintaq-əməliyyat tədbirləri davam etdirilir.